بۇگىندە شاھار اۋماعىندا ەكى نەگىزگى رەكرەاتسيالىق ايماق جۇمىس ىستەيدى: الماتى جانە سولتۇستىك جاعالاۋى. الماتى جاعالاۋىندا ءىرى قوناق ءۇي كەشەندەرى مەن جەكە جاعاجايلار ورنالاسسا, سولتۇستىك بولىگى زاماناۋي ينفراقۇرىلىمى بار قولجەتىمدى قوعامدىق ايماق رەتىندە دامىپ كەلەدى.
نەگىزگى جۇكتەمە اباتتاندىرىلعان №5, №6 جانە №7 جاعاجايلارعا ءتۇستى. مۇندا سانيتارلىق جانە سەرۆيستىك تالاپتارعا ساي جاعداي جاسالعان. اتار بولساق, 75 اجەتحانا, 170-تەن استام قوقىس جاشىگى مەن كونتەينەر ورناتىلىپ, قۇتقارۋشىلار, مەديتسينا جانە تەحنيكالىق قىزمەتكەرلەر كەزەكشىلىك ەتەدى.
№5 جاعاجايدا كۇن سايىن 20 قىزمەتكەر جۇمىس ىستەيدى, دەمالىس كۇندەرى مۇندا 2,5 تونناعا دەيىن قوقىس شىعارىلادى. ال №6 جانە №7 جاعاجايلارىندا 10 قۇتقارۋشى مەن مەديتسينا قىزمەتكەرىن قوسا ەسەپتەگەندە 30 قىزمەتكەر بار, دەمالۋشىلار كوپ كۇندەرى شىعارىلاتىن قوقىس كولەمى 3 تونناعا جەتەدى.
قاۋىپسىزدىكتى باقىلاۋ ءۇشىن جاساندى ينتەللەكت نەگىزىندەگى بەيناباقىلاۋ جۇيەلەرى ورناتىلعان. جاعاجايداعى جالپى جاعدايلى پوليتسيا, توتەنشە جاعدايلار قىزمەتى جانە جەكە كۇزەت مەكەمەلەرى قاداعالايدى.
اكىمدىك دەرەگىنشە, جازاتايىم وقيعالاردىڭ كوپشىلىگى رۇقسات ەتىلمەگەن ورىنداردا ورىن الادى. سوندىقتان تۇرعىندار مەن قوناقتارعا تەك رەسمي بەكىتىلگەن جاعاجايلاردا دەمالۋعا كەڭەس بەرىلەدى.
قالادا 140-قا جۋىق تۋريستىك نىسان جۇمىس ىستەپ تۇر. ماۋسىم اياقتالعاننان كەيىن №6 جانە №7 جاعاجايلارىن قايتا جاڭعىرتۋ جانە جەكە ينۆەستيتسيا ەسەبىنەن №8 جاعاجايدى اباتتاندىرۋ جۇمىستارى باستالادى. جالپى جاعالاۋ ۇزىندىعى 6,1 شاقىرىمدى قۇراپ, بىرىڭعاي ساۋلەتتىك جوسپارعا ساي جاسالادى دەپ جوسپارلانۋدا.
سونداي-اق 2028 جىلعا دەيىن قوناەۆتا جالپى قۇنى 300 ميلليارد تەڭگەدەن اساتىن 11 ءىرى تۋريستىك جوبانى ىسكە اسىرۋ كوزدەلگەن. ولاردىڭ قاتارىندا قوناق ءۇي كەشەندەرى, ويىن-ساۋىق ورتالىقتارى, گولف-كلۋبتار مەن وتباسىلىق دەمالىس ورىندارى بار.
قوناەۆ قالاسىنىڭ اكىمدىگى زاماناۋي, قاۋىپسىز جانە قولجەتىمدى تۋريستىك ورتانى دامىتۋ – شاھاردى وركەندەتۋدىڭ نەگىزگى باعىتتارىنىڭ ءبىرى ەكەنىن اتاپ ءوتتى.الماتى وبلىسى.
