بيىل جەتپىس جاسقا تولعان امانكەلدى كەنەنباەۆ شىمكەنتتەگى ءا.قاستەەۆ اتىنداعى كوركەمسۋرەت ۋچيليششەسىن ۇزدىك بىتىرگەن. جيىرما بەس جىل بۇرىن الماتى قالاسىندا العاش رەت «دليننىە تسۆەتنىە سنى» تاقىرىبىندا جەكە كورمەسى وتكەن ونەر يەسى تۋعان ءوڭىر تابيعاتىن رۋح پەن تىرشىلىكتىڭ بەينەسى رەتىندە سۋرەتتەيدى. لوندونداعى ۇلىبريتانيا پاتشايىمى «ۆيكتوريا – البەرت» جەكە مۋزەيى مەن توكيو قالاسىنداعى NIW گالەرەياسىندا وتكەن حالىقارالىق كورمەگە قويىلعان تۋىندىلارى وسى تۇرعىدان كورەرمەندەردەن جوعارى باعا الدى.
كورمەدەگى ءار كارتينادان دالانىڭ كەڭ تىنىسى سەزىلەدى. تۋىندى تاقىرىبى كوزگە انىق كورىنەتىن بەينەدەن بولەك كومەسكىلەۋ بەلگىلەردە تۇرعان سياقتى. سۋ تاسىعان اناسىنىڭ ارتىنان يىناعاش ءىلىپ ەرگەن قىز بەينەلەنگەن «جول» اتتى كارتيناعا انىقتاپ قاراساڭىز, ەسكى سۇرلەۋدىڭ ءىزىن بايقايسىز. بايقايسىز دا, ءبارىمىزدىڭ دە ۇلى تىرشىلىككە ساپارىمىز وسىنداي ەلەۋسىز سوقپاقتان باستالعانىن ەندى بىلگەندەي ءبىر ءسات ءۇنسىز قالاسىز.
مىنا ءبىر تۋىندىنىڭ اتى – «وتكىنشى». بەت-ءجۇزى كورىنبەيتىن ادامدار سۇلباسىنان ءبىر جىلۋلىق ەسىپ تۇرعانداي. سالدەن سوڭ بارىپ قالىڭ تۇماننىڭ اراسىنان ساۋلە شاشقان جارقىلمەن استاسقان قوس بەينە جاستىق داۋرەننىڭ بەلگىسى ەكەنىن ۇعىنا تۇسەسىز. بوياۋلار اراسىنان وزىڭىزگە تانىس بەلگى ىزدەپ, ۇزاق ايالدايسىز.
كەسكىندەمەمەن قاتار ءمۇسىنشى رەتىندە تانىمال ونەر يەسى «سىر بويىنىڭ باتىرلارى», «جانقوجا باتىر» مونۋمەنتتەرىنىڭ, فرانتسياداعى نوجان-سيۋر-مارن قالاسىندا ورناتىلعان مۇستافا شوقاي ەسكەرتكىشىنىڭ اۆتورى.
وبلىستىق مادەنيەت, ارحيۆتەر جانە قۇجاتتاما باسقارماسى باسشىسىنىڭ ورىنباسارى قۋانىش جانۇزاقوۆ, بەلگىلى قىلقالام شەبەرلەرى ءومىرالى يسمايلوۆ, تەمىربەك ساعىمباەۆ, عاني بايانوۆ, قۇرالبەك قوسۋاقوۆ قاتىسقان كەشتە ارىپتەستەرى كورمە يەسىن مەرەيلى جاسىمەن قۇتتىقتاپ, قۇرمەت كورسەتتى.
كورمەگە سۋرەتشىنىڭ ءار جىلدارداعى 70-تەن استام تۋىندىسىمەن قاتار, جۇبايى, قولونەر شەبەرى سالتانات قوجانتاەۆانىڭ كيىزدەن جاساعان بۇيىمدارى دا قويىلدى. جاسوسپىرىمدەرگە ارنالعان ءداستۇرلى «كىلەم توقۋ», «اسىل مۇرا», «شي توقۋ» ۇيىرمەلەرىن جۇرگىزەتىن شەبەردىڭ شاكىرتتەرى حالىقارالىق «ART kunder house» بايقاۋىندا, رەسپۋبليكالىق «اتا-بابا مۇراسىن ساقتايمىز جانە دامىتامىز» اتتى بالالار شىعارماشىلىعى كورمەسىندە بىرنەشە مارتە جۇلدەلى ورىنعا يە بولعان.
قىزىلوردا
