ءباسى بولەك بايقاۋ

وبلىستىق ىشكى ىستەر دەپار­تامەنتىندە 23 ماۋسىم – كۇنى قارساڭىندا «مەنىڭ قازاقستانىم. مەنىڭ پوليتسيام» اتتى بالالاردىڭ شىعارماشىلىق بايقاۋى ۇيىمداستىرىلدى. بۇل بايقاۋعا وبلىستىڭ ىشكى ىستەر ورگاندارى قىزمەتكەرلەرىنىڭ 3-13 جاس ارالىعىنداعى بالالارى قاتىستىرىلدى. بايقاۋدىڭ باستى ماقساتى جاس ۇرپاقتىڭ بويىندا قازاقستان پوليتسياسىنا دەگەن قۇرمەتتى قالىپتاستىرۋ, بالالاردى وتانسۇيگىشتىككە, ءوزىنىڭ اتا-اناسىن ماقتان تۇتۋعا باۋلۋ جانە ەڭ باستىسى, مەملەكەتتىك ءتىلدى ءبىلۋ مەن قۇرمەتتەۋگە تاربيەلەۋ بولىپ تابىلادى. «مەنىڭ قازاقستانىم. مەنىڭ پوليتسيام» بايقاۋى بالالاردىڭ جاس ەرەكشەلىكتەرىن ەسكەرە وتىرىپ, ەكى باعىتتا وتكىزىلدى. ءبىرىنشى باعىت بويىنشا 3 -10 جاستاعى بالالار وزدەرىنىڭ سالعان سۋرەتتەرىن ۇسىنسا, ەكىنشى باعىت بويىنشا 6-13 جاستاعى جەتكىنشەكتەر وزدەرى جازعان شىعارمالارىن تاپسىردى. بايقاۋعا 30 بالا ءوز جۇمىس­تارىن ۇسىندى. پوليتسيا قىزمەت­كەرلەرىنىڭ بالالارى ۇسىنعان ءاربىر سۋرەتتە ولاردىڭ وتانىنا, تۋعان جەرىنە دەگەن سۇيىسپەنشىلىگى ايقىن كورىنسە, ولاردىڭ جازعان شىعار­مالارىندا پوليتسيا قىزمەتكەرى بولىپ جۇمىس ىستەيتىن اتا-انالارىنا دەگەن قۇرمەتى, ماقتانىشى اڭعارىلادى. بايقاۋ وبلىستىق دەڭگەيدە وتكىزىل­گەندىكتەن, وعان بارلىق قالالىق, اۋداندىق پوليتسيا ءبو­لىم­دەرىندە قىزمەت ەتەتىن پولي­تسەيلەردىڭ بالالارى دا قاتىستى. اسىرەسە, شالقار, تەمىر, ايتەكە بي اۋداندارىندا قىزمەت ەتەتىن پوليتسيا قىزمەتكەرلەرىنىڭ بالالارى اسا بەلسەندىلىك تانىتتى. «مەنىڭ قازاقستانىم. مە­نىڭ پوليتسيام» اتتى بالالار باي­قاۋىنىڭ قورىتىندىسىن شى­عارىپ, جەڭىمپازداردى انىق­تاۋ جانە قاتىسقان ەشبىر بالانى نازاردان تىس قالدىرماۋدى ۇستانعان وبلىستىق ىشكى ىستەر دەپارتامەنتىنىڭ باستىعى, پوليتسيا گەنەرال-مايورى ماحسۋدحان ابلازيموۆتىڭ توراعالىعىمەن وتكەن كوميسسيا وتىرىسىندا بالا­لاردىڭ جۇمىستارى سارالانىپ, قىزۋ تالقىلاندى. سونداي-اق, بالالاردىڭ تۋىندىلارىن بارىنشا ءادىل باعالاۋ ءۇشىن كوميسسيا قۇرامىندا جۋرناليستەر, تىلشىلەر, وبلىستىق تىلدەردى دامىتۋ باسقارماسىنىڭ, قالاداعى قازانعاپ اتىنداعى بالالار ونەر مەكتەبىنىڭ ماماندارى دا بولدى. بايقاۋ قورىتىندىسى بويىنشا جۇلدەلى ورىندار مەن بەس نوميناتسيا تاعايىندالدى. ونىڭ ىشىندە ەڭ كىشكەنتاي قاتىسۋشىلار دا نازاردان تىس قالعان جوق. ولارعا «ەڭ كىشكەنتاي ونەرپاز», «تالابى تاۋداي بالاپان» سىندى نوميناتسيالار بەلگىلەندى. بايقاۋ جەڭىمپازدارىن ماراپاتتاۋ ءراسىمى 23 ماۋسىم – قازاقستان پوليتسياسى كۇنىنە ارنالعان مەرەكەلىك كونتسەرتتە جۇزەگە اسىرىلادى. قاتىسۋشى بالا­قايلاردىڭ بارلىعىنا وبلىس­تىق ءىىد باستىعىنىڭ ماقتاۋ قاعازدارى مەن العىس حاتتارى, سىيلىقتار تابىستالىپ, ءىىد باسشىلىعىمەن ەستەلىك سۋرەتتەرگە تۇسىرىلەتىن بولادى. ساتىبالدى ءساۋىرباي, «ەگەمەن قازاقستان». اقتوبە.