فوتو: pixabay.com
مالىمەتكە سۇيەنسەك, قايتارىلعان اكتيۆتەر جونىندەگى كوميتەت 2025 جىلى ەل بيۋدجەتىنە 354 ميلليارد تەڭگەدەن استام قارجى قايتاردى. بۇل قاراجات الەۋمەتتىك ماقساتتارعا باعىتتالىپ, ەلدە 400-دەن استام جاڭا نىسان – مەكتەپتەر, اۋرۋحانالار جانە باسقا دا ماڭىزدى ينفراقۇرىلىمدار سالۋعا جۇمسالادى.
حالىقارالىق ىنتىماقتاستىق سالاسىندا بىرقاتار ماڭىزدى كەلىسىمدەر راتيفيكاتسيالاندى. اتاپ ايتقاندا, كاتارمەن قىلمىستىق ىستەر بويىنشا ەكستراديتسيا جانە قۇقىقتىق كومەك تۋرالى كەلىسىمدەر بەكىتىلدى. سونداي-اق كيپرمەن سوتتالعان ادامداردى بەرۋ تۋرالى كەلىسىم كۇشىنە ەندى.
ماڭىزدى قادامداردىڭ ءبىرى – 2025 جىلدىڭ ماۋسىمىندا ەۋروپا كەڭەسىنىڭ مينيسترلەر كوميتەتى قازاقستاننىڭ قىلمىستىق ىستەر بويىنشا ءوزارا قۇقىقتىق كومەك تۋرالى كونۆەنتسياعا قوسىلۋ ءوتىنىشىن ءبىراۋىزدان قولدادى. بۇل قۇجاتقا قوسىلۋ قازاقستانعا 46 ەۋروپالىق ەلدەن قىلمىستىق ىستەر بويىنشا دالەلدەر مەن دەرەكتەردى تىكەلەي الۋ قۇقىعىن بەرەدى.
ساراپشىلاردىڭ پىكىرىنشە, بۇل باستاما حالىقارالىق قىلمىستارمەن كۇرەستى كۇشەيتىپ, شەتەلدە جاسىرىلعان اكتيۆتەردى قايتارۋ پروتسەسىن جەدەلدەتەدى.
