شاعىن اۋىل تۇرعىندارىنىڭ شاتتىعىنا باتىس قازاقستان وبلىسىنىڭ اكىمى ناريمان تورەعاليەۆ پەن وبلىستىق دەنساۋلىق ساقتاۋ باسقارماسىنىڭ باسشىسى ماديار وتەشوۆ ارنايى كەلىپ قاتىستى. سالتاناتتى جيىندا وبلىس اكىمى اۋىل تۇرعىندارىن مەديتسينالىق نىساننىڭ اشىلۋىمەن قۇتتىقتادى.
– پرەزيدەنت قاسىم-جومارت توقاەۆ قازاقستان حالقىنا ارناعان جولداۋىندا «ەلىمىزدىڭ باستى قۇندىلىعى – ادام. ۇلت دەنساۋلىعى جاقسى بولسا عانا, قوعام ورنىقتى داميدى» دەپ اتاپ ءوتتى. شاعىرلىوي اۋىلىندا جاڭا فەلدشەرلىك-اكۋشەرلىك پۋنكتتىڭ اشىلۋى – بارشامىز ءۇشىن قۋانىشتى وقيعا. ەندى اۋىل تۇرعىندارى ساپالى ءارى ۋاقتىلى مەديتسينالىق كومەككە قول جەتكىزە الادى. نىسان انالار مەن بالالاردىڭ, جالپى اۋىل تۇرعىندارىنىڭ ساۋلىعىن نىعايتۋعا ءوز ۇلەسىن قوسادى دەپ سەنەمىن, – دەدى ءوڭىر باسشىسى.
مەديتسينالىق مەكەمە مەملەكەت باسشىسىنىڭ تاپسىرماسىنا سايكەس, اۋىل تۇرعىندارىنىڭ ءومىر ساپاسىن جاقسارتۋعا باعىتتالعان «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا جۇزەگە اسىپ وتىر. جالپى اۋماعى 260 شارشى مەتردەن اساتىن جاڭا نىسان زاماناۋي مەديتسينالىق قۇرال-جابدىقتارمەن جابدىقتالعان. مۇندا كۇنىنە 40 ادام دارىگەر كومەگىنە جۇگىنە الادى. فەلدشەرلىك پۋنكتتە اۋىلدىڭ 4 تۇرعىنى تۇراقتى جۇمىس ىستەيدى.
– بۇرىن باس اۋىرىپ, بالتىرىمىز سىزداسا اۋدان ورتالىعىنا, ءتىپتى وبلىسقا بارۋعا تۋرا كەلەتىن. ەندى دارىگەرگە جۇگىنۋ جەڭىلدەدى. جاڭا عيمارات جارىق, كەڭ, حالىققا بارلىق جاعداي جاسالعان ەكەن. وسىنداي قامقورلىعى ءۇشىن مەملەكەت باسشىسىنا العىسىمىز شەكسىز, – دەيدى اۋىل ارداگەرى ساعيدوقاس باقتىعاليەۆ.
جالپى, باتىس قازاقستان وبلىسىنىڭ اۋىلدارىندا مەديتسينالىق ينفراقۇرىلىمدى دامىتۋعا باعىتتالعان جۇمىس جۇيەلى ءجۇرىپ جاتىر. جاقىندا عانا اقجايىق اۋدانىنا قاراستى بازارشولان اۋىلىنىڭ تۇرعىندارى دا ءدال وسىنداي قۋانىشتى باستان كەشتى. مۇنداي نىساندار شالعاي اۋىل تۇرعىندارىنىڭ ءومىر ساپاسىن جاقسارتۋعا, دەنساۋلىق ساقتاۋ قولجەتىمدىلىگىن قامتاماسىز ەتۋگە سەپ بولارى انىق.
باتىس قازاقستان وبلىسى
