اعارتۋشىلىق باستاما اياسىنداعى ءىس-شارالاردىڭ العاشقىسىندا كىتاپحانا ديرەكتورى جانات سادىبەكقىزى ونكۇندىك – اقىن مۇراسىن تەرەڭ تانىپ, سانامىزعا ءسىڭىرۋ جولىنداعى ماڭىزدى مادەني وقيعا ەكەنىن قاپەرلەدى. تۇركىستان قالالىق مادەنيەت ءۇيىنىڭ انشىلەرى ابايدىڭ اندەرىن ورىنداپ, «اكا» شىعارماشىلىق ورتالىعىنىڭ اكتەرلىك ۇيىرمە مۇشەلەرى «بالا اباي» ساحنالىق قويىلىمىن كورەرمەن نازارىنا ۇسىندى. بالالار مەن جاسوسپىرىمدەر كوركەمسوز وقۋ ۇيىرمەسىنىڭ وقۋشىلارى جانە ۇلتتىق ۇلان 5574 اسكەري ءبولىمىنىڭ ساربازدارى اقىننىڭ ولەڭدەرىن وقىپ, كوپشىلىكتىڭ ىقىلاسىنا بولەندى. سونداي-اق ونكۇندىك اياسىندا «اباي دانالىعى – حالىق مۇراسى» تاقىرىبىندا وتكەن عىلىمي كونفەرەنتسيادا ابايتانۋشى, فيلولوگيا عىلىمدارىنىڭ كانديداتى, دوتسەنت م.ءالىپحان, فيلوسوفيا عىلىمدارىنىڭ دوكتورى, پروفەسسور د.كەنجەتاي, وبلىستىق ارداگەرلەر كەڭەسى, «ازىرەت سۇلتان» ۇلتتىق تاريحي-مادەني قورىق-مۋزەيى وكىلدەرى ۇلى ويشىلدىڭ ادەبي جانە فيلوسوفيالىق مۇراسىنا تەرەڭ ءۇڭىلىپ, اباي ءىلىمىنىڭ قازىرگى قوعامداعى وزەكتىلىگى مەن ماڭىزىن اتاپ ءوتتى. عىلىمي تۇجىرىمدار مەن تىڭ يدەيالار ايتىلدى.
«ابايدىڭ ءسوزى – قازاقتىڭ بويتۇمارى» اتتى ادەبي كەش تە اسەرلى ءوتتى. «اباي جولى» دەرەكتى ءفيلمىنىڭ كورسەتىلىمىمەن اشىلعان ادەبي كەشتە اقىننىڭ ونەگەلى قارا سوزدەرى, دانالىققا تولى ولەڭدەرى وقىلىپ, اندەرى ورىندالدى. ابايدىڭ «كوزىمنىڭ قاراسى», «جەلسىز تۇندە جارىق اي», «سەگىز اياق» سىندى سىرلى سازعا تولى اسەم اندەرى «كوزىمنىڭ قاراسى» اتتى ءان كەشىندە دە شىرقالدى. ال ونكۇندىك اياسىندا وتكەن «اباي – قازاقتىڭ رۋحاني ۇستازى» اتتى وقىرمان اۋديتورياسىمەن كەزدەسۋدە ۇلى ويشىلدىڭ ءومىر جولى, شىعارماشىلىق مۇراسى مەن فيلوسوفيالىق تۇجىرىمدارى جايىندا دەرەكتەر كەلتىرىلىپ, قارا سوزدەرى مەن ولەڭدەرىنەن ۇزىندىلەر وقىلدى.
تۇركىستان وبلىسى
