اقتاۋدا توي كورتەجى جول ەرەجەسىن ورەسكەل بۇزدى (ۆيدەو)

استانا. 8 مامىر. اقتاۋدا پوليتسيا قىزمەتكەرلەرى توي كولىكتەرىنىڭ جۇرگىزۋشىلەرىنە ايىپپۇل سالدى «گەلەندۆاگەن» جانە Toyota Land Cruiser ماركالى التى كولىكتەن قۇرالعان توي كورتەجىنىڭ زاڭسىزدىعى 2 مامىر كۇنى بەينەباقىلاۋ كامەراسىنا ءتۇسىپ قالعان. بۇل تۋرالى lada.kz حابارلادى. ءۇش جولاقتى جولدا توي كولىكتەرى وزگە جۇرگىزۋشىلەردىڭ جولىن جاۋىپ تاستاپ, مۇنىسىمەن قويماي, بىرنەشە رەت جولدىڭ قارسى باعىتىنا شىعىپ كەتكەن. ەسىرگەن جۇرگىزۋشىلەردىڭ كوشەنىڭ تىيىم سالىنعان تۇسىنان بۇرىلعانى دا بەينەتاسپادا انىق كورىنەدى. ماڭعىستاۋ وبلىستىق ىشكى ىستەر دەپارتامەنتىنىڭ ءباسپاسوز جەتەكشىسى ءاليا شەرماعامبەتوۆانىڭ مالىمدەۋىنشە, كورتەجدى پوليتسيا قىزمەتكەرلەرى توقتاتقان. بىرنەشە زاڭسىزدىققا جول بەرگەن ەكى جۇرگىزۋشى جۇرگىزۋشىلىك كۋالىگىنەن ايىرىلۋى ابدەن مۇمكىن. «كوبىنە جۇرگىزۋشىلەر پوليتسيا قىزمەتكەرلەرىن تويدىڭ بەرەكەسىن كەتىردى دەپ ايىپتاپ جاتادى. ال شىنداپ كەلگەندە, مەرەكەنىڭ ءمانىن كەتىرەتىندەر جول ەرەجەسىنە باعىنبايتىن جۇرگىزۋشىلەردىڭ وزدەرى. سەبەبى, پوليتسيا قىزمەتكەرلەرىنە رولدە كىم وتىرعانى ماڭىزدى ەمەس. جۇرگىزۋشىلەردىڭ الەۋمەتتىك دارەجەسى, ونىڭ قارجىلىق جاعدايى مەن بايلانىستارى دا ەشتەڭەنى وزگەرتپەيدى. زاڭ الدىندا ءبارى بىردەي!», – دەيدى ءاليا شەرماعامبەتوۆا. ماڭعىستاۋ وبلىستىق شكى ىستەر دەپارتامەنتى تاراتقان مالىمەتتەرگە قاراعاندا, بەينەباقىلاۋ كامەرالارى جانە بەينە تىركەگىشتەردىڭ كومەگىمەن پوليتسيا قىزمەتكەرلەرى جولداعى زاڭسىزدىقتاردى ءجيى تىركەپ, ولارعا تەز شارا قولدانا الادى. ەلامان قوڭىر. دەرەك, سۋرەت: lada.kz.