لاگەردىڭ العاشقى كۇنى مارتوك اۋدانىنا ارنالدى. اقتوبە قالاسىنان ارنايى اۆتوبۋسپەن جولعا شىققان بالالار ەڭ الدىمەن قازاقستان-رەسەي شەكاراسىنداعى «جايساڭ» وتكىزۋ بەكەتىنە ايالدادى. مۇندا بالالار شەكاراشىلاردىڭ جۇمىسىن سىرتتاي باقىلاپ, وتكىزۋ بەكەتىندەگى جولاۋشىلاردىڭ قۇجاتتارىن تەكسەرۋ ءتارتىبىن كورىپ, مەملەكەتتىك شەكارا قىزمەتىنىڭ ماڭىزدىلىعىن ۇعىندى. وسىدان كەيىن مارتوك اۋداندىق توتەنشە جاعدايلار ءبولىمىنىڭ عيماراتىنا كەلىپ, قاۋىپسىزدىك ەرەجەسىن ساقتاۋ شارالارى جونىندە قىزمەتكەرلەردىڭ ءدارىسىن تىڭدادى. بۇل جەردە ءاربىر ادامنىڭ قاراپايىم تۇرمىستىق ەرەجەلەردى ساقتاۋ ماڭىزدىلىعى ءتۇسىندىرىلدى. سونىڭ ىشىندە جازعى ورتتەردىڭ تۇتانۋ سەبەپتەرىنە قاتىستى مول ماعلۇمات بەرىلدى. ساپار مارال وسىرەتىن ء«زارۋ» شارۋاشىلىعىنا جالعاستى. مۇندا مارال ءمۇيىزىنىڭ قاسيەتتەرى ءتۇسىندىرىلىپ, پانتوورتالىقتا وڭىردەگى ەمدىك ءتۋريزمنىڭ دامۋى جونىندە ءدارىس تىڭدالدى. كەشكىسىن لاگەر قاتىسۋشىلارى «كازانكا» سۋقويماسى جاعالاۋىندا تىنىعىپ, تابيعات اياسىندا ۋاقىت وتكىزدى. بۇل – دەمالىس ءساتى عانا ەمەس, سونىمەن بىرگە العان اقپاراتتاردى ەسكە ءتۇسىرىپ, ءوزارا وي بولىسەتىن الاڭ بولدى. مارتوك اۋدانىنا ساپار «ايس» ءسۇت تاۋارلى فەرماسىنداعى شارۋاشىلىقتىڭ جۇمىسىمەن تانىسۋمەن اياقتالدى.
كەلەسى كۇن بالالار قارعالى اۋدانىنا ساپارعا شىقتى. ولار قارعالى وزەنىنىڭ بويىندا ورنالاسقان «Trout Kargaly» فورەل وسىرەتىن شارۋاشىلىقتا بولىپ, اۋىل كاسىپكەرلىگىنىڭ دامۋ بارىسىمەن تانىستى. اسەم تابيعات اياسىندا جاستاردىڭ ءبىر توبى «IQ جورىققا» ينتەللەكتۋالدى ويىنىنا قاتىسسا, ەكىنشى توبى وزەن جاعاسىندا سۋرەت سالۋمەن شۇعىلداندى. ءۇش كۇندىك ساپاردىڭ قورىتىندىسى اقتوبە قالاسىنداعى «سولنەچنىي» دەمالىس بازاسىندا جالعاستى. بۇل جەردە وبلىستىق پروكۋراتۋرا مەن ىشكى ىستەر ورگاندارىنىڭ قىزمەتكەرلەرى جاسوسپىرىمدەرگە قۇقىقتىق مادەنيەتتى ساقتاۋ, زاڭ الدىنداعى جاۋاپكەرشىلىك, ماماندىق تاڭداۋعا قاتىستى كەڭەستەر بەرىپ, ولاردى تولعاندىرعان ساۋالدارعا جاۋاپ بەردى. كەزدەسۋ سوڭى ارنايى پوليتسيا جاساعى جاۋىنگەرلەرىنىڭ جاتتىعۋىمەن قورىتىندىلاندى. بالالار ارنايى جاساق جاۋىنگەرى بولۋ ءۇشىن قانداي داعدىلاردى مەڭگەرۋ قاجەتتىگى جونىندە كوپ سۇراق قويدى.
ء«ۇش كۇنگە سوزىلعان «Aqtobe camp-2025» جوباسى ۇلكەن ومىرگە قادام باسقان جاستىڭ ومىرلىك داعدىلارىن قالىپتاستىرۋعا ىقپال ەتكەن ءىس-شارا بولدى. بالالار تابيعات اياسىندا ساياحاتتاي ءجۇرىپ, ءتارتىپ پەن تاربيە, قورشاعان ورتاعا دەگەن جاۋاپكەرشىلىك, قۇقىقتىق مادەنيەت تۋرالى كەڭەستەر الدى. ءتۇرلى كاسىپ يەلەرىمەن وتكەن ءاربىر كەزدەسۋ جاسوسپىرىمدەردىڭ بولاشاقتاعى ماماندىق تاڭداۋىنا جول اشادى دەپ ويلايمىن. بۇل جاعىنان مەملەكەت باسشىسى قاسىم-جومارت توقاەۆتىڭ ۇلتتىق قۇرىلتاي جيىنىندا «جاستارعا ۇلتتىق قۇندىلىقتاردى دارىپتەپ, ولارعا دۇرىس باعىت-باعدار بەرۋ – ەل بولاشاعى ءۇشىن اسا ماڭىزدى. قۇقىق بۇزۋشىلىقپەن كۇرەس تەك جازالاۋمەن ەمەس, تاربيەمەن, تۇسىندىرۋمەن باستالۋى قاجەت», دەگەن ۇستانىمىن نازارعا الا وتىرىپ, وسى باعىتتا جاستار اراسىنداعى جۇمىستاردى كۇشەيتكەن ءجون. تامىزدىڭ تاماشا كۇندەرى ەلۋ بالاعا وسىنداي قۋانىش سىيلادى. الداعى ۋاقىتتا جاسوسپىرىمدەرگە ارنالعان جازعى لاگەر جۇمىسىن وسىنداي باعىتتا جانداندىرساق دەگەن ويدامىز. جاستارىمىز تۋعان جەردىڭ تابيعاتىن ايالاۋ, ادال ەڭبەك ەتۋ, ۇناتقان ماماندىعىڭمەن ەلگە پايدا تيگىزۋ سياقتى قاعيداتتاردى باسشىلىققا السا, سانالى ۇرپاق قالىپتاستىرۋداعى مەملەكەتتىك ساياساتتىڭ باعدارى دۇرىس بولىپ جاتقانىن كورسەتەدى», دەيدى وبلىستىق جاستار ساياساتى ماسەلەلەرى باسقارماسىنىڭ باسشىسى الىمبەك تۇراليەۆ.
اقتوبە وبلىسى
