وڭىرگە ەكونوميست, زاڭگەر, ەسەپشى, پسيحولوگ, كولىك جۇرگىزۋشىسى, دەفەكتولوگ, قازاق, ورىس, اعىلشىن تىلدەرىنىڭ مۇعالىمدەرى, اسپاز, ناۋبايشى, ءجۇن سۇرىپتاۋشى, ساۋدا مەنەدجەرى قاجەت. جاستارعا ارنالعان جارمەڭكە وتكىزىلەتىنى تۋرالى الەۋمەتتىك جەلى مەن مەملەكەتتىك مەكەمەلەر سايتىنا بىرنەشە كۇن بۇرىن حابارلاندىرۋ بەرىلدى.
تۇڭعىش پرەزيدەنت اتىنداعى ساياباقتا وتكەن ءىس-شاراعا جاستاردان وزگە ءوزىن-ءوزى جۇمىسپەن قامتىپ جۇرگەن ازاماتتار, مۇمكىندىگى شەكتەۋلى جاندار, بورىشكەرلەر, پروباتسيا ەسەبىندە تۇرعاندار دا كەلدى. جۇمىس بەرۋشىلەر قاتارىندا «قازحروم» تۇك» اق, «اقتوبە مىس كومپانياسى», «اقتوبە حروم قوسىندىلارى زاۋىتى», «قازاقستاندىق مۇناي جابدىقتارىن شىعاراتىن زاۋىت», «№3 الەۋمەتتىك قىزمەت كورسەتۋ ورتالىعى» كمم, «KazFelTec» جشس, «اتامەكەن» ستۋدەنتتىك قۇرىلىس وتريادتارى بىرلەستىگى, «جاسىل ەل» جاساعى, قالاداعى №83, №59 ورتا مەكتەپ وكىلدەرى بولدى.
«بيىل اقتوبە قالاسىندا بوس جۇمىس ورىندارى جارمەڭكەسى وسىمەن جەتىنشى رەت وتكىزىلدى. سونىڭ ناتيجەسىندە 427 تۇرعىن جۇمىسقا ورنالاسسا, ونىڭ 108-ءى – جاستار. ءىس-شاراعا جۇمىس بەرۋشى مەكەمەلەر وكىلدەرى مەن جۇمىسسىز ازاماتتار كوپتەپ قاتىستى. مۇنداي ەكىجاقتى جۇزدەسۋلەر وتە ءتيىمدى. ويتكەنى ءوندىرىس ورىندارى وكىلدەرى نارىقتاعى سۇرانىسقا يە ماماندىقتار, كاسىبي بىلىكتىلىكتى كوتەرۋ, قايتا دايارلىقتان ءوتۋ, الەۋمەتتىك كومەك تۇرلەرى تۋرالى كەلۋشىلەرگە جان-جاقتى اقپارات بەرەدى. وسى جولى جاستار تاجىريبەسى, العاشقى جۇمىس ورنى, اعا ۇرپاق تاجىريبەسى سياقتى شەبەرلىك ساباقتارى دا ۇسىنىلىپ, مەملەكەتتىك قىزمەت ىستەرى اگەنتتىگىنىڭ اقتوبە وبلىسى بويىنشا دەپارتامەنتى وكىلدەرى مەملەكەتتىك قىزمەتشى بولۋعا ىنتالانعان جاستارعا اقپاراتتىق-ءتۇسىندىرۋ جۇمىستارىن جۇرگىزدى», دەيدى اقتوبە قالاسى مانساپ ورتالىعى فيليالىنىڭ ديرەكتورى اينا مىرزاتاەۆا».
ايتا كەتۋ كەرەك, جۇمىسشى ماماندىقتار جىلى اياسىندا اقتوبە قالاسىندا تۇراقتى جۇمىسقا 1473 جاس ورنالاستى. سونىڭ ىشىندە, الەۋمەتتىك جۇمىس ورىندارىنا 37, جاستار تاجىريبەسىنە – 122, قوعامدىق جۇمىسقا – 116, العاشقى جۇمىس ورنىنا – 16, تالىمگەرلىك باعىتىمەن اعا بۋىننىڭ جاس ماماندى ۇيرەتۋ جوباسىنا 4 ادام قاتىستى. «باستاۋ-بيزنەس» جوباسىمەن كاسىپكەرلىك نەگىزدەرىن 420 ادام وقىسا, ەلەكتروندى ەڭبەك بيرجاسى ارقىلى ونلاين وقۋعا 338 جاس ازامات تارتىلدى. 46 جۇمىسسىز جاس مەملەكەتتىك قايتارىمسىز گرانتقا قول جەتكىزىپ, كاسىپ باستادى».
قازىردە اقتوبە قالاسى بويىنشا ەلەكتروندى ەڭبەك بيرجاسى پورتالىندا 2041 بوس جۇمىس ورنى جاريالانعان.
اقتوبە وبلىسى
