اتىراۋدا ءدىني اعىمدار جەتەگىنە ەرەتىندەردىڭ قاتارى ءالى دە ازايماي وتىر. وبلىستىق پروكۋراتۋرا باسقارما باسشىسىنىڭ مىندەتىن اتقارۋشى تەمىربەك ءدارجانوۆتىڭ ءمالىم ەتۋىنشە, جىل باسىنان بەرى ءدىني ەكسترەميزم مەن تەرروريزمگە قاتىستى 39 قىلمىس انىقتالىپتى. سونىڭ ىشىندە, سيريا مەن ۋكرايناداعى قارۋلى قاقتىعىستارعا قاتىسۋعا بايلانىستى 23, تەرروريزمدى ناسيحاتتاعان-9, تەرروريستىك توپ قۇرۋ-1, ەكسترەميستىك ارەكەتتى ۇيىمداستىرۋ ماقساتىندا ادامدى ازعىرىپ كوندىرۋ-1, تەرروريستىك توپتارعا قارجىلاي كومەكتەسۋگە قاتىستى 5 دەرەك تىركەلىپتى. سونىمەن بىرگە, رۇقسات ەتىلمەگەن جەردە ءدىني ادەبيەتتەردى ساتۋدىڭ 4 دەرەگىنە بايلانىستى كىنالىلەرگە 50 ايلىق ەسەپتىك كورسەتكىش كولەمىندە ايىپپۇل سالىنىپتى.
«پروكۋراتۋرا قۇقىق قورعاۋ ورگاندارىمەن بىرلەسىپ وبلىستىڭ ءۇش تۇرعىنىن سيرياداعى قارۋلى قاقتىعىسقا قاتىسۋعا كەتىپ بارا جاتقان جەرىنەن ۇستادى. قازىر ولارعا قاتىستى قىلمىستىق كودەكستىڭ 24-بابى (قىلمىسقا دايىندالۋ), 172-بابى (شەتەلدەگى قارۋلى قاقتىعىسقا قاتىسۋ), 256-بابى (تەرروريزمدى ناسيحاتتاۋ) جانە 259-بابىمەن (ەكسترەميستىك ارەكەتتەردى ۇيىمداستىرۋ ماقساتىندا ادامداردى ازعىرىپ كوندىرۋ) تەرگەۋ امالدارى جۇرگىزىلىپ جاتىر», دەدى وبلىستىق پروكۋراتۋرا باسقارما باسشىسىنىڭ مىندەتىن اتقارۋشى تەمىربەك ءدارجانوۆ.
جولداسبەك شوپەعۇل, «ەگەمەن قازاقستان».
اتىراۋ.
