يسپانيانىڭ وڭتۇستىك-شىعىسىنداعى مۋرسيا وڭىرىندە دەمالۋشىلار اراسىندا سالمونەللەز ىندەتى تارادى. جەرگىلىكتى بيلىكتىڭ مالىمەتىنشە, جۇزگە جۋىق ادام سىرقاتقا شالدىققان, ولاردىڭ ەكەۋى اۋرۋحاناعا جاتقىزىلىپ وتىر. قالعاندارى دارىگەرلەردىڭ باقىلاۋىندا.
اۋرۋدىڭ العاشقى بەلگىلەرى ءۇش كۇن بۇرىن بايقالعان. نەگىزگى وشاق ايماقتاعى بەلگىلى قوناق ۇيلەردىڭ ءبىرىنىڭ اسحاناسىنان شىققان بولۋى مۇمكىن. وسىعان بايلانىستى دەمالىس ورنىنىڭ اسحاناسى ۋاقىتشا جابىلىپ, تاعامدار سانيتارلىق تەكسەرىستەن ءوتىپ جاتىر.
دارىگەرلەر مەن سانيتارلىق قىزمەت ماماندارى كۋرورتتاعى اس مازىرىندەگى ونىمدەردى تەكسەرىپ, دەزينفەكتسيالاۋ شارالارىن باستاپ كەتتى. قازىرگى كەزدە ىندەتتىڭ ناقتى قايدان شىققانى انىقتالعان جوق, الايدا الدىن الا بولجام بويىنشا ول ازىق-ت ۇلىكتەن تاراعان بولۋى مۇمكىن.
سالمونەللەز – ىشەك ينفەكتسيالارىنىڭ ەڭ كوپ تارالعان تۇرلەرىنىڭ ءبىرى. ول كوبىنەسە دۇرىس ساقتالماعان نەمەسە جەتكىلىكتى تەرميالىق وڭدەۋدەن وتپەگەن تاعام ارقىلى جۇعادى. اۋرۋدىڭ نەگىزگى بەلگىلەرى – ءىشتىڭ اۋىرۋى, قۇسۋ, قىزۋدىڭ كوتەرىلۋى جانە السىزدىك.
يسپانيا بيلىگى كۋرورتقا كەلگەن دەمالۋشىلارعا ساقتىق شارالارىن قاتاڭ ۇستانىپ, تەك رەسمي تەكسەرىستەن وتكەن ورىنداردا تاماقتانۋعا كەڭەس بەرىپ وتىر. قوعامدىق دەنساۋلىق ساقتاۋ قىزمەتى قوناق ۇيلەر مەن مەيرامحانالارداعى سانيتارلىق نورمالاردى قاتاڭ قاداعالاپ جاتىر.
دارىگەرلەردىڭ ايتۋىنشا, دەزينفەكتسيا جۇمىستارى تولىق اياقتالعاننان كەيىن عانا اسحانا قايتا اشىلادى.
