فوتو: kasipodaq.kz
سەزگە 300-گە جۋىق دەلەگات, شەتەل ۇيىمدارىنىڭ وكىلدەرى, ونىڭ ىشىندە حالىقارالىق ەڭبەك ۇيىمىنىڭ ەڭبەككەرلەر قىزمەتى جونىندەگى بيۋرو ديرەكتورى ماريا حەلەنا اندرە, حالىقارالىق كاسىپوداقتار كونفەدەراتسياسىنىڭ باس حاتشىسى ليۋك تريانگل, وسى كونفەدەراتسيانىڭ بۇكىلەۋروپالىق ايماقتىق كەڭەسىنىڭ (بەاك) باس حاتشىسى ەستەر لينچ, پرەزيدەنتى يگور زۋبكۋ, گرۋزيا, وزبەكستان, ازەربايجان, جاپونيا, پولشا, تاعى باسقا دا ەلدەردىڭ ۇلتتىق كاسىپوداق ورتالىقتارىنىڭ باسشىلارى قاتىستى.
كەلەلى كەڭەستە كاسىپوداقتار فەدەراتسياسى باس كەڭەسىنىڭ كەيىنگى بەس جىلداعى ەسەبى تىڭدالدى. فەدەراتسيا توراعاسى ساتىبالدى داۋلەتالين ەسەپ بەرە كەلىپ, ۇيىمنىڭ ماقسات-مۇراتى تۋرالى باياندادى.
«كاسىپوداق بار جەردە قاۋىپسىزدىك بار. قاۋىپسىزدىكتى ۇجىمدىق شارتتار ارقىلى ۇيلەستىرەمىز. قازىر 16 مىڭنان استام ۇجىمدىق شارتىمىز بار. كاسىپوداققا قوسىلعان مەكەمەلەر ۇجىمدىق شارتپەن قامتىلعان. ۇجىمدىق شارتتى كىشى كونستيتۋتسيامىز دەپ ايتساق بولادى. ول كاسىپورىندارداعى ەڭبەك, الەۋمەتتىك قاتىناستاردى رەتتەيتىن قۇجات. جۋىردا زاڭ كلينيكاسىن قۇردىق. وندا ماماندار تاۋلىك بويى ەڭبەك ادامدارىنا قۇقىقتىق كومەك كورسەتەدى. كاسىپوداق فەدەراتسياسىنا 6 مىڭنان استام ءوتىنىش ءتۇستى. سونداي-اق سالالىق ۇيىمدار, باستاۋىش ۇيىمدارعا كەلگەن وتىنىشتەر ءتىپتى كوپ. سوتتا 247 ءىس جۇمىسشىلاردىڭ پايداسىنا شەشىلىپ, 3,7 ملرد تەڭگە كولەمىندەگى ەڭبەكاقى بەرەشەگى قايتارىلدى. قازىر ەلدەگى بارلىق فيليال جۇمىس ىستەيدى. جۇمىسشىلاردان تۇسەتىن وتىنىشتەردىڭ باسىم بولىگى جالاقى ماسەلەسىن كوتەرەدى. كەز كەلگەن كاسىپوداق مۇشەسى, ياعني جۇمىسشى قايدا جۇرسە دە, زاڭگەرلەرگە حابارلاسىپ, قۇقىقتىق كومەك الۋى كەرەك. ءبىز وسى باعىتتا جۇمىس ىستەپ كەلەمىز», دەدى س.داۋلەتالين.
دەلەگاتتار مەملەكەت باسشىسىنىڭ 2025 جىلدى جۇمىسشى ماماندىقتارى جىلى دەپ جاريالاۋ باستاماسىن زور ىقىلاسپەن قولدادى. بۇل شەشىم – جۇمىسشى ماماندىقتارىنىڭ مارتەبەسىن كوتەرۋگە, ەڭبەكقورلىق پەن كاسىبيلىك يدەياسىن ىلگەرىلەتۋگە, ەڭبەك ادامىنىڭ قوعامداعى بەدەلىن ارتتىرۋعا باعىتتالعان ماڭىزدى قادام. سەزدىڭ ۇندەۋى – «وزگەرىستەر داۋىرىندەگى ءادىل ەڭبەك: قورعاۋ, دامۋ, يننوۆاتسيالار». تاقىرىپ مەملەكەت باسشىسىنىڭ ادىلدىكتى قامتاماسىز ەتۋ, «ادىلەتتى قازاقستان» قاعيداتىن ىسكە اسىرۋ تۋرالى نەگىزگى تۇجىرىمىمەن تامىرلاس.
ء«بىز ەلىمىزدى الەمدىك كاسىپوداقتار كەڭىستىگىنە قايتا الىپ شىقتىق. ەلىمىز حالىقارالىق ەڭبەك ۇيىمىنىڭ ەڭبەك قۇقىقتارىنىڭ بۇزىلۋى جونىندە جاسالعان «قىسقا تىزىمنەن» شىعارىلدى, حالىقارالىق كاسىپوداقتار كونفەدەراتسياسىنا قايتا مۇشە بولىپ كىردى. حەۇ-مەن بىرلەسكەن جول كارتاسىنا قول قويىلدى. بۇل – ەلىمىزدىڭ ەڭبەك سالاسىنداعى جەتىستىكتەرىنىڭ حالىقارالىق دەڭگەيدە مويىندالعانىنىڭ ايعاعى», دەدى س. داۋلەتالين.
كاسىپوداقتار ەڭبەك ادامىنىڭ مارتەبەسىن كوتەرىپ, ولاردىڭ الەۋمەتتىك جاعدايىن جاقسارتۋعا ىقپال ەتۋدى كوزدەيدى. سەزدە فەدەراتسيانىڭ الداعى بەس جىلعا ارنالعان دامۋ باعىتى, ستراتەگياسى ايقىندالدى. ستراتەگيانىڭ جوباسى الدىن الا بارلىق وڭىردە, سالالىق كاسىپوداقتاردا تالقىلانعان. سەزدە قورىتىندى قاۋلى عانا قابىلداندى.
«كاسىپتىك وداقتار – قوعامنىڭ اجىراماس بولىگى. ولاردىڭ قىزمەتىنىڭ نەگىزگى قاعيداتتارى – ارقاشان ەڭبەككەرلەردىڭ قۇقى مەن مۇددەسىن قورعاۋ. ەڭبەك ادامى – قوعامىمىزدىڭ باستى قۇندىلىعى. ءبىز پرەزيدەنت قاسىم-جومارت توقاەۆتىڭ ەلدى تۇبەگەيلى جاڭعىرتۋعا, ساياسي رەفورمالار مەن الەۋمەتتىك-ەكونوميكالىق وزگەرىستەرگە باعىتتالعان ستراتەگيالىق باعىتىن قولدايمىز», دەلىنگەن قاۋلىدا.
