وبلىس اكىمى بەيبىت يساباەۆتىڭ ايتۋىنشا, سوڭعى ءۇش جىلدا ءبىلىم سالاسىنا بولىنگەن قارجى كولەمى ايتارلىقتاي ءوسىپ, وبلىس بيۋدجەتىنىڭ 36%-ىن قۇراعان. بۇل قاراجات ەسەبىنەن 232 اۋىل مەكتەبى جاڭارتىلىپ, 20 جاڭا ءبىلىم نىسانى اشىلعان, 22 نىسان كۇردەلى جوندەۋدەن وتكەن.
كونفەرەنتسيا بارىسىندا مەملەكەت باسشىسى قويعان بەس نەگىزگى مىندەتتى ىسكە اسىرۋعا نازار اۋدارىلدى. اتاپ ايتقاندا, پەداگوگتەردىڭ بىلىكتىلىگىن ارتتىرۋدىڭ وڭىرلىك باعدارلاماسىن ازىرلەۋ, مەكتەپكە دەيىنگى جانە باستاۋىش ءبىلىم اراسىنداعى ساباقتاستىقتى قامتاماسىز ەتۋ, اۋىل مەكتەپتەرىنىڭ الەۋەتىن كوتەرۋ, تاربيە جۇمىسىن جۇيەلەۋ جانە تسيفرلىق تەحنولوگيالاردى دامىتۋ ماسەلەلەرى قارالدى.
سونىمەن قاتار, «ادال ازامات» ءبىرتۇتاس تاربيە باعدارلاماسى تانىستىرىلىپ, وقۋشىلاردى قۇقىق بۇزۋشىلىقتان قورعاۋ, پسيحولوگيالىق قولداۋ كورسەتۋ شارالارى تالقىلاندى. بيىل 43 مەكتەپكە جوعارى جىلدامدىقتى ينتەرنەت ورناتىلىپ, 734 زاماناۋي وقۋ كابينەتى جابدىقتالعان.
– مۇعالىم ەڭبەگى – بولاشاققا جاسالعان ينۆەستيتسيا. ءار ساباق, ءار ايتىلعان جىلى ءسوز – بالانىڭ ءومىرىن وزگەرتە الادى. سوندىقتان ءبىلىم ساپاسىن ارتتىرۋ جولىندا كۇش-جىگەرىمىزدى بىرىكتىرۋىمىز كەرەك, – دەدى وبلىس اكىمى.
جيىن سوڭىندا ءبىلىم بەرۋ سالاسىنىڭ ۇزدىك جوبالارى كورمەسى ۇيىمداستىرىلىپ, ءوڭىر پەداگوگتارىنىڭ جەتىستىكتەرى تانىستىرىلدى. ايتا كەتەيىك, بۇگىندە جەتىسۋ وبلىسىندا 15 مىڭنان استام مۇعالىم ەڭبەك ەتەدى, ال سوڭعى جىلدارى 243 وقۋشى حالىقارالىق جارىستاردا جۇلدەلى ورىندارعا يە بولدى.
