استانادا تاۋەلسىز قازاقستاننىڭ تاريحىندا تۇڭعىش رەت ەڭ اسەم جانە كوپ ادام قاتىسقان اسكەري پاراد بولىپ ءوتتى

ءوزىنىڭ اۋقىمدىلىعى مەن اسەمدىگى جونىنەن پاراد ميلليونداعان قازاقستاندىق ءۇشىن بىرەگەي جانە ەستە قالارلىق وقيعا بولدى. بارلىق اسكەر تەكتەرىنىڭ وكىلدەرى «قازاق ەلى» مونۋمەنتى الدىنان جاياۋ, كولىكپەن ءجۇرىپ وتسە, تىكۇشاقتارمەن جانە ۇشاقتارمەن ۇشىپ ءوتتى. ەلىمىز قارۋلى كۇشتەرىنىڭ جەكە قۇرامى مەن اسكەري تەحنيكالارىنىڭ رەكوردتىق سانى, ءتىپتى, كوپتى كورگەن كورەرمەندەردى دە تاڭ-تاماشا قالدىردى. پارادقا شامامەن 5 مىڭ اسكەري قىزمەتشى, 200-دەي قارۋ-جاراق بىرلىگى مەن اسكەري تەحنيكا, اسكەري اۆياتسيانىڭ 70 تىكۇشاعى مەن ۇشاعى قاتىستى. پاراد-2015-ءتىڭ ءۆيزيتتى كارتىشكەسى تەك اۋقىمدىلىعى عانا ەمەس, سونداي-اق, ساباقتاستىعى بولدى. تۋ ۇستاۋشىلاردىڭ وتانىمىزدىڭ مەملەكەتتىك تۋى مەن جەڭىستىڭ قىزىل تۋىن – 70 جىل بۇرىن ءبىزدىڭ وتانداسىمىز ر.قوشقارباەۆ پەن ونىڭ جاۋىنگەرلىك سەرىگى گ.بۋلاتوۆ رەيحستاگتا جەلبىرەتكەن تۋدىڭ ءدال كوشىرمەسىن الىپ شىعۋى جۇرەك تولقىتاتىن ساتكە اينالدى. جەڭىستىڭ نىشانىنا اينالعان جاۋىنگەرلىك تۋ قازاقستانعا ماسكەۋدەگى تاعزىم تاۋىنان جەتكىزىلگەن بولاتىن. جاياۋ كولوننالار مەن اسكەري تەحنيكاعا ماساتتانباي قاراۋ مۇمكىن ەمەس ەدى. وراسان زور اسەم كورىنىستەردە اۆيا-دۋمان ەرەكشە ورىن الدى. استانا ۇستىنەن مايداندىق, اسكەري-كولىكتىك جانە ارميالىق اۆياتسيانىڭ توپتارى ۇشىپ ءوتتى. اسكەري ۇشقىشتار جەكە جانە ۇشۋ توپتارى قۇرامىندا ۇشۋدىڭ نەبىر ايشىقتى ورنەكتەرىن ورىنداپ, ۇلى جەڭىس مەرەيتويىن بىلدىرەتىن «70» سانىن كورسەتتى.