قۇجاتتى قولمەن تۇزەتىپ...

ەلىمىزدىڭ شىعىسىنداعى «قورعاس» باقىلاۋ-وتكىزۋ بەكەتىنىڭ ناريادى تەمەكى ونىمدەرىن زاڭسىز وتكىزۋگە تىرىسقان 22 جاستاعى قازاقستان ازاماتىن ۇستادى. ودان جالپى سانى 3 400 قوراپ تەمەكى تابىلدى. اتالعان ءىستىڭ ماتەريالدارى قىلمىستىق كودەكستىڭ 234-بابىنىڭ 1-تارماعى بويىنشا الماتى وبلىسىنىڭ پانفيلوۆ اۋداندىق پروكۋراتۋراسىنا جولداندى. وسى كۇنى ەلىمىزدىڭ وڭتۇستىگىندەگى «سىپاتاي باتىر اۆتو» بەكەتىندە 58 جاستاعى قىرعىزستان ازاماتى ۇستالدى. قازاقستاننان كورشىلەس قىرعىزستانعا كەتىپ بارا جاتقان ازاماتتان زاڭسىز 60 كيلوگرامم ءدارى-دارمەك شىقتى. اتالعان دەرەك بويىنشا قۇقىق قورعاۋ ورگاندارى حابارلاندىرىلدى. قازاقستان-رەسەي شەكاراسىنداعى «قۇر­مانعازى اۆتو» باقىلاۋ-وتكىزۋ بەكەتىنىڭ شەكارا ناريادى 11 باس ءمۇيىزدى ءىرى قارانى شەكارادان زاڭسىز وتكىزۋگە ارەكەتتەنگەن رەسەيلىك ەكى ازاماتتى ۇستادى. ەكى جۇك كولىگىنە تيەگەن ءىرى قارالاردىڭ قۇجاتتارى دۇرىس ەمەس ەكەن. كورسەتكەن قۇجاتتارىنىڭ مەرزىمى ءوتىپ كەت­كەنىمەن قويماي, ونىڭ ءبىراز جەرى قولمەن تۇزەتىلگەندىگى انىقتالدى. اتالعان دەرەك بويىنشا ماتەريالدار اتىراۋ وبلىسىنىڭ قۇرمانعازى اۋداندىق ىشكى ىستەر بولىمىنە تابىستالدى, دەپ حابارلادى ۇقك شق ءباسپاسوز قىزمەتى.