قىزىلجار اۋدانىنىڭ تۋماسى, كەڭەس وداعىنىڭ باتىرى فيليپپ چيجيكوۆ سوعىسقا 1942 جىلى 19 جاسىندا الىنعان. ارنايى اسكەري دايىندىقتان ءوتىپ, 25-ءشى ديۆيزياعا قاراستى 81-ءشى اتقىشتار پولكى قۇرامىندا بولىمشە كومانديرى بولىپ تاعايىندالعان. كىشى لەيتەنانتتار كۋرسىن بىتىرگەننەن كەيىن اتقىشتار ۆزۆودىن باسقارعان. بەلگورود, حاركوۆ, زۆەنيگورود, بۋداپەشت, ۆەنا قالالارىن جاۋدان ازات ەتۋگە قاتىسقان. قاندى شايقاستاردىڭ بىرىندە اۋىر جارالانعانىنا قاراماستان, كورسەتكەن قاھارماندىق ەرلىكتەرى ءۇشىن 1944 جىلى كەڭەس وداعىنىڭ باتىرى اتاعى بەرىلىپ, «التىن جۇلدىز» بەلگىسى مەن لەنين وردەنى تاپسىرىلعان.
مايداننان ورالعان سوڭ قىزىلجار ءوڭىرىنىڭ ىشكى ىستەر ورگاندارىندا ۇزاق جىل ءمىنسىز ەڭبەك ەتكەن. الماتى ميليتسيا مەكتەبىن ءتامامداپ, جاۋاپتى جۇمىستار اتقارعان. پودپولكوۆنيك شەنىنە دەيىن كوتەرىلگەن. قىزمەت بابىمەن رەسەيگە اۋىسىپ, ءومىرىنىڭ سوڭعى كۇندەرىن ۆورونەج وبلىسىندا وتكىزگەن.
ونىڭ قۇرمەتىنە بەرەزوۆكا اۋىلىندا ورناتىلعان وبەليسكىنىڭ اشىلۋ سالتاناتىندا وبلىس اكىمىنىڭ ءبىرىنشى ورىنباسارى ايداربەك ساپاروۆ, ىشكى ىستەر مينيسترلىگى ارداگەرلەر كەڭەسىنىڭ توراعاسى, وتستاۆكاداعى گەنەرال- مايور ومىرزاق بولسامبەكوۆ, كادرلار جۇمىستارى بويىنشا دەپارتامەنتتىڭ باسشىسى, پولكوۆنيك التىنعالي ابدىعاليەۆ, تۇمەن وبلىسىنان كەلگەن ىشكى ىستەر قىزمەتىنىڭ ارداگەرى ۆلاديمير بورەتسكي, تاعى باسقالار سويلەپ, ەسكەرتكىشكە گۇل شوقتارىن قويدى. مارقۇمنىڭ ۆورونەج قالاسىندا تۇراتىن قىزى نادەجدا لەسنىح جەڭىستىڭ 70 جىلدىعى قارساڭىندا ۇيىمداستىرىلعان ايتۋلى شاراعا دەگەن ريزاشىلىعىن, اكەسىنىڭ كوزى جۇمىلاردا قابىرىمنەن تۋعان جەرىمە ءبىر ۋىس توپىراق الا بار دەگەن اماناتىن ورىنداعانىن تولقىپ جەتكىزدى.
مەيماندار مەكتەپ جانىنداعى الاڭقايدا جەڭىس اللەياسىنىڭ ىرگەتاسىن قالاپ, كوشەتتەر وتىرعىزدى.
بۇگىندە وبلىستا مەكتەپ, كوشە باتىردىڭ ەسىمىمەن اتالادى.
ءومىر ەسقالي, «ەگەمەن قازاقستان».
سولتۇستىك قازاقستان وبلىسى, قىزىلجار اۋدانى.
