از-ماز گاز قىمباتتايدى
ەنەرگەتيكا مينيسترلىگى اۆتوگاز, ياعني, سۇيىتىلعان مۇناي گازىنىڭ شەكتى باعاسىن كوتەرۋدى ۇسىندى. قازىردىڭ وزىندە قوعامدا ۇلكەن نارازىلىق تۋدىرعان نارىق قۇنى 1-تامىزدان باستاپ كۇشىنە ەنۋى مۇمكىن. جاتىرقاي قاراساق تا جاڭا ەرەجە قابىلدانادى. سوندا جانارماي بەكەتتەرىندە اۆتوگاز ليترىنە 7-10 تەڭگەگە دەيىن قىمباتتايدى.
ماسەلەنىڭ باستى سەبەبى – زاۋىتتاردىڭ وزىندىك قۇنى مەن ساتۋ باعاسى اراسىنداعى الشاقتىق. بۇگىندە ءوندىرىس باعاسى شامامەن 70-80 مىڭ تەڭگە, ال بەكىتىلگەن كوتەرمە باعا – نەبارى 51 932 تەڭگە. ياعني, زاۋىتتار شىعىنمەن جۇمىس ىستەپ وتىر. ال بۇل ءوز كەزەگىندە جوندەۋ جۇمىستارىن توقتاتىپ, ءوندىرىستى ازايتۋ قاۋپىن ارتتىرادى.
سۇرانىس جىل سايىن ارتىپ كەلەدى. كەيىنگى ءۇش جىلدا گاز تۇتىنۋ 30%-عا ءوستى. وسىلاي جالعاسا بەرسە, كەلەسى جىلى تاپشىلىق 40%-عا دەيىن جەتۋى مۇمكىن دەيدى ساراپشىلار. بۇعان قوسا بەنزين مەن ديزەلدىڭ دە باعاسى تۇراقسىز ەكەنىن ەسكەرسەك, جۇرگىزۋشىلەرگە ارزان وتىن ءداۋىرى اياقتالىپ كەلە جاتقانداي.
دونالد ترامپ «باج» ەتتى
تاعى ءبىر توسىن جاڭالىق بار. 1-تامىزدان باستاپ اقش قازاقستاننان ەكسپورتتالاتىن كەيبىر تاۋارلارعا 25% باج سالىعىن ەنگىزەدى. مۇنداي شەشىمدى اقش بيلىگى بيىل جاريالادى. تىزىمدە فوسفور, پشەنيچنىي گليۋتەن جانە وپتيكالىق لينزالار سياقتى ونىمدەر بار.
ارينە, بۇل قازاقستان ەكونوميكاسى ءۇشىن شەشۋشى سوققى ەمەس. ويتكەنى مۇناي, ۋران جانە ءتۇستى مەتالدار سياقتى نەگىزگى ەكسپورتتىق پوزيتسيالار بۇل تىزىمگە كىرمەيدى. دەگەنمەن, ەگەر وندىرۋشىلەر ءوز شىعىندارىن جابۋ ءۇشىن ىشكى نارىققا باعاسىن وسىرسە, سالدارىنان قاراپايىم تۇتىنۋشىلار تاعى دا قالتاسىن قاعۋى مۇمكىن.
سالىقتىڭ سالماعى ارتتى
2026 جىلدان باستاپ ەلىمىزدە جاڭا سالىق كودەكسى كۇشىنە ەنەدى. بىراق كاسىپكەرلەر وعان دايىندىقتى وسى كۇننەن باستادى. كوپتەگەن بيزنەس يەلەرى بولاشاقتاعى سالىق جۇكتەمەسىن ەسەپكە الىپ, بۇگىننەن باستاپ-اق باعانى كوتەرىپ جاتىر.
ەڭ ۇلكەن وزگەرىس – ققس مولشەرلەمەسىنىڭ 12%-دان 16%-عا كوتەرىلۋى. بۇل ءونىم مەن قىزمەتتىڭ وزىندىك قۇنىنا تىكەلەي اسەر ەتەدى. ال ۇلتتىق بانك ساراپشىلارى بۇل وزگەرىس 2025 جىلدىڭ سوڭىنا دەيىن-اق نارىقتا سەزىلەدى دەپ وتىر. ياعني, رەسمي كۇشىنە ەنبەستەن بۇرىن-اق ءبىز ونىڭ سالدارىن سەزىنەمىز.
بايلانىس وپەراتورلارى دا قاراپ قالمادى
1-تامىزدان باستاپ Beeline قازاقستان ءوز قوسىمشاسى ارقىلى باسقا وپەراتورلارعا تولەم جاساۋ كەزىندە 0,5% كوميسسيا ۇستاي باستايدى. بۇل Kcell, Activ, Tele2 جانە Altel نومىرلەرىنە قاتىستى. مىسالى, Tele2 نومىرىنە 1000 تەڭگە جىبەرسەڭىز, 5 تەڭگەسى كوميسسيا رەتىندە ۇستالىپ قالادى.
سونداي-اق «كازاحتەلەكوم» كومپانياسى دا بۇرىنعى ەسكى تاريفتەرىن جاڭارتۋعا كىرىستى. «موبايل تەلەكوم-سەرۆيس» برەندىنە تيەسىلى بىرقاتار تاريفتەر تامىزدا قىمباتتايدى. باعالارعا جاڭا ينتەرنەت پاكەتتەرى مەن مينۋتتار كىرەدى, بىراق تۇتىنۋشىلار ءۇشىن بۇل – تاعى ءبىر قوسىمشا شىعىن دەگەن ءسوز.
