فوتو: توتەنشە جاعداي مينيسترلىگى ءباسپاسوز قىزمەتى
رەسمي مالىمەتكە سۇيەنسەك, بارلىعى 333 ادام زارداپ شەككەن. سونىڭ ىشىندە 205 كاسىپكەردىڭ بانكتەر مەن شاعىن نەسيە ۇيىمدارىنا قارىزى بار ەكەن. قارىزدىڭ جالپى سوماسى از ەمەس, 2,5 ملرد تەڭگە. ونىڭ ىشىندە 2 ملرد تەڭگەسى بانكتەرگە, ال 480 ملن تەڭگەسى شاعىن نەسيە ۇيىمدارىنا تيەسىلى.
بۇل ماسەلە قوعام نازارىن اۋدارعاننان كەيىن دەپۋتاتتار قارجى نارىعىن رەتتەۋ اگەنتتىگىنە ساۋال جولدادى. جاۋاپ رەتىندە قارجى ۇيىمدارى جاعدايدى ءتۇسىنىپ, كاسىپكەرلەرگە جەڭىلدىك جاساۋعا كەلىسكەن.
ناتيجەسىندە, 78 كاسىپكەردىڭ قارىزى بويىنشا 1,8 ملرد تەڭگە التى ايعا شەگەرىلدى. ياعني, ولار وسى ۋاقىت ارالىعىندا نەسيە تولەمەيدى. بىراق ءبارى بىردەي بۇل كومەككە كەلىسە قويعان جوق. 65 كاسىپكەر جالپى سوماسى 581 ملن تەڭگە بولاتىن جەڭىلدىك شاراسىنان باس تارتقان. قالعان كاسىپكەرلەردىڭ ماسەلەسى جەكە-جەكە قارالىپ جاتىر.
ەسكە سالا كەتەيىك, «BIG شانحاي» 2014 جىلى اشىلىپ, 90-نان اسا بۋتيك جۇمىس ىستەپ تۇرعان ەدى.
