مۇقان بالاپانوۆ, سوعىس ارداگەرى:
– وتان قورعاۋشى كۇنىنە وراي ءارى ۇلى جەڭىستىڭ 70 جىلدىعىنا ورايلاستىرىلىپ وتىرعان مىنا اسكەري شەرۋ تۇعىرىمىزدىڭ مىقتىلىعىن پاش ەتتى. ۇلى وتان سوعىسىنا قاتىستىم. جاسىم 92-دە بولسا دا قازىرگى جاسالىپ جاتقان جاقسىلىقتاردىڭ بارلىعىنان حاباردارمىن. ەلىمىزدىڭ العا قويعان اۋقىمدى مىندەتتەرى جۇزەگە اسۋى ءۇشىن ەلباسى ن.نازارباەۆتىڭ قايتا سايلانۋى كوڭىلىمىزدى قۋانتتى.
سوناۋ سۇراپىل سوعىس باستالعاندا مەن 17-18 جاسار بالاڭ جىگىت ەدىم. ستالينگرادتاعى قيان-كەسكى ۇرىسقا ارالاستىم. بەلارۋس پەن پولشانى ازات ەتۋ كەزىندە جارالاندىم. ەكىنشى توپتاعى مۇگەدەكتىگىم بار. كەيىنگى ۇرپاققا ايتارىم, بىرلىكتەرىڭدى ساقتاپ, بىزدەردىڭ باسىمىزدان كەشىرگەندى ەندى قايتىپ كورمەڭدەر. اللا اماندىعىن بەرسىن. قازاقستان ماڭگىلىك بولىپ, قازاعىمنىڭ مارتەبەسى ارقاشاندا ارتا بەرسىن!
امانگەلدى سۇلتان,
ارميا گەنەرالى س.نۇرماعانبەتوۆ اتىنداعى «جاس ۇلان» رەسپۋبليكالىق مەكتەبىنىڭ شاكىرتى:
– ءبىرىنشى رەت اسكەري شەرۋگە قاتىسىپ وتىرمىن, كوڭىل-كۇيىم جاقسى. ءوزىم قىزىلوردا قالاسىنان بولامىن. قازىر «جاس ۇلان» مەكتەبىندە 8-سىنىپتا وقيمىن. ەكىنشى دۇنيەجۇزىلىك سوعىسقا قاتىسقان اتالارىما العىسىم شەكسىز, ويتكەنى, ولار قازىرگى تاۋەلسىز ەلىمىزدىڭ ىرگەتاسىن قالاۋعا اتسالىستى. ۇلى جەڭىسكە 70 جىل تولۋىنا وراي وتكىزىلىپ وتىرعان مىنا اسكەري شەرۋ دە سول باتىر بابالارىمىزدىڭ ەرلىگىن كەشەگى قيان-كەسكى سوعىستا قايتالاعان اتالارىما ارنالىپ وتىر.
مەنىڭ ەندىگى تىلەگىم, اسپانىمىز اشىق بولىپ, ارداگەرلەرىمىز قۇرمەت پەن قولداۋعا يە بولا بەرسىن. بولاشاقتا مەن دە سولار سياقتى ايانباي ءوز وتانىما قالتقىسىز قىزمەت ەتىپ, قاجەت بولسا قولىما قارۋ الىپ قورعايمىن دا.
تاتيانا پلوتنيكوۆا,
ءۇي شارۋاسىنداعى ايەل:
– اسكەري شەرۋدى تاماشالاۋ ءۇشىن ادەيى بالالارىمدى دا الا كەلدىم. «وتان وتباسىنان باستالادى», دەپ جاتۋشى ەدى. وسى ايتۋلى مەرەكەدە تەك وتاعاسىن عانا قۇتتىقتاپ قويماي, ەلمەن بىرگە قۋانىپ, ءوزىمىزدىڭ مەرەكەلىك كوڭىل-كۇيىمىزدى كوپشىلىكپەن بولىسكىمىز كەلدى. ويتكەنى, ءبىزدىڭ مەملەكەتىمىزدە بارلىق ەتنوس وكىلدەرى بەيبىت جاعدايدا ءومىر ءسۇرىپ جاتىر. ادامدا ءبىر عانا وتان بولۋى قاجەت بولسا, ول – ءبىزدىڭ قازاقستان.
