ەلىمىزدە تۇڭعىش رەت وفلاين فورماتتا ۇيىمداستىرىلعان بۇل فورۋم – ورتالىق ازيادا بۇلتتى تەحنولوگيالارعا دەگەن قىزىعۋشىلىقتىڭ وسكەنىن جانە ايماقتىق IT-قاۋىمداستىقتىڭ دامۋىن ايقىن كورسەتىپ وتىر.
فورۋمنىڭ رەسمي اشىلۋىندا ءال-فارابي اتىنداعى قازۇۋ-دىڭ عىلىمي-يننوۆاتسيالىق جۇمىس جونىندەگى پرورەكتورى مارعۇلان يبرايموۆ ءسوز سويلەپ, باستامانىڭ جاستار ءۇشىن ماڭىزىن اتاپ ءوتتى:
«بۇگىنگى جاستار – تەحنولوگيانى تۇتىنۋشى عانا ەمەس, سونىمەن قاتار ونى جاسايتىن ۇرپاق. AWS Community Day سياقتى شارالار – ستۋدەنتتەر مەن سالا ماماندارى تاجىريبە الماسىپ, قازاقستان مەن بۇكىل ورتالىق ازيانىڭ تسيفرلىق بولاشاعىن قالىپتاستىراتىن ماڭىزدى الاڭ», دەدى پرورەكتور.
ايتا كەتەيىك, بۇلتتى تەحنولوگيا – دەرەكتەردى ساقتاۋ, وڭدەۋ جانە قولدانبالاردى ىسكە قوسۋ ءۇشىن ارنايى سەرۆەرلەر مەن ينفراقۇرىلىمدى قاشىقتان پايدالانۋ ءادىسى. ياعني كومپانيالار مەن جەكە قولدانۋشىلارعا قىمبات قۇرىلعىلار ساتىپ الۋدىڭ قاجەتى جوق, ينتەرنەت ارقىلى سەرۆەرلەردىڭ قۋاتىن جالعا الىپ, قاجەتتى رەسۋرستارعا قول جەتكىزە الادى. مۇنداي ءتاسىل يكەمدىلىكتى ارتتىرىپ, شىعىندى ازايتادى ءارى كەز كەلگەن جەردەن جۇمىس ىستەۋگە مۇمكىندىك بەرەدى.
ءىس-شارانى قازاقستان, قىرعىزستان جانە وزبەكستانداعى رەسمي AWS قاۋىمداستىقتارىنىڭ جەتەكشىلەرى ۇيىمداستىردى. باعدارلامادا ناقتى جوبالار نەگىزىندە بۇلتتى شەشىمدەر جاساۋ تاجىريبەسى تالقىلانىپ, تسيفرلىق ترانسفورماتسيانىڭ وزەكتى ماسەلەلەرى قاراستىرىلدى.
قاتىسۋشىلار DevOps, ماشينالىق وقىتۋ, اۆتوماتتاندىرۋ جانە كيبەرقاۋىپسىزدىك باعىتتارىنداعى زاماناۋي تاسىلدەرمەن تانىستى. ەڭ قىزىقتى سەسسيالاردىڭ ءبىرى – ناقتى جوبالاردىڭ ارحيتەكتۋراسىن تالداۋ جانە جىبەرىلگەن قاتەلىكتەر تۋرالى اشىق پىكىرتالاستار بولدى. سونداي-اق, پراكتيكالىق شەبەرلىك ساباقتارىندا تەوريا مەن تاجىريبەنى ۇشتاستىرۋعا مۇمكىندىك بەرىلدى.
فورۋمنىڭ ەڭ ماڭىزدى بولىگى – AWS GameDay اتتى كوماندالىق جارىس. بايقاۋ بارىسىندا قاتىسۋشىلار ناقتى ومىرلىك جاعدايلارعا ۇقساس ينجەنەرلىك تاپسىرمالاردى شەشىپ, كوماندالىق جۇمىس ارقىلى بىلىمدەرىن جەتىلدىردى.
فورۋم بارىسىندا ماماندار بەلسەندى پىكىر الماسىپ, كاسىبي كەڭەستەر الىپ, جاڭا بايلانىستار ورناتتى. AWS Community Day Central Asia تەك ءبىلىم بەرۋ الاڭى عانا ەمەس, جاڭا يدەيالار مەن تەحنولوگيالىق سەرىكتەستىكتەردىڭ دۇنيەگە كەلۋ ورتالىعىنا اينالدى.
ءىس-شارا حالىقارالىق جانە جەرگىلىكتى IT-كومپانيالاردىڭ, جوعارى وقۋ ورىندارىنىڭ جانە تەحنيكالىق قاۋىمداستىقتاردىڭ قولداۋىمەن جۇزەگە استى.
