بالزيا بيسەنعاليقىزى ومىردەن وتكەن ەرىنىڭ زاتتارى اراسىنان ەكى جىل بۇرىن قاعازعا ورالىپ ساقتالعان 24 ءتۇيىر تارى ءدانىن تاۋىپ الىپ, بالالارىنا كورسەتەدى. سودان رينات داندەردى ءۇيدىڭ اۋلاسىنداعى شيە تالىنىڭ تۇبىنە ەگىپ تاستايدى. 30-35 كۇن وتكەندە جاس وسكىندەر كوكتەپ شىققاندا, اجەسى بايقاماي ءارامشوپ دەپ جارتىسىن ج ۇلىپ تاستاسا دا, قالعاندارى كۇزدە جاقسى ءونىم بەرگەن. «بيىكتىگى 1,5 مەتردەن اسىپ, بىتىك شىقتى. مەنىڭ اتام 1936 جىلى ويىل اۋدانى قاراتال اۋىلىندا دۇنيەگە كەلگەن. بۇل – 1936–1944 جىلدارى تارى وسىرۋدەن الەمدىك رەكورد ورناتقان اتاقتى شىعاناق بەرسە ۇلىنىڭ تۋعان جەرى. اتام اتاقتى تارىشىنىڭ زۆەنوسىندا ەڭبەك ەتكەن ۇلكەن كىسىلەردىڭ اڭگىمەلەرىن جاستايىنان ەستىپ وسكەن. ءوزى دە ۇزاق جىل تۋعان جەرىندە اگرونوم بولىپ قىزمەت ەتتى, كەڭشاردى باسقاردى. شىعاناقتىڭ تارىسىن ساقتاعانى تۋرالى اجەمىزگە دە ايتپاعان. اجەم كەزدەيسوق تاۋىپ الىپ, بىزگە بەرگەندە دە 30 جىلدان استام ساقتالعان داندەردىڭ كوكتەپ شىعاتىنىنا سەنبەگەن. ۇيدە ساقتالعان داندەردىڭ شىعاناق تارىسىنىڭ تۇقىمى ەكەنىنە كۇمان تۋعان. دەگەنمەن ءبىز ءوسىرىپ باستاعان داقىل اتاقتى ديقاننىڭ شىعارعان تۇقىمى ەكەنىنە بىردەن-ءبىر دالەل – ماحمۋد شىعاناق ۇلىنىڭ قولجازبا دەرەكتەرى. سوعىستا تەمىرجولشى بولىپ, ەلگە ورالعان ماحمۋد اكەسىنىڭ اق تارىسىندا ءۇش قارا نوقات بولاتىندىعىن جازىپ كەتكەن», دەيدى رينات.
راسىندا دا, ريناتتىڭ داندەرىندەگى ءۇش قارا نوقات بىردەن كوزگە تۇسەدى, ەرەكشە كۇتىمدى قاجەت ەتەتىن اق تارى سوعىستان كەيىن ەلدە كوپ وسىرىلمەدى. ديقان داقىلىنىڭ تۇقىمدارى ساقتالمادى دەپ ايتىلادى. ەندى رينات وسى داقىلعا پاتەنت الىپ, اششىويىلدىڭ بويىنا, شىعاناق كەتپەنىنىڭ ءىزى قالعان قاراتالدا تارى وسىرۋگە نيەت ەتىپ وتىر.
اقتوبە وبلىسى
