فوتو: اشىق دەرەككوز
كوميتەتتىڭ مالىمەتىنشە, الاياقتار ازاماتتارعا قوڭىراۋ شالىپ, ءوزىن ۇقك نەمەسە باسقا دا مەملەكەتتىك ورگانداردىڭ قىزمەتكەرى رەتىندە تانىستىرادى. ولار جالعان مالىمەت بەرىپ, ازاماتتىڭ بانك شوتىندا كۇماندى وپەراتسيالار تىركەلگەنىن نەمەسە «تەرگەۋ ءىسى ءجۇرىپ جاتقانىن» حابارلايدى. كەي جاعدايدا, «تەرروريزمنىڭ جولىن كەسۋ ءۇشىن» دەپ, شۇعىل ارەكەت ەتۋدى تالاپ ەتەدى.
«جەكە جاعدايلاردا الاياقتار ۇلتتىق قاۋىپسىزدىككە دەگەن بولجامدى قاۋىپ-قاتەردى نەگىزگە الا وتىرىپ, تەرروريزم ارەكەتىن توقتاتۋ ءۇشىن ارەكەت قاجەت دەپ مالىمدەيدى. شىنايىلىق ءۇشىن جالعان كۋالىكتەردى (مىسالى, مەسسەندجەردەگى بەينە قوڭىراۋلار ارقىلى) كورسەتەدى نەمەسە ۇقك لوگوتيپى بار جالعان قۇجاتتاردى جىبەرەدى. اڭگىمە بارىسىندا ولار ازاماتتاردى اقشالارىنا قاۋىپ ءتونىپ تۇرعانىنا سەندىرىپ, قورعانىش نەمەسە تەكسەرۋ ءۇشىن قاراجاتتى قاۋىپسىز شوتقا اۋدارۋدى ۇسىنادى. كەيدە ولارعا جيناقتارىن قۇتقارۋ ءۇشىن نەسيە الۋعا كەڭەس بەرىلەدى, سودان كەيىن اقشا قىلمىسكەرلەر باقىلايتىن شوتتارعا اۋدارىلادى», دەلىنگەن حابارلامادا.
الاياقتار مۇنىمەن توقتاپ قالماي, جۇمىسقا ورنالاسۋعا جاردەمدەسۋ, تۇرمىستىق ماسەلەلەردى شەشىپ بەرۋ سياقتى «قىزمەتتەرىن» اقىلى تۇردە ۇسىنىپ, تاعى ءبىر الاياقتىق ءتاسىلىن قولدانىپ ءجۇر.
ۇقك بۇل ارەكەتتەردىڭ قر قىلمىستىق كودەكسىنىڭ 190-بابى (الاياقتىق) جانە 385-بابى (جالعان قۇجاتتاردى جاساۋ جانە پايدالانۋ) بويىنشا قىلمىس ەكەنىن ەسكەرتەدى.
كوميتەت وكىلدەرى قۇقىق قورعاۋ ورگاندارى ەشقاشان ازاماتتارعا تەلەفون ارقىلى حابارلاسىپ, شوتتارعا اقشا اۋدارۋدى تالاپ ەتپەيتىنىن رەسمي تۇردە مالىمدەدى. تەرروريستىك قاۋىپ دەگەن سىلتاۋمەن جاسالاتىن مۇنداي ۇسىنىستاردىڭ ءبارى الاياقتاردىڭ ارەكەتى.
