ورىنداۋعا كۇش سالايىق

بۇگىندە دۇنيەدەگى مۇقىم قازاق پەن قازاقستاندىقتار تاريح پاراعىنا التىن ارىپپەن جازىلعان ەڭ ايتۋلى كۇندەرىن باسىنان وتكىزۋدە. الەمدە تەرريتوريالىق جاعىنان توعىزىنشى ورىن الاتىن قازاق ەلى بەسىنشى مارتە پرەزيدەنتىمىزدى سايلاپ, تاعىنا وتىرعىزدىق. تابيعات پەن ادام ەگىز عوي. سايلاۋ كۇنى دە, ۇلىقتاۋ كۇنى دە اۋا رايى جادىراپ, ەلدىڭ ءسانىن كەلتىرىپ, قۋانىش سىيلادى. وسىلاي حالىق ءوزىنىڭ جۇرەك قالاۋىنداعى پرەزيدەنتىن تاڭدادى. مەن بولسا دا ەگەمەن ەلىمىزدىڭ بۇگىنگى بيىگىنە جەتۋىنە جارعاق قۇلاعى جاستىققا تيمەي, كۇن-ءتۇن دەمەي ەلىمىزدى باسقارىپ وتىرعان ۇلى ازاماتىمىز – نۇرسۇلتان ءابىش ۇلىنا داۋىسىمدى بەردىم. ايتقان بولار ەدىم, نازارباەۆ – تاۋەلسىز مەملەكەتىمىزدىڭ پاتريارحى. ويتكەنى, وسى كىسى ءبىزدىڭ رەسپۋبليكانى قالىپتاستىرىپ, ءورىستى جولعا سىلتەپ وتىردى. مەن ءبىر كەزدە: «زامانداستار, كوكجيەككە كوزدى سالايىق, نۇرەكەڭنىڭ باستاۋىمەن ماڭگىلىك قازاق ەلىنە رەتتى, ىزەتتى جولمەن جەتەيىك» دەپ ايتىپ ەدىم. بىلە بىلسەك, بۇگىندە تەك كوش­باسشىمىزدىڭ ارقاسىندا تىنىش­تىقتا, بەيبىت ءومىر ءسۇرىپ وتىرمىز. بۇل كىسى الىستى كوزدەيتىن, الىستى بولجاي الاتىن ۇلكەن مەملەكەت قايراتكەرى, ءارى بىرەگەيى. ايتقان بولار ەدىم, بۇگىنگى كۇنى نۇرەكەڭنىڭ بەدەلى دۇنيەجۇزىنە بەلگىلى. قازىر الەمدە 200-دەي مەملەكەت بولسا, سونىڭ ىشىندەگى كورىكتىسى دە, قازىناسى باي دا قازاقستان رەسپۋبليكاسى. مىنە, ءسىز وسىنداي ەلدى ارالاپ كوردىڭىز بە؟ مەن كوردىم. ءوزىم جىل سايىن كەڭ-بايتاق قازاقستانىمدى كولىكپەن ءبىر ارالاپ وتەمىن. مەنىڭ قۋاناتىنىم, ءاربىر قالاعا, اۋدانعا بارساڭ كورەتىنىڭ قۇرىلىس كراندارى. قۇرىلىس كراندارى بولدى دەگەن ءسوز, ول ەلدى مەكەندە مەكتەپ, اۋرۋحانا, مادەنيەت ورتالىعى سالىنىپ جاتىر دەگەن ءسوز. سوندىقتان قاي كەزدە بولسا دا, قايدا جۇرسەك تە ءوزىمىزدىڭ كوشباسشىمىزدىڭ ساياساتىن ءار ۋاقىتتا قولداپ, ونى باياندى ەتۋگە, ەلباسىنىڭ قابىلداعان بەس ينستيتۋتتىق رەفورماسىن, 100 قادامىن ورىنداۋعا كۇش-جىگەرىمىزدى سالايىق دەپ حالىققا ۇندەۋ تاستاعىم كەلەدى. بۇل ويىمدى حالىق قولدايدى دەپ سەنەمىن. ولاي بولسا, توقسانعا تايانعان جاسىمدا ەلباسىنا امان بولىپ, دەنساۋلىعى مىقتى, ەلىنە قالقان بولا بەرسە ەكەن دەگەن باتامدى بەرەمىن. سۇلتان سارتاەۆ, اكادەميك. الماتى. سۋرەتتى تۇسىرگەن ايتجان مۇرزانوۆ.