فوتو: سۋ رەسۋرستارى جانە يرريگاتسيا مينيسترلىگى
ساراپشىنىڭ ايتۋىنشا, جاڭا سۋ كودەكسى – بۇل قازاقستاننىڭ تاجىريبەسى مەن ۇزدىك حالىقارالىق تاجىريبەنى بىرىكتىرەتىن كەشەندى قۇجات. وندا كليماتتىڭ وزگەرۋىن جانە سۋ رەسۋرستارىنىڭ قالىپتاسۋ جاعدايلارىنىڭ وزگەرۋىن ەسكەرەتىن كوپتەگەن جاڭا ەلەمەنت بار.
«وسى تۇرعىدان العاندا, بۇل قۇجات سۋ زاڭناماسىن جاڭارتۋ جولىندا ورتالىق ازيا ەلدەرى ءۇشىن جاقسى ۇلگى بولا الادى. سۋ شارۋاشىلىعى ۇنەمى دامىپ وتىرادى, ونىمەن بىرگە جاڭا سىن-قاتەرلەر دە تۋىندايدى. ولاردى ەڭسەرۋ ءۇشىن مىقتى ينستيتۋتسيونالدىق نەگىز قاجەت», دەدى ي.ابدۋللاەۆ.
سۋ رەسۋرستارى جانە يرريگاتسيا مينيسترلىگىنىڭ مالىمەتىنشە قۇجاتتى ازىرلەۋ كەزىندە اتالعان مينيسترلىك 5 نەگىزگى پرينتسيپكە سۇيەندى. ولار: سۋدى قورشاعان ورتانىڭ اجىراماس بولىگى, ازاماتتاردىڭ ءومىر ءسۇرۋ نەگىزى جانە ەكونوميكالىق دامۋدىڭ ىرگەتاسى رەتىندە تانۋ, سۋدى قورعاۋ جانە ونىڭ سارقىلۋىن بولدىرماۋ, جەرۇستى جانە جەراستى سۋىن كەشەندى پايدالانۋ, سۋ ۇنەمدەۋ تەحنولوگيالارىن ەنگىزۋ جانە كليماتتىڭ وزگەرۋىنە بەيىمدەلۋ, سۋ قورىن قورعاۋ مەن پايدالانۋعا قوعامدى تارتۋ.
ەسكە سالايىق, جاڭا سۋ كودەكسى بيىل 10 ماۋسىمنان باستاپ كۇشىنە ەندى.
