دەپۋتاتتىڭ ايتۋىنشا, بيىل شىلدە ايىندا قازىعۇرت, سارىاعاش, كەلەس, جەتىساي جانە ماقتاارال اۋداندارى تۇرعىندارىمەن كەزدەسۋلەردە بىرقاتار وتكىر ماسەلەلەر كوتەرىلگەن. سونىڭ ىشىندە ەڭ كۇردەلى ماسەلە – سارىاعاش اۋدانىنداعى كوكتەرەك كەنتىنىڭ كارىز جۇيەسىنىڭ اپاتتى جاعدايى.
«1984 جىلى سالىنعان كارىز جۇيەسى بۇگىندە تولىق توزعان. ناتيجەسىندە 60 شيپاجاي مەن مىڭنان استام ءۇيدىڭ كارىزى ىستەن شىققان. بۇل كورشىلەس ەل مەن جەرگىلىكتى حالىققا ەكولوگيالىق قاۋىپ ءتوندىرىپ تۇر. ساسىق سۋلار كەلەس وزەنىنە جەتۋى مۇمكىن, ال ول وزەننىڭ سۋىن 600 مىڭنان استام ادام پايدالانىپ وتىر», دەدى قىرىقباەۆ.
اكىمدىك ازىرلەگەن جوبالىق-سمەتالىق قۇجاتتاما مەملەكەتتىك ساراپتامادان ءوتىپ, وڭ قورىتىندى العان. جوبانىڭ قۇنى – 1,9 ملرد تەڭگە. 2025 جىلعا وبلىستىق بيۋدجەتتەن 191,6 ملن تەڭگە بولىنگەنىمەن, جۇمىستى تولىق اياقتاۋ ءۇشىن رەسپۋبليكالىق بيۋدجەتتەن قوسىمشا 1,3 ملرد تەڭگە قاجەت.
سونىمەن قاتار, قازىعۇرت پەن سارىاعاش اۋداندارىندا اۋىز سۋ جۇيەلەرى قۇرىلىسىنىڭ التى نىسانى باستالعان. ولاردى اياقتاۋ ءۇشىن 2025 جىلى رەسپۋبليكالىق بيۋدجەتتەن 7,4 ملرد تەڭگەدەن استام قارجى قاراستىرۋ قاجەت. ونىڭ ىشىندە قازىعۇرت اۋدانىنىڭ التىنتوبە اۋىلدىق وكرۋگى, سارىاعاش اۋدانىنداعى قۇركەلەس اۋىلدىق وكرۋگى مەن سامال-3 شاعىناۋدانى, سونداي-اق اقجار اۋىلدىق وكرۋگىندەگى جوبالار بار.
دەپۋتات ماقتاارال اۋدانىنداعى جاعدايدى دا ەرەكشە اتاپ ءوتتى. اقجول, ارايلى, يگىلىك جانە مىرزاكەنت اۋىلدارىنداعى اۋىز سۋ جۇيەلەرىن قايتا قۇرۋ ءۇشىن شامامەن 2,8 ملرد تەڭگە قاجەت.
«اۋىز سۋ تاپشىلىعى حالىقتىڭ نارازىلىعىن تۋدىرۋمەن قاتار, «AMANAT» پارتياسىنىڭ سايلاۋالدى باعدارلاماسىندا كوزدەلگەن ينفراقۇرىلىمدىق مىندەتتەردىڭ ۋاقىتىلى ورىندالۋىنا كەدەرگى كەلتىرۋى مۇمكىن», دەدى تەمىر قىرىقباەۆ.
