بۇل مەرەكە يۋنەسكو تاراپىنان 1999 جىلعى 15 قاراشادا وتكەن باس كونفەرەنتسياسىنىڭ 30-سەسسياسىندا قابىلدانعان قارارمەن بەكىتىلدى. يۋنەسكو شەشىمىندە ايتىلعانداي, مەرەكەنى بەلگىلەۋدەگى ماقسات – «پوەتيكالىق ءوزىن-ءوزى ءبىلدىرۋ ارقىلى تىلدىك الۋاندىقتى قولداۋ جانە جويىلىپ كەتۋ قاۋپى بار تىلدەرگە ەستىلۋ مۇمكىندىگىن بەرۋ».
رەسمي پوەزيا كۇنىن بەلگىلەۋ تۋرالى العاشقى باستاما 1930-جىلداردىڭ سوڭىندا ايتىلا باستادى. 1938 جىلى اقش-تىڭ وگايو شتاتى اقىن تەسسا سۋيزي ۋەببتىڭ باستاماسىمەن 15 قازاندى — ەجەلگى ريم اقىنى ۆەرگيليدىڭ تۋعان كۇنىن — پوەزيا كۇنى دەپ جاريالادى. 1951 جىلعا قاراي بۇل كۇن اقش-تىڭ وتىز سەگىز شتاتىندا جانە مەكسيكادا مويىندالىپ, ۇلتتىق پوەزيا كۇنى رەتىندە اتالىپ ءوتتى. كەيىن بۇل كۇن باسقا ەلدەردە دە الەمدىك پوەزيا كۇنى رەتىندە تويلانا باستادى.
