سەنات توراعاسى حالىقارالىق جارىستىڭ جوعارى دەڭگەيدە وتكەنىن ايتا كەلىپ, بۇل سپورتشىلاردىڭ شەبەرلىگىنىڭ جانە جەڭىسكە دەگەن ەرىك-جىگەرىنىڭ ناتيجەسى ەكەنىن اتاپ ءوتتى.
«پرەزيدەنت قاسىم-جومارت توقاەۆ مۇمكىندىگى شەكتەۋلى ازاماتتاردى قولداۋ جانە ينكليۋزيۆتى ورتا قۇرۋ ماسەلەسىنە ءاردايىم باسا ءمان بەرىپ كەلەدى. ەلىمىزدە «Astana World Boccia Challenger» سياقتى ءىرى سايىستىڭ العاش رەت وتكىزىلۋى وسى باعىتتا اتقارىلىپ جاتقان جۇمىستىڭ ناقتى ناتيجەسى ەكەنى انىق. بۇل جارىس ءبىزدىڭ پارااتلەتتەر ءۇشىن بەلگىلى ءبىر دەڭگەيدە سىناق بولدى. سوعان قاراماستان ۇلتتىق قۇرامامىز لايىقتى دەڭگەيدە ونەر كورسەتىپ, ەل نامىسىن ابىرويمەن قورعاپ شىقتى. وسى ورايدا يتيانا شىڭعىسحانوۆا, بالجان بولەكپاەۆا, ەلميرا مۋسراليەۆا, ەرحات المات جانە ازامات ايازباەۆ سياقتى سپورتشىلاردىڭ ەسىمدەرىن ەرەكشە اتاپ وتكەن ءجون. حالىقارالىق جارىستىڭ جەڭىمپازدارى مەن جۇلدەگەرلەرىن شىن جۇرەكتەن قۇتتىقتايمىن. ءبىزدىڭ سپورتشىلار الداعى پاراليمپيادا, پاراازيادا ويىندارىندا, باسقا دا ءىرى دودالاردا دا توپ جارادى دەپ سەنەمىن. وسى ماقساتقا جەتۋ ءۇشىن ءبارىمىز بىرلەسىپ, ناتيجەلى جۇمىس ىستەي بەرەمىز», دەپ م.اشىمباەۆ جۇلدەگەرلەردى ماراپاتتادى.
سونداي-اق فەدەراتسيا پرەزيدەنتى «Astana 2025 World Boccia Challenger» ءتۋرنيرىن جوعارى دەڭگەيدە وتكىزۋگە اتسالىسقان بارشا بەلسەندى ازاماتقا, پاراسپورتشىلارعا, ولاردىڭ اتا-انالارىنا, جاتتىقتىرۋشىلار مەن تورەشىلەرگە جانە ەرىكتىلەرگە العىس ءبىلدىردى.
جارىس قورىتىندىسى بويىنشا قازاقستان قۇراماسى جەكەلەي سىندا ەكى التىن, ەكى كۇمىس جانە ءبىر قولا مەدالمەن جالپى ەسەپتە ۇزدىك ۇشتىكتى تۇيىندەدى. اتاپ ايتقاندا, BC2 ساناتىندا يتيانا شىڭعىسحانوۆا جەڭىسكە جەتسە, ۆس1 ساناتىندا بالجان بولەكپاەۆاعا تەڭ كەلەر قارسىلاس بولمادى. ال ازامات ايازباەۆ (ۆس4 ساناتى) پەن ەرحات المات (ۆس1 ساناتى) قورجىنعا كۇمىس جۇلدە سالسا, ەلميرا مۋسراليەۆا (ۆس4 ساناتى) قولا مەدالدى ەنشىلەدى.
كوماندالىق سايىستا كورەيا جانە يران ەلىنەن كەلگەن پاراسپورتشىلار تيىسىنشە ءبىرىنشى جانە ەكىنشى ورىندارعا تابان تىرەدى.
جۇپتىق باسەكەدە ۆس4 ساناتىندا وتانداستارىمىز ازامات ايازباەۆ پەن ەلميرا مۋسراليەۆا (الماتى قالاسى) توپ جارسا, يران ەلىنىڭ وكىلدەرى ەكىنشى ورىننان كورىندى. ۆس3 ساناتىندا كورەيا سپورتشىلارى ۇزدىك شىقتى. ەكىنشى جانە ءۇشىنشى ورىندار تيىسىنشە يتاليا جانە ءۇندىستان سپورتشىلارىنا بۇيىردى.
حالىقارالىق بوچچا فەدەراتسياسىنىڭ (BISFed) قولداۋىمەن ۇيىمداستىرىلعان اتالعان سايىس ەلىمىزدە العاش رەت وتكىزىلىپ وتىر. تۋرنير بارىسىندا پاراسپورتشىلارعا 2028 جىلى لوس-اندجەلەستە وتەتىن پاراليمپيادا ويىندارىنا قاتىسۋ ءۇشىن بەرىلەتىن رەيتينگتىك ۇپايلار ساراپقا سالىندى.
