فوتو: gov.kz
جاز – تەك دەمالىس ۋاقىتى ەمەس, العاشقى ەڭبەك تاجىريبەسىن جيناپ, ءوز بەتىمەن تابىس تاۋىپ كورۋگە تاماشا مۇمكىندىك. ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆانىڭ ايتۋىنشا, زاڭعا سايكەس جۇمىس ىستەۋگە رۇقسات ەتىلگەن 14 پەن 18 جاس ارالىعىنداعى مەكتەپ وقۋشىلارىنىڭ سانى 1,4 ملن ادامدى قۇرايدى, ونىڭ 26,5 مىڭى – ەرەكشە بالالار.
قازىرگى تاڭدا 24,3 مىڭعا جۋىق وقۋشى جازعى جۇمىسپەن قامتىلعان. ەڭ كوپ جۇمىس ىستەيتىن سالالار – ساۋدا (5,3 مىڭ بالا) جانە تۇرعىن ءۇي مەن قوعامدىق تاماقتانۋ قىزمەتتەرى (3,6 مىڭ). بۇل كورسەتكىش جىل سايىن ارتىپ كەلەدى. ارينە, وقۋشىلار ءۇشىن ەڭبەك – تەك تابىس كوزى ەمەس, ومىرلىك تاجىريبە, كاسىبي باعدار, ءتارتىپ پەن جاۋاپكەرشىلىك مەكتەبى.
مينيستر وسى باعىتتا ارنايى ونلاين قۇرالداردىڭ ىسكە قوسىلعانىن ايتتى. اتاپ ايتقاندا, «ەلەكتروندىق ەڭبەك بيرجاسى» پلاتفورماسىندا «مەنىڭ جازعى دەمالىسىم» اتتى ءبولىم اشىلعان. بۇل ءبولىم ارقىلى 14 جاستان اسقان مەكتەپ وقۋشىلارى مەن ستۋدەنتتەر ونلاين تۇردە تىركەلىپ, جەكە كابينەت اشىپ, تۇيىندەمە جاريالاي الادى. بۇل بالالاردىڭ تسيفرلىق ساۋاتىن ارتتىرىپ, ءوز بەتىمەن شەشىم قابىلداي بىلۋگە داعدىلاندىرادى. ال 16 جاسقا دەيىنگى وقۋشىلار ءۇشىن تىركەۋ مەن جەكە كابينەت قۇرۋدى ولاردىڭ اتا-اناسى نەمەسە قامقورشىسى جۇزەگە اسىرادى.
جاستاردىڭ ەڭبەك نارىعىنا بەيىمدەلۋىن جەڭىلدەتۋ ءۇشىن «enbek.kz» جۇيەسىمەن قاتار «Skills.Enbek» ونلاين-پلاتفورماسى جۇمىس ىستەيدى. مۇندا وقۋشىلار ءوز قىزىعۋشىلىعىنا ساي ءتۇرلى باعىتتاعى داعدىلاردى مەڭگەرە الادى. قازىرگى تاڭدا وندا 1 200-دەن استام كۋرس قولجەتىمدى, ونىڭ 322-ءسى – تەگىن, ال 137 كۋرس قازاق تىلىندە ۇسىنىلعان. بۇل – كاسىبي باعىت-باعدارىن ەندى ايقىنداپ جاتقان جاس بۋىن ءۇشىن تاپتىرماس مۇمكىندىك.
جاس بۋىن ءۇشىن تاعى ءبىر ماڭىزدى شەشىمدەردىڭ ءبىرى – بولاشاق ماماندىعىن دۇرىس تاڭداۋ. وسى رەتتە «مانساپ كومپاسى» اتتى پلاتفورما جاستارعا ءوز بەيىمدىلىگى مەن قابىلەتىن انىقتاۋعا كومەكتەسەدى. مۇندا ءتۇرلى تەستىلەۋ ارقىلى كاسىبي قىزىعۋشىلىقتار انىقتالىپ, سۇرانىسقا يە ماماندىقتار جونىندە كەڭ كولەمدە اقپارات بەرىلەدى. سونداي-اق قاي وقۋ ورنىندا ءبىلىم الۋعا بولاتىنى تۋرالى نۇسقاۋلار دا قامتىلعان.
س.جاقىپوۆا جازعى دەمالىس كەزىندە جەرگىلىكتى اكىمدىكتەر تاراپىنان قوعامدىق جۇمىستاردى ۇيىمداستىرۋ تاجىريبەسى جالعاساتىنىن دا اتاپ ءوتتى. بۇل جۇمىستار ارنايى دايىندىقتى قاجەت ەتپەيدى, يكەمدى كەستە بويىنشا ورىندالادى جانە ەكونوميكالىق, الەۋمەتتىك نەمەسە ەكولوگيالىق پايدا اكەلۋگە ءتيىس. مۇنداي جۇمىس ءۇشىن وقۋشىلارعا اي سايىن كەمىندە 24 اەك (2025 جىلى – 94 368 تەڭگە) كولەمىندە جالاقى تولەنەدى.
