فوتو: myfin.by
«تاپسىرما بارىنشا بيىك, بىراق قول جەتكىزۋگە بولادى. وتكەن جىلى قازاقستاندا ءجىو كولەمى $286 ملرد-تى قۇرادى. بيىل ەكونوميكالىق ءوسۋ كورسەتكىشتەرىن ەسكەرىپ, $300 ملرد-قا جەتكىزۋدى كوزدەپ وتىرمىز. الداعى جىلدارى قارقىندى ەكونوميكالىق ءوسۋدى قامتاماسىز ەتۋ ارقىلى $450 ملرد-قا قول جەتكىزە الامىز. ول ءۇشىن ەلىمىزدىڭ ونەركاسىپتىك الەۋەتىن دامىتۋ, ەكونوميكانى ءارتاراپتاندىرۋ بويىنشا اۋقىمدى جۇمىس جۇرگىزىلۋدە. «بايتەرەك» حولدينگى جەلىسى بويىنشا كولەمدى باعدارلاما ىسكە قوسىلدى, ول ەكونوميكاعا قوسىمشا 8 ترلن تەڭگە ينۆەستيتسيا تارتۋعا مۇمكىندىك بەرەدى. جوسپاردا – 1,5 ترلن تەڭگەگە 190 ونەركاسىپتىك جوبانى ىسكە قوسۋ. ەگەر ءبىز وسى باعىتتا جۇمىس ىستەيتىن بولساق, وندا العا قويعان ماقساتتارعا جەتە الامىز», دەدى ولجاس بەكتەنوۆ.
ۇكىمەت ەكونوميكانىڭ ءوسۋىن ىنتالاندىرۋ ءۇشىن بىرقاتار باعىتتى بەلگىلەدى. بۇل مۇناي وڭدەۋ, مەتاللۋرگيانى جاڭعىرتۋ, تكش ينفراقۇرىلىمىن اۋقىمدى جاڭارتۋ, ەلەكتر ەنەرگەتيكاسى, اۋىل شارۋاشىلىعى جانە مينەرالدىق-شيكىزات بازاسىن, ونىڭ ىشىندە سيرەك كەزدەسەتىن مەتالداردى ۇلعايتۋ.
سونداي-اق جاڭا سالالاردى دامىتۋدا ۇلكەن الەۋەت بار, ولاردىڭ قاتارىندا مۇناي-گاز حيمياسى, اۆتوموبيل جاساۋ, تەمىرجول ماشينا جاساۋ, تىڭايتقىشتار ءوندىرۋ بار. جىل سايىن وڭدەۋ ونەركاسىبى مەن اوك-دە جاڭا جوبالار ەنگىزىلەدى.
ءوسۋدىڭ نەگىزگى نۇكتەلەرىن دامىتۋ ۇلتتىق ينفراقۇرىلىمدىق جوسپاردى جۇزەگە اسىرۋعا كوڭىل ءبولىنىپ, قاجەتتى ونەركاسىپتىك جانە كولىكتىك ينفراقۇرىلىممەن قامتاماسىز ەتىلەدى.
بۇدان بولەك, وسى جىلدان باستاپ «بايتەرەك» حولدينگى جەلىسى بويىنشا باسىم سەكتورلاردى قارجىلاندىرۋ ايتارلىقتاي ۇلعايۋدا.
2029 جىلعا دەيىن جاڭا وندىرىستەردى ىسكە قوسۋمەن 17 ءىرى جوبانى جۇزەگە اسىرۋ باستالعان.
ولاردىڭ ىشىندە حيميا ونەركاسىبىندەگى اۆتوموبيلدەر, بۋتاديەن, اممياك جانە كارباميد وندىرەتىن زاۋىتتار, مەتاللۋرگيالىق كلاستەر, مىس بالقىتۋ زاۋىتى, سونداي-اق شىمكەنت ءموز وندىرىستىك قۋاتتارىن كەڭەيتۋ بار.
