ء«بارىمىز بىلەتىندەي, قورعانىس سالاسىنا جىل سايىن ايتارلىقتاي قارجى بولىنەدى. بىراق بۇل قاراجات الدىمەن تەحنيكاعا, عيماراتتارعا ەمەس, اسكەريلەردىڭ الەۋمەتتىك جاعدايىن جاقسارتۋعا جۇمسالۋى كەرەك. سەبەبى ادامدار بولماسا, بۇكىل تەحنيكا مەن ينفراقۇرىلىمنىڭ ءمانى بولمايدى. اسكەردىڭ ايبىنى دا, قۋاتى دا ەڭ الدىمەن ادامدا. ءبىز وسىنى ۇعىنۋىمىز قاجەت», – دەدى دەپۋتات.
ونىڭ سوزىنشە, باستى باسىمدىق – اسكەري قىزمەتشىلەردىڭ الەۋمەتتىك تۇراقتىلىعى مەن لايىقتى ەڭبەكاقىسى. بۇل شارا ولاردىڭ قىزمەتكە ادالدىعىن ارتتىرىپ قانا قويماي, قازاق ارمياسىنىڭ بەدەلىن كوتەرۋگە مۇمكىندىك بەرەدى.
دەپۋتاتتىڭ ايتۋىنشا, بۇل باعىتتا ناقتى قادامدار جاسالىپ جاتىر. 2024 جىلعى 4 قاراشادا ءماجىلىس قابىرعاسىندا ارنايى زاڭ جوباسى ۇسىنىلىپ, ول 2025 جىلعى 1 شىلدەدەن باستاپ كۇشىنە ەنگەن. قۇجاتتىڭ باستى ماقساتى – تۇرعىن ءۇي تولەمدەرىنىڭ اشىقتىعىن قامتاماسىز ەتۋ.
بۇرىن مۇنداي تولەمدەر كەي جاعدايدا قولما-قول اقشاعا اينالىپ, تۇتىنۋشىلىق نەسيە جابۋعا نەمەسە جەكە شىعىندارعا جۇمسالعان. بۇل بيۋدجەت قارجىسىن ءتيىمسىز پايدالانۋعا اكەلگەن.
جاڭا زاڭعا سايكەس, تۇرعىن ءۇي تولەمدەرى تەك ءۇش باعىتتا قولدانىلماق:
- باسپانا ساتىپ الۋ (سونىڭ ىشىندە ءبولىپ تولەۋ نەمەسە يپوتەكا ارقىلى);
- تۇرعىن ءۇي جيناقتارىن تولىقتىرۋ;
- جالداۋ اقىسى.
سونىمەن بىرگە شارتتاردى ادىلەت ورگاندارىندا تىركەۋ مىندەتتەلىپ, تۋىستاردان ءۇي جالداۋعا شەكتەۋ قويىلعان.
الەۋمەتتىك ماسەلەلەر جانە شەشىمدەر
ولجاس قۇسپەكوۆتىڭ ساپارلارى كەزىندە اسكەري قالاشىقتار مەن شەكارا بەكەتتەرىندە تۇرمىس جاعدايىنىڭ السىزدىگى مەن جالاقىنىڭ تومەندىگى باستى ماسەلە ەكەنى انىقتالعان.
«اسكەريلەردىڭ باسىم بولىگى تۇراقتىلىق پەن الەۋمەتتىك كەپىلدىكتەردىڭ كۇشەيۋىن كۇتەدى. قازىرگى ءتيىمسىز الەۋمەتتىك جەڭىلدىكتەر ناقتى شىعىنداردى جاپپايدى, ال كەي قىزمەتكەرلەرگە مۇلدە قولجەتىمسىز. سوندىقتان بۇل قارجىنى بازالىق جالاقىنى كوتەرۋگە باعىتتاۋ كەرەك», – دەدى دەپۋتات.
ونىڭ پىكىرىنشە, ءتيىمدى شەشىمدەر قاتارىندا:
- ارتىق تولەمدەردى يپوتەكانى مەرزىمىنەن بۇرىن جابۋعا پايدالانۋ;
- جالاقىنى كەزەڭ-كەزەڭىمەن كوتەرۋ;
- زەينەتاقى تولەمدەرىن كۇشەيتۋ بار.
«تەك تۇرعىن ءۇي, جالاقى جانە الەۋمەتتىك پاكەت قاتار رەتتەلسە عانا ارميانىڭ قۋاتى ارتىپ, اسكەري قىزمەتشى ماماندىعىنىڭ ءيميدجى كوتەرىلەدى», – دەپ تۇيىندەدى ولجاس قۇسپەكوۆ.
