فوتو: ۇكىمەتتىڭ ءباسپاسوز قىزمەتى
قارجى ءمينيسترى ءمادي تاكيەۆ «2026–2028 جىلدارعا ارنالعان رەسپۋبليكالىق بيۋدجەت تۋرالى» زاڭ جوباسىن ۇسىنىپ, ەلدىڭ باس قارجى قۇجاتىنىڭ نەگىزگى پارامەترلەرى تۋرالى باياندادى.
ونىڭ ايتۋىنشا, 2026 جىلى بيۋدجەت كىرىستەرى 23,1 ترلن تەڭگەنى قۇراپ, 2028 جىلعا قاراي 27,6 ترلن تەڭگەگە دەيىن ارتادى. شىعىستار 27,7 ترلن تەڭگە كولەمىندە جوسپارلانعان. بيۋدجەت تاپشىلىعى 2026 جىلعى ءجىو-ءنىڭ 2,5%-ىنان 2028 جىلعا قاراي 0,9%-عا دەيىن تومەندەيدى. ءمينيستردىڭ اتاپ وتۋىنشە, بيۋدجەت ۇزاق ۋاقىتتان بەرى العاش رەت ۇلتتىق قوردان نىسانالى ترانسفەرتتەردى پايدالانباي تەڭگەرىلدى.
سونىمەن بىرگە ول بيۋدجەت الەۋمەتتىك باعدارلانعانىن, بىراق ەكونوميكانىڭ ناقتى سەكتورىن مەملەكەتتىك قولداۋ كولەمى ايتارلىقتاي ۇلعايعانىن جەتكىزدى.
«شىعىنداردى وڭتايلاندىرۋ جانە باسىمدىق بەرۋ بويىنشا جۇمىس جۇرگىزىلدى. وڭتايلاندىرىلعان قاراجات ناقتى سەكتورعا باعىتتالدى. ەكونوميكانىڭ ءوسۋىن ىنتالاندىراتىن شىعىستار 10,9% - دان 16,1%-عا دەيىن ۇلعايىپ, 4,470 ترلن تەڭگەنى قۇرادى», دەدى ءمادي تاكيەۆ.
شىعىستار قۇرىلىمىندا نەگىزگى ۇلەس ءداستۇرلى تۇردە الەۋمەتتىك سالاعا تيەسىلى – جالپى شىعىنداردىڭ 38,7%-ى نەمەسە 10,7 ترلن تەڭگە. ەكونوميكانىڭ ناقتى سەكتورىن دامىتۋعا 3,6 ترلن تەڭگە قاراستىرىلعان. ونىڭ ىشىندە اگروونەركاسىپتىك كەشەندى قولداۋعا – 732 ملرد تەڭگە, كولىك ينفراقۇرىلىمىن دامىتۋعا – 855 ملرد تەڭگە بولىنەدى. بۇدان بولەك رەسپۋبليكالىق جولداردى سالۋعا مەملەكەتتىك كەپىلدىكتەر تەتىگى ارقىلى 580 ملرد تەڭگە تارتۋ كوزدەلگەن. كۇشتىك بلوك شىعىستارى 3 ترلن تەڭگەدەن اسادى.
پرەمەر-مينيستر ولجاس بەكتەنوۆ زاڭ جوبالارىنا قاتىستى پىكىر ءبىلدىرىپ, مەملەكەت باسشىسىنىڭ تاپسىرمالارىن ەسكە سالدى:
«پرەزيدەنت بيۋدجەتتىڭ تەڭگەرىمدىلىگىن ساقتاۋدى, رەسپۋبليكالىق جانە جەرگىلىكتى دەڭگەيلەردە قاراجاتتى ساپالى جوسپارلاپ, ءتيىمدى ءبولۋدى تاپسىردى. زاڭ جوبالارى (جالپى سيپاتتاعى ترانسفەرتتەردىڭ كولەمى جانە 2026-2028 جىلدارعا ارنالعان رەسپۋبليكالىق بيۋدجەت تۋرالى) بيۋدجەتتىك پارامەترلەرگە سايكەس ازىرلەندى, سونداي-اق مەملەكەتتىك قارجىنىڭ تۇراقتىلىعىن قامتاماسىز ەتۋ ءۇشىن بارىنشا وڭتايلى. جالپى العاندا بيۋدجەت تەڭدەستىرىلگەن جانە مەملەكەت باسشىسىنىڭ بارلىق ستراتەگيالىق باستامالارى ەسكەرىلگەن. جالپى سيپاتتاعى ترانسفەرتتەر كولەمى وڭىرلىك ستاندارتتار جۇيەسىنە سايكەس, وڭىرلەرگە بازالىق ينفراقۇرىلىمنىڭ قولجەتىمدى بولۋىنا تەڭدەي جاعدايدى قامتاماسىز ەتىپ وتىر. پرەزيدەنت تاپسىرماسىنا سايكەس, بيۋدجەت الەۋمەتتىك ماسەلەلەرگە باعدارلانعان», دەدى ۇكىمەت باسشىسى.
سونىمەن قاتار رەسپۋبليكالىق بيۋدجەت جوباسىن جانە جالپى سيپاتتاعى ترانسفەرتتەردى ازىرلەۋ بارىسىندا جاڭا بيۋدجەت جانە سالىق كودەكستەرىنىڭ ەرەجەلەرى ەسكەرىلگەنى اتاپ ءوتىلدى.
