استانا. 17 اقپان. ۆتب ليگاسى اياسىنداعى كەزەكتى ويىنىن ماسكەۋلىك تسسكا-عا قارسى وتكىزگەن «استانا» 60:78 ەسەبىمەن ەسە جىبەردى. بۇل تۋرالى egemen.kz حابارلادى.
ەلوردامىزداعى «سارىارقا» ۆەلوترەگىندە وتكەن ويىندا ەسەپتى الاڭ يەلەرى اشتى. دەگەنمەن, قوناقتار بىردەن «تىزگىندى» ءوز قولدارىنا الىپ, ويىنعا تولىعىمەن باقىلاۋ جۇرگىزدى. العاشقى كەزەڭ تسسكا-نىڭ پايداسىنا 14:19 ەسەبىمەن اياقتالدى.
ەكىنشى جانە ءۇشىنشى كەزەڭدەردە «استانا» ايگىلى كومانداعا ايتارلىقتاي قارسىلىق كورسەتتى. سونىڭ ناتيجەسىندە, ەكىنشى كەزەڭدە تەك ەكى ۇپاي ايىرماشىلىعىمەن جەڭىلسە (25:27), كەلەسى ون مينۋتتىقتا 15:14 ەسەبىمەن باسىم ءتۇستى. الايدا, جالپى ەسەپ ماسكەۋلىكتەردىڭ پايداسىنا 54:60 بولاتىن.
شەشۋشى كەزەڭدە استانالىقتاردىڭ ادىمىن اشتىرماعان قوناقتار 18 ۇپاي ولجالادى. ال رامۋناس بۋتاۋتاس جاتتىقتىراتىن ءبىزدىڭ كوماندا بار-جوعى 6 ۇپايمەن جاۋاپ قايتاردى. ءتورت كەزەڭ قورىتىندىسى بويىنشا تسسكا-نىڭ پايداسىنا 60:78 ەسەبى تىركەلىپ, «استانا» ليگا اياسىندا جەتىنشى رەت قاتارىنان جەڭىلۋگە ءماجبۇر بولدى.
ماۋسىم باسىنان بەرى 19 ويىن وتكىزگەن «استانا» بۇگىندە تۋرنير كەستەسىنىڭ 14-ساتىسىندا كەلەدى. بارلىعى 16 كوماندا باسەكەگە ءتۇسىپ جاتقانىن ايتا كەتەيىك. ەلوردالىقتار ۆتب ليگاسىنداعى كەلەسى كەزدەسۋىن 22 اقپان كۇنى ءوز الاڭىندا ەستونيالىق «كالەۆ» كومانداسىنا قارسى وتكىزەدى.
ەلامان قوڭىر.
دەرەك: egemen.kz.
سۋرەت: bcastana.kz.
