تالدىقورعاندا مۇقاعالي ماقاتاەۆ اتىنداعى ءمۇشايرا ءوتتى

تالدىقورعان. 7 مامىر. قالادا وسىمەن بەسىنشى رەت «پوەزيا مەنىمەن ەگىز بە ەدىڭ» اتتى مۇقاعالي ماقاتاەۆ اتىنداعى ءداستۇرلى رەسپۋبليكالىق جازبا اقىندار ءمۇشايراسى  بولىپ  ءوتتى. بۇل تۋرالى egemen.kz ءتىلشىسى حابارلادى. ءمۇشايرانى الماتى وبلىسى اكىمىنىڭ ءبىرىنشى ورىنباسارى ماحابات بيگەلديەۆ اشىپ, قۇتتىقتاۋ ءسوز سويلەدى. ماقساتى - مەملەكەتتىك ءتىلىمىزدىڭ مارتەبەسىن ارتتىرۋ بولعاندىقتان وبلىس اكىمىنىڭ ارنايى جۇلدەسى تاعايىندالىپتى. پوەزيا الەمىندە وزىندىك قولتاڭباسى بار مۇقاعالي ماقاتاەۆ – قاسيەتتى ءحانتاڭىرىنىڭ ەتەگىندەگى قاراساز اۋىلىندا تۋىپ, قازاق پوەزياسىنىڭ اسقار شىڭىنا شىققان دارا تۇلعا. اقىننىڭ ولەڭدەرىن وقىمايتىن قازاق كەمدە-كەم. اقيىق اقىننىڭ شىعارمالارى ارقىلى مەملەكەتتىك ءتىلدىڭ مارتەبەسىن كوتەرۋ, جاستاردى ادەبي شەبەرلىككە باۋلۋ, جاس تالانتتى اقىنداردى تانۋ ماقساتىنداعى بۇل شارانىڭ ماڭىزى وتە زور. بۇل   بايقاۋدا وزگە وبلىستاردان - 17, جەتىسۋ جەرىنەن - 3 ۇمىتكەر, بارلىعى 20 جاس اقىن ءوز باعىن سىنادى. ونەرگە قاشاندا قۇرمەت كورسەتۋدەن تانبايتىن قازاق اقىنداردىڭ ولەڭ وقۋ شەبەرلىگىن باعامداپ قانا قويماي سول جاس اقىنداردىڭ مۇقاعالي ارۋاعىنا باس ءيىپ, ءتاۋ ەتىپ, رۋح الا جۇلقىنا ولەڭ وقۋعا دەگەن ۇمتىلىسىنا ەرەكشە ءىلتيپات تانىتا ءبىلدى. ال پوەزيا ءتىلىن جەتىك مەڭگەرگەن «مۇقاعالي» جۋرنالىنىڭ باس رەداكتورى باتىق ماجيت ۇلىمەن رەسپۋبليكامىزعا تانىمال اقىن - الماتى وبلىستىق تىلدەردى دامىتۋ جونىندەگى   باسقارماسىنىڭ باستىعى احمەت كەندىربەك ۇلى باستاعان تورەشىلەر ءوز باعالارىن بەردى. ءجون. ويتكەنى, بۇل باسەكە. بىرەۋ جەڭىپ, ەكىنشىلەر ءوز وسالدىعىن مويىنداۋى شارت. بىلە بىلسەك, بۇل پوەزيانىڭ ءبىر ەرەكشەلىگى. سونىمەن, اقىن, قازاقستان جازۋشىلار وداعى باسقارماسى توراعاسىنىڭ ورىنباسارى, مەملەكەتتىك «دارىن» جاستار سىيلىعىنىڭ لاۋرەاتى, قازىلار القاسىنىڭ توراعاسى جاناربەك ءاشىمجان «پوەزيا, مەنىمەن ەگىز بە ەدىڭ؟» اتتى جازبا اقىندار ءمۇشايراسىنىڭ باس جۇلدەسىن الماتى قالاسىنان كەلىپ جىر دوداسىن جارىپ شىققان شەرحان تالاپقا تاپسىردى. بايقاۋ جەڭىمپازدارىنا ديپلومدار, قارجىلاي سىيلىقتار جانە مۇشايراعا قاتىسۋشىلاردىڭ بارلىعىنا العىس حاتتار بەرىلدى. تاعى ءبىر كوزايىم حابار 2011-2015 جىلدار ارالىعىندا وتكەن رەسپۋبليكالىق مۇشايرالارعا قاتىسقان اقىندار ولەڭى توپتاستىرىلىپ, كىتاپ شىعاتىن بولادى. نۇربول الدىباەۆ. دەرەك, سۋرەت: egemen.kz