قولدانىستاعى ەرەجەلەر شەڭبەرىندە ءدارى-دارمەكتى ەلىمىزدە اينالىمعا جىبەرۋ ءراسىمى شامامەن 2 جىلدان 5 جىلعا دەيىن سوزىلاتىن. وسى ولقىلىقتى رەتتەۋ ماقساتىندا دەنساۋلىق ساقتاۋ مينيسترلىگى تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىمەن بىرلەسىپ, كومپوزيتتىك قىزمەتتى ۇيلەستىرۋدى باستادى. كومپوزيتتىك قىزمەت شەڭبەرىندە ىشكى تىركەۋ ۇدەرىستەرىن وڭتايلاندىرۋدى كوزدەيتىن نورما ىسكە اسىرىلماق. ەسەسىنە, دارىلىك پرەپاراتتاردى تىركەۋ مەرزىمى 100 كۇننەن اسپايدى. سونداي-اق ەۋروپالىق وداق, جاپونيا, اقش, ۇلىبريتانيا ەلدەرىنەن جەتكەن ءدارى-دارمەكتى جەدەل تىركەۋگە دەن قويىلىپ وتىر. مۇنداي دارىلىك پرەپاراتتاردى تىركەۋ مەرزىمىن 15 جۇمىس كۇنى ىشىندە جۇرگىزۋ جوسپاردا بار. دارىلىك زاتتارعا باعا بەلگىلەۋدىڭ اشىق مودەلىن قالىپتاستىرۋعا قاتىستى دا بىرقاتار ماسەلە وڭىنان شەشىلگەن. بۇل جونىندە دەنساۋلىق ساقتاۋ ۆيتسە-ءمينيسترى ەرجان نۇرلىباەۆ ءمالىم ەتتى.
«باعا مودەلى وزگەردى. دارىلىك زاتتاردىڭ شەكتى باعاسىنا نەگىزسىز قوسىلعان ۇستەمە باعالار الىنىپ تاستالدى. ەلدە تىركەلگەن بارلىق دارىلىك پرەپارات قايتا ەسەپتەلەدى. قازىر فارماتسەۆتيكالىق قوعامداستىق اتالعان مودەلدى سىناقتان وتكىزۋگە قاتىستى جۇمىس جۇرگىزىپ جاتىر. تمككك, ءمامس شەڭبەرىندە دارىلىك پرەپاراتتاردىڭ قۇنى شامامەن 19%, كوتەرمە-بولشەك ساۋدادا شامامەن 30% تومەندەيدى», دەدى ە.نۇرلىباەۆ.
قاڭتاردان باستاپ مەديتسينالىق ۇيىمدار ەلەكتروندىق قارجى ورتالىعىنىڭ ۆەب-پورتالىندا دارىلىك زاتتار مەن مەديتسينالىق بۇيىمداردى ونلاين رەجىمدە ساتىپ الا باستادى. قازىردىڭ وزىندە 800-گە جۋىق مەديتسينالىق ۇيىم وسى الاڭدى بەلسەندى پايدالانادى. ۆەب-پورتال ارقىلى 120 ملرد تەڭگەگە جۋىق شارت جاسالعان. قازىر دەنساۋلىق ساقتاۋ مينيسترلىگى ەلەكتروندى ساتىپ الۋ فورماتىنا كوشۋدىڭ ارقاسىندا قانشا قاراجات ۇنەمدەلگەنىن انىقتاپ جاتىر.
«بىرىڭعاي ديستريبيۋتور ارقىلى دارىلىك زاتتاردى ساتىپ الۋ كەزىندە ولاردى ساقتاۋ ءۇشىن دە, تاسىمالداۋ ءۇشىن دە تولەم جاسايمىز. دەنساۋلىق ساقتاۋ مينيسترلىگى «سك-فارماتسيامەن» بىرلەسىپ, شىعىنداردى قىسقارتۋعا بولادى دەگەن قورىتىندىعا كەلدى. ءبىز ساقتاۋ مەن تاسىمالداۋدى جەكە قىزمەتتەرگە ءبولۋدى ۇسىنامىز, ويتكەنى ولاردىڭ ارقايسىسى ارنايى شارتتاردى, ونىڭ ىشىندە تەمپەراتۋرالىق رەجىمدى ساقتاۋدى تالاپ ەتەدى», دەدى ۆيتسە-مينيستر.
ءسويتىپ, ءدارى-دارمەكتەردى ساقتاۋ, تاسىمالداۋ قىزمەتتەرىن ەكى بولەك لوت رەتىندە ساتىپ الۋ تۋرالى شەشىم قابىلداندى. دەنساۋلىق ساقتاۋ مينيسترلىگىنىڭ باعالاۋى بويىنشا, بۇل شامامەن 1 ملرد تەڭگەنى ۇنەمدەۋگە مۇمكىندىك بەرەدى.
مينيسترلىك مەملەكەت باسشىسىنىڭ تاپسىرماسىمەن ەلىمىزدىڭ فارماتسەۆتيكالىق نارىعىنداعى وتاندىق ءوندىرىس كولەمىن 50%-عا, ودان جوعارى دەڭگەيگە جەتكىزۋ جونىندەگى جۇمىستى جۇيەلى جۇرگىزىپ كەلەدى. جوسپاردى 2029 جىلدىڭ سوڭىنا دەيىن ورىنداۋ كوزدەلگەن. بىلتىر وتاندىق ءوندىرىس كولەمى 15%-دى قۇراعان. سالىستىرمالى تۇردە ناتيجە كوڭىل كونشىتەدى دەپ ايتۋعا كەلمەيدى. سوندىقتان مينيسترلىك تاپسىرمانى ورىنداۋ ماقساتىندا ينۆەستيتسيا تارتۋ, قولايلى جاعداي جاساۋمەن اينالىساتىن جوبالىق كەڭسە اشتى. قازىر وندا 7 جوبا قاراستىرىلىپ جاتىر. ينۆەستيتسيالاردىڭ جالپى سوماسى شامامەن 700 ملن دوللاردى قۇرايدى. ولاردىڭ بارلىعى دارىلىك پرەپاراتتار ءوندىرىسىن وقشاۋلاۋعا باعىتتالعان. بۇدان وزگە, ءدارى-دارمەكتى تاڭبالاۋ جۇمىستارى ۇزىلمەي جالعاسىپ كەلەدى. بۇل ەل اۋماعىنا ساپاسى مەن شىعارىلعان جەرى كۇمان تۋعىزاتىن ونىمدەردى كىرگىزبەۋ ءۇشىن قاجەت.
