«تايقازان» پەتروپاۆلعا جەتكىزىلدى

پەتروپاۆل. 17 اقپان. اقمولا وبلىسىنىڭ ەتنومادەني بىرلەستىگىنىڭ وكىلدەرى سولتۇستىكقازاقستاندىقتارعا «قازاقستان حالقى اسسامبلەياسى - 20 ىزگى ءىس» ەستافەتاسىنىڭ سيمۆولى – «تايقازاندى» تابىستادى. بۇل تۋرالى سولتۇستىك قازاقستان وبلىستىق مادەنيەت جانە قۇجاتتامالار باسقارماسىنىڭ ءباسپاسوز قىزمەتى حابارلادى. قحا ەستافەتاسىنا قاتىسۋشىلاردى قىزىلجار ءوڭىرىنىڭ ەتنومادەني بىرلەستىكتەرىنىڭ جەتەكشىلەرى قارسى الىپ, سودان كەيىن اققايىڭ اۋدانىنداعى قارتتار مەن مۇگەدەكتەرگە ارنالعان سميرنوۆ ينتەرنات ۇيىنە ات باسىن تىرەدى. سوسىن ەستافەتا اتا-انانىڭ قامقورلىعىنسىز قالعان بالالار مەن جەتىمدەر تاربيەلەنەتىن سوكولوۆ مامانداندىرىلعان مەكتەپ-ينتەرناتىنا اكەلىندى. ەتنومادەني بىرلەستىكتىڭ وكىلدەرى بالالارعا سىيلىق ۇلەستىرىپ, ءان-جىردان شاشۋ شاشتى. «تايقازان» – جاقسىلىق پەن قايىرىمدىلىقتىڭ سيمۆولى. ول ءبىزدىڭ بارلىق ايماعىمىزدى ارالاپ وتەدى. تايقازاندى بىزدەن پاۆلودارلىقتار قابىلداپ الادى», – دەدى ەۆرەي ەتنومادەني ورتالىعىنىڭ توراعاسى راشبيل ەۆداەۆ. استانادا 6 اقپاندا باستالعان ەستافەتا 22 ءساۋىر كۇنى قحا-نىڭ 22-ءشى سەسسياسىندا ىزگى تىلەكتەرگە تولتىرىلعان «تايقازان» ەلباسى نۇرسۇلتان نازارباەۆقا تابىس ەتىلەدى. ءومىر ەسقالي. دەرەك: سولتۇستىك قازاقستان وبلىستىق مادەنيەت جانە قۇجاتتامالار باسقارماسىنىڭ ءباسپاسوز قىزمەتى. سۋرەت: «24kz».