قوستاناي. 17 اقپان. قوستانايداعى №6697 اسكەري بولىمشە 1941 جىلى 15 جەلتوقساندا اقمولا قالاسىندا (قازىرگى استانا قالاسى) قۇرىلعان جانە ماسكەۋدەن بەرلينگە دەيىنگى جاۋىنگەرلىك جولدان وتكەن 72-ءشى گۆارديالىق اتقىشتار ديۆيزياسىنىڭ جاۋىنگەرلىك تۋ كوشىرمەسىن پەتروپاۆلدىقتاردان سالتاناتتى تۇردە قابىلداپ الدى. بۇل تۋرالى egemen.kz ءتىلشىسى حابارلادى.
72-ءشى گۆارديالىق اتقىشتار ديۆيزياسىنىڭ جاۋىنگەرلىك تۋ كوشىرمەسىن استانا قالاسىنىڭ جاۋىنگەر ينتەرناتسيوناليستەرى ماسكەۋ قالاسىنان ەلگە جەتكىزىپ, قازاقستان رەسپۋبليكاسى ۇلتتىق ۇلانىنىڭ 5573-اسكەري بولىمىنە (استانا ق) ماڭگىلىك ساقتاۋعا تاپسىرعان بولاتىن. تۋدى قوستانايدا قابىلداپ الۋ سالتاناتىنا جاستار, وقۋشىلار, ستۋدەنتتەر جانە ۇلى وتان سوعىسىنىڭ , اۋعان سوعىسىنىڭ جانە تىل ارداگەرلەرى قاتىستى. 1941 جىلى مەكتەپتى بىتىرگەن بوزبالالار سوڭعى قوڭىراۋدى وتكىزە سالىپ, تاڭەرتەڭ مايدانعا اتتانعان بولاتىن. سوعىستىڭ الدىڭعى لەگىندە كەتكەن ءار ءۇش بوزبالانىڭ ەلگە بىرەۋى عانا ورالدى. اسكەري بولىمشەنىڭ ساربازدارى قويعان تەاترلاندىرىلعان كورىنىستەن ۇلى وتان سوعىسىنىڭ ارداگەرلەرى وزدەرىنىڭ جاستىق شاعى تۋرا كەلگەن سۇراپىل جىلداردىڭ بەينەسىن تانىپ, ونى جىلاپ وتىرىپ قارادى.
ۇلتتىق ۇلاننىڭ «ورتالىق» وڭىرلىك قولباسشىلىعى قولباسشىسىنىڭ تاربيە جانە الەۋمەتتىك قۇقىقتىق جۇمىستار جونىندەگى ورىنباسارى, پولكوۆنيك مۇرات اتىبيەۆ: « ۇلى وتان سوعىسىنىڭ تاريحىن بۇگىنگى جاستار ءبىلۋى ءتيىس. 72-ءشى اتقىشتار ديۆيزياسى سوعىستاعى ەرلىك ۇلگىسىنىڭ ءبىرى. سوعىس تاريحىن ءبىلۋ جاس ۇرپاقتى پاتريوتتتىققا, وتانسۇيگىشتىككە تاربيەلەيدى. اعا ۇرپاق ەرلىگىن قۇرمەتتەيمىز», دەدى. جاۋىنگەرلىك تۋ ەستافەتاسىنىڭ سالتاناتىندا سوعىس ارداگەرلەرى ميحايل پودولياكوۆ, يۆان كوتەلەۆسكي, تىل ارداگەرى تىلەۋبەرگەن اليەۆ تەبىرەنە سويلەدى.
قوستانايلىقتار قابىلداپ العان 72-ءشى گۆارديالىق اتقىشتار ديۆيزياسىنىڭ جاۋىنگەرلىك تۋ كوشىرمەسىن بۇگىن اقتوبەگە الىپ كەتتى. وندا «ءبىز – جەڭىس مۇراگەرلەرىمىز!» ەستافەتاسى جالعاسىن تاۋىپ, تۋ كوشىرمەسىن اقتوبەلىكتەر قوستانايلىقتاردان قابىلداپ الادى.
ءنازيرا جارىمبەتوۆا.
دەرەك, سۋرەت: egemen.kz.
