اتىراۋداعى جۇمىسسىزدار ءتۇرلى قوعامدىق جۇمىسقا تارتىلدى

اتىراۋ. 17 اقپان. اتىراۋ وبلىسىندا جەرگىلىكتى بيۋدجەتتەن قارجىلاندىرىلاتىن قاراجات ەسەبىنەن اقىلى قوعامدىق جۇمىستاردىڭ تۇرلەرى كوبەيدى. بۇل تۋرالى egemen.kz ءتىلشىسى حابارلادى. «مۇنداي اقىلى قوعامدىق جۇمىستىڭ تۇرلەرى بىلتىر 26-عا جەتىپ, وعان 5990 جۇمىسسىز ادام جىبەرىلدى. وسى جۇمىستارعا كوبىنەسە اۋىلدىق جەرلەردەگى ايەلدەردىڭ بەلسەندىلىگى ارتا تۇسۋدە. قوعامدىق جۇمىستار شابارمان, گازەت تاراتۋشى, سۋ, گاز, جارىق, سالىق اگەنتتەرى, ءىس-جۇرگىزۋشى, ەسەپشى مەن تاربيەشىنىڭ كومەكشىسى, مادەنيەت قىزمەتتەرى, اسكەرگە شاقىرۋ قاعازىن تاراتۋشى, جالعىزباستى جانە قارتتارعا كومەكشى باعىتتارى بويىنشا ۇيىمداستىرىلدى. نىسانالى توپتاعى ادامدار ءۇشىن (29 جاسقا دەيىنگى جاستار, كوپ بالالى انالار, مۇگەدەك, جەتىم, ورالمان, جازاسىن وتەپ شىققاندار, از قامتىلعان, جۇمىستان قىسقارعاندار, 50 جاستان اسقاندار) ۇيىمداستىرىلعان الەۋمەتتىك جۇمىستارعا 638 ادام ورنالاستىرىلدى. ونىڭ ىشىندە 485-ءى «جۇمىسپەن قامتۋ –2020» باعدارلاماسى شەڭبەرىندە جۇمىس تاپتى» دەپ ءمالىم ەتتى وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى باستىعىنىڭ ورىنباسارى كوڭىلقوس ورىسباەۆ. جۇمىسسىز كادرلاردى ەڭبەك نارىعىندا باسەكەگە قابىلەتتى دەڭگەيىنە جەتكىزۋگە دە باسا كوڭىل بولىنۋدە. وسى باعىتتا ىشكى ەڭبەك نارىعىنا قاجەتتى ماماندىقتار بويىنشا وقىتۋ كۋرستارى وتكىزىلىپ كەلەدى. كاسىبي وقىتۋ كۋرستارىنا 1 309 جۇمىسسىز جىبەرىلدى. بىلتىر الدىڭعى جىلدارى وقۋعا جىبەرىلگەندەردى قوسا ەسەپتەگەندە 1 163 ادام كاسىبي وقىتۋ كۋرستارىن ءبىتىرىپ, ونىڭ 637-ءى جۇمىسپەن قامتىلدى. قىسقا مەرزىمدى كۋرستار 24 كاسىپتىك كوللەدجدەر مەن مەملەكەتتىك ەمەس وقۋ ورتالىقتارىندا 45 ماماندىق بويىنشا مامانداردى قايتا دايارلاۋدى ۇيىمداستىرۋ ءۇشىن جۇزەگە اسىرىلدى. سونىمەن بىرگە,  جۇمىس بەرۋشىلەردىڭ قاتىسۋىمەن وتكىزىلگەن 81 بوس جۇمىس ورىندارىنىڭ جارمەڭكەلەرنە 4 671 ادام قاتىستى. سونىڭ ناتيجەسىندە 1 443 ادام تۇراقتى جۇمىسقا ورنالاستى. وسىنداي جارمەنكەلەر ارنايى مۇگەدەك پەن جاستار ءۇشىن ۇيىمداستىرىلدى. جولداسبەك شوپەعۇل. دەرەك: egemen.kz. سۋرەت: azh.kz.