كەشەگى ورىمدەي قىزدار مەن جىگىتتەردىڭ ورتاق وتانىمىز بولعان كەڭەستەر وداعىن قورعاۋعا اتتانۋى جانە دە قيىن-قىستاۋدا جاۋىن جەڭۋى شىنىمەن دە ۇلكەن قۇرمەتكە لايىق. قازىر سول سوعىس ارداگەرلەرىنەن ارامىزدا قالعانى ساۋساقپەن سانارلىقتاي. ەندىگى ءبىزدىڭ قولىمىزدان كەلەتىنى, سول ارداگەرلەرىمىزگە بارىنشا قۇرمەت كورسەتە ءبىلۋىمىز. بالالارىمىزدىڭ بەيبىتشىلىكتە ءومىر سۇرۋىنە سول ارداگەرلەرىمىز ءوز جاندارى مەن دەنساۋلىقتارىن بەرگەن جوق پا. سوندىقتان دا مەن ءوزىمنىڭ جانە وتباسىمنىڭ اتىنان باسىمدى ءيىپ, ۇلكەن راحمەتىمدى ايتامىن.
ەركەبۇلان ومىرزاقوۆ,
الماتى وبلىسىنىڭ تۇرعىنى:
– ەلوردامىزدا ءوتىپ جاتقان اسكەري شەرۋگە 16 ارداگەرىمىزدى الماتى وبلىسىنان ادەيى الىپ كەلىپ وتىرمىز. سونداعى نيەتىمىز, جان الىسىپ, جان بەرىسكەن سوناۋ سۇراپىل سوعىستاعى ارداگەرلەرىمىز ەرلىكتەرىنىڭ ەش كەتپەگەنىن, قازىرگى استانامىزدىڭ ايشىقتانىپ, الەمگە تانىلىپ جاتقانىن ءوز كوزدەرىمەن كورىپ, سەزىنسىن دەگەن وي ەدى. شىنىمەن دە جەڭىستى الىپ بەرگەن ارداگەرلەرىمىزگە قۇرمەتىمىز شەكسىز.
كەزىندە كسرو-نىڭ تاعدىرى ءۇشىن كۇرەسكەن اتالارىمىز ونى ورتاق وتانىمىز دەپ قابىلداسا, ەلىمىز تاۋەلسىزدىگىن العاننان كەيىن دە ولاردىڭ كوڭىلىنە قاياۋ تۇسكەن جوق. قايتا ەلمەن بىرگە قيىندىقتارعا مويىماي, تەك جاقسىلىق تىلەۋمەن كەلەدى. سول كەشەگى جاۋىنگەرلەرىمىزدىڭ ەڭبەكتەرى اقتالىپ, قازىرگى بەيبىتشىلىكتە ءومىر ءسۇرىپ جاتقانىمىزدىڭ كورىنىسى دەپ بىلەمىن مىنا اسكەري شەرۋدى. بارشاڭىزدى وتان قورعاۋشى كۇنىمەن قۇتتىقتايمىن!
كوپبولسىن بەكماعانبەت,
وتستاۆكاداعى پوليتسيا پولكوۆنيگى:
– وتان قورعاۋشى كۇنىن مىناداي جايما-شۋاق كۇندە قارسى الىپ جاتىرمىز. رەنجىپ جۇرگەن ادام كورمەدىم, قايتا بارلىعىنىڭ كوڭىل-كۇيى كوتەرىڭكى. قاي جاعىنان بولسا دا قۇرمەتكە لايىق ارداگەرلەرىمىز ەلىمىزدىڭ ءار وڭىرىنەن ارنايى كەلىپ, مىنا اسكەري شەرۋدى تاماشالاۋدا. ەگدە جاسقا كەلگەندەرىنە قاراماي, ءوز ەڭبەكتەرىنىڭ جانعانىن كورۋ ءۇشىن كەلسە, ءبىز دە سولارعا قاراپ ءبىر جاساپ قالعانداي بولدىق.
ەرلىككە تاعزىم ەتە بىلەتىن حالىقپىز عوي. وتان قورعاۋشى كۇنىندە ارداگەرلەرىمىزدەن ۇلگى الىپ, جىگەرىمىزدى جاني تۇسسەك, سونىڭ ءوزى ەل تۇعىرىنىڭ مىعىم بولۋىنا وزىندىك سەپتىگىن تيگىزەدى دەپ سەنەمىن. اسكەري شەرۋگە كەلەر بولسام, بۇل ءداستۇرلى وتكىزىلىپ تۇراتىن شەرۋ جىلدان-جىلعا جاڭا اسكەري قارۋ-جاراقتارمەن تولىعىپ, اسكەرىمىزدىڭ ايبىنى اسقاقتاي تۇسكەندىگىنە كوز جەتكىزە تۇسەمىن. كوڭىلىم تولادى. جانە دە بارشا قازاقستاندىقتاردى وتان قورعاۋشى كۇنىمەن جانە ۇلى جەڭىستىڭ 70 جىلدىعىمەن قۇتتىقتايمىن!
جازىپ العان اسقار تۇراپباي ۇلى,
«ەگەمەن قازاقستان».
