وسى ساپاردا سۋرەتشىلەر وداعىنىڭ مۇشەسى, كوركەمسۋرەت اكادەمياسىنىڭ مۇشە كوررەسپوندەنتى, تانىمال ءمۇسىنشى ەرعالي بەكەشەۆ تەڭىز جاعاسىنداعى قالاعا بيىكتىگى 3 مەتر, ەنى 2 مەترگە جۋىقتايتىن قوبىز ءمۇسىنىن جاساپ اپارىپ, ماڭعىستاۋ جۇرتىنا سىيعا تارتىپتى.
– ونەر جولىندا جۇرگەن سوڭ ءوز حالقىمىزدىڭ سالت-ءداستۇرىن, بولمىسىن بەينەلەيتىن دۇنيەلەردى جاساعاندى ۇناتامىن. ءوزىم نەگىزىنەن توت باسپايتىن مەتالمەن جۇمىس ىستەيمىن. بۇعان دەيىن دە قوبىز اسپابى بىرنەشە شىعارماما وزەك بولعان ەدى. وسى جۇمىسىما – «اقنار» دەپ ات قويدىم. جالپى قوبىز – تەك قازاقتىڭ ەمەس, ادامزاتتىڭ كونە اسپاپتارىنىڭ ءبىرى. داۋىسى ەرەكشە, تىلسىمعا تولى. اتىراۋدا اقنار تاتتىبايقىزى ەسىمدى قوبىزشى رەسەيدىڭ التاي ولكەسىنە بارىپ, قوبىز تارتقاندا, كۇيگە بالقىعان حالىقتىڭ كوزىنە جاس العانىن ايتىپ ەدى. شىنىمەن دە قوبىزدىڭ اينالاسىندا ميستيكالىق وقيعا كوپ. قوبىزىن بايگەگە قوساتىن قويلىباي باقسىنىڭ اڭگىمەسى نەگە تۇرادى؟ – دەيدى ەرعالي ورىنعالي ۇلى.
ەرعالي بەكەشەۆ بيىل جازدا لوندونعا, «Golden Time Talent» اتتى حالىقارالىق ونەر فەستيۆالىنە دە قاتىستى. فەستيۆالدىڭ ونلاين كەزەڭىندە «الدار كوسە» اتتى مۇسىنىمەن ءبىرىنشى ورىندى يەلەنىپ, لوندونعا شاقىرتۋ العان شەبەر تەمىر مەن تابيعي تاستان جاسالعان «تاباندىلىق» اتتى جۇمىسىمەن حالىقارالىق فەستيۆالدىڭ جەتى جۇلدەسىنىڭ ءبىرىن الىپ قايتقان ەدى.
بۇدان بولەك ەرعالي بەكەشەۆ – استانا قالاسىنداعى «استانانىڭ قۇرداسى», ورال قالاسىنداعى «ارمان قۇسى», «نازىكتىك», «دومبىرا», اقتوبەدەگى «نارىن», اقساي قالاسىنداعى «سۋرەتشىنىڭ الەمى» سىندى مۇسىندەردىڭ اۆتورى. سۋرەتشىنىڭ تاعى ءبىر جۇمىسى – «حان تاعى» ورال قالاسىنداعى حان توعايىنا ورناتىلماق بولىپ جاسالعان ەدى. بىراق ءتۇرلى كەدەرگىلەردىڭ كەسىرىنەن ءالى ورنىن تاپپاي تۇر.
باتىس قازاقستان وبلىسى
