فوتو: primeminister.kz
كەزدەسۋگە گەرمانيا تۋريستىك قاۋىمداستىعىنىڭ پرەزيدەنتى نوربەرت اندرەاس فيبيگ, جەتەكشى نەمىس تۋروپەراتورلارىنىڭ وكىلدەرى جانە قازاقستان رەسپۋبليكاسىنىڭ تۋريزم جانە سپورت ءمينيسترى ەربول مىرزابوسىنوۆ قاتىستى.
ەرمەك كوشەرباەۆ ءوز سوزىندە قازاقستان ءۇشىن گەرمانيامەن ىنتىماقتاستىقتىڭ ماڭىزى زور ەكەنىن اتاپ ءوتىپ, ءتۋريزمدى ەكىجاقتى سەرىكتەستىكتى دامىتۋدىڭ ماڭىزدى باعىتى دەپ اتادى.
«تۋريزم – تەك ەكونوميكا سالاسى عانا ەمەس, سونىمەن قاتار ەلدەرىمىز اراسىنداعى سەنىم كوپىرى. گەرمانيامەن ارىپتەستىك قازاقستاننىڭ ەۋروپالىق نارىقتاعى پوزيتسياسىن كۇشەيتىپ, جاڭا مۇمكىندىكتەرگە جول اشادى. DRV Destination Forum-دى قازاقستاندا وتكىزۋ مۇمكىندىگىن قاراستىرۋ – ءوزارا ىنتىماقتاستىقتى ارتتىرۋعا باعىتتالعان ماڭىزدى قادام», دەدى ول.
كەزدەسۋدىڭ باستى تاقىرىپتارىنىڭ ءبىرى – گەرمانيادا قازاقستاندى جاڭا تۋريستىك باعىت رەتىندە تانىستىرۋ جانە 2026 جىلى ەلىمىزدە DRV Destination Forum وتكىزۋ ماسەلەسى بولدى.
گەرمانيا تۋريستىك قاۋىمداستىعىنىڭ پرەزيدەنتى نوربەرت اندرەاس فيبيگ قازاقستانعا دەگەن قىزىعۋشىلىقتىڭ جوعارى ەكەنىن اتاپ ءوتتى.
«ەلىڭىزدىڭ تابيعاتى, باي مادەنيەتى مەن زاماناۋي دامۋى قازاقستاندى نەمىس تۋريستەرى ءۇشىن ەرەكشە تارتىمدى ەتەدى. جىل سايىن نەمىس ازاماتتارى تۋريزمگە 85 ملرد ەۋرودان استام قارجى جۇمسايدى. ءبىز قازاقستاننىڭ ولاردىڭ تاڭداۋلى باعىتتارىنىڭ قاتارىنان لايىقتى ورىن الاتىنىنا سەنىمدىمىز», دەدى ول.
نەمىس دەلەگاتسياسىنىڭ ساپارى بارىسىندا قوناقتار استانا, الماتى جانە بايقوڭىر قالالارىنا بارىپ, ەلدىڭ تۋريستىك الەۋەتىمەن جانە بىرلەسكەن جوبالاردى دامىتۋ مۇمكىندىكتەرىمەن تانىسادى.
كەزدەسۋ سوڭىندا ەرمەك كوشەرباەۆ قازاقستان مەن گەرمانيانىڭ بىرلەسكەن كۇش-جىگەرى ەكىجاقتى ىنتىماقتاستىق پەن دوستىق قارىم-قاتىناستى ودان ءارى تەرەڭدەتەتىنىنە سەنىم ءبىلدىردى.
