جۋىردا وبلىس ورتالىعىندا جۇمىسشى ماماندىقتارى جىلىنا وراي, «تازا قازاقستان» باعدارلاماسىن ساپالى جۇزەگە اسىرۋ ماقساتىندا شاھارداعى كوممۋنالدىق سالا وكىلدەرىنە ارنايى تەحنيكالار تاپسىرىلدى.
مىنە, وسى جاڭا تەحنيكالاردى تىزگىندەۋگە تاجىريبەلى ماماندار مەن جاستار تارتىلماق. تەحنيكالاردى تاپسىرۋ بارىسىندا وبلىس اكىمى نۇرالحان كوشەروۆ دانەكەرلەۋشى, ەلەكترشى, سۋ مامانى, جۇرگىزۋشىلەر, كوممۋنالدىق سالانىڭ قاراپايىم قىزمەتكەرلەرىن ماراپاتتادى. ءبىر توپ ازاماتقا ونەركاسىپ جانە قۇرىلىس مينيسترلىگىنىڭ «ەڭبەك ارداگەرى», «تۇرعىن ءۇي كوممۋنالدىق شارۋاشىلىعىنىڭ قۇرمەتتى قىزمەتكەرى» توسبەلگىلەرىن, قۇرمەت گراموتاسىن تاپسىردى. بيىل «وڭىرلىك جۇمىسپەن قامتۋ كارتاسى» اياسىندا 130 769 جاڭا جۇمىس ورنىن قۇرۋ كوزدەلگەن. ونىڭ ىشىندە, 83554 ورىن, ياعني 63%-ى – تۇراقتى جۇمىس. وڭىردە وسى كۇنگە دەيىن 56 مىڭعا جۋىق ادام جۇمىسپەن قامتىلدى. ونىڭ 22 380-ءى – تۇراقتى, 33 619-ى – سۋبسيديالاناتىن ۋاقىتشا جۇمىس ورنى. جالپى, جۇمىسپەن قامتىلعانداردىڭ 20 526-ى نەمەسە 36,7%-ى – جۇمىسشى ماماندىق يەلەرى.
حالىقتى جۇمىسپەن قامتۋ تۋرالى شارالار تالقىلانعان ماجىلىستە وبلىس اكىمى نۇرالحان كوشەروۆ وڭىردەگى ورتا ارناۋلى ءبىلىم بەرۋ ۇيىمدارىندا ەڭبەك نارىعىنا قاجەتتى جۇمىسشى ماماندىقتار ۇلەسىن ارتتىرۋ قاجەتتىگىن ايتتى. جاۋاپتى تۇلعالارعا قوسىمشا ينۆەستيتسيالاردى تارتۋ ارقىلى جاڭا تۇراقتى جۇمىس ورىندارىنىڭ اشىلۋىن قامتاماسىز ەتۋدى, ەڭبەك ادامىنىڭ بەدەلىن كوتەرۋ باعىتىندا ماڭىزدى ءىس-شارالار مەن جوبالاردى جۇزەگە اسىرۋدى تاپسىردى.
وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ دەرەگىنشە, ۇلتتىق جوبالار مەن تۇجىرىمدامالار اياسىندا 375 ينفراقۇرىلىمدىق جوبا ارقىلى 4 074 جۇمىس ورنىن اشۋ كوزدەلىپ, 6 ايدا 1708 جۇمىس ورنىن قۇرۋ جوسپارلانعان. بۇگىن-دە 184 جوبا اياسىندا 1 653 ادام جۇمىسپەن قامتىلىپ, جوسپار 97% ورىندالعان. بيىل 125 جەكە ينۆەستيتسيالىق جوبانى ىسكە اسىرۋ ارقىلى 2004 جۇمىس ورنىن اشۋ كوزدەلىپ وتىر. ونىڭ ىشىندە, 1050 ورىن – تۇراقتى, 954-ءى – ۋاقىتشا. ناقتىراق ايتقاندا, كاسىپكەرلىك سالاسىندا 48 جوبا ارقىلى – 651, اگروونەركاسىپ سالاسىندا 67 جوبا ارقىلى – 1 195, تۋريزم سالاسىندا 10 جوبا ارقىلى 158 جۇمىس ورنى اشىلماق. التى ايدىڭ جوسپارىمەن 401 ورىن اشۋ كوزدەلسە, قازىرگى ۋاقىتتا 76 جوبا جۇزەگە اسىپ, 900-گە جۋىق جۇمىس ورنى قۇرىلدى. قالعان 49 جوبانى جۇزەگە اسىرۋ جۇمىسى جالعاسىپ جاتىر. «10 مىڭ تۇرعىنعا – 100 جاڭا جۇمىس ورنى» مەملەكەتتىك باعدارلاماسى بويىنشا 2025 جىلعا 22 595 جاڭا جۇمىس ورنىن قۇرۋ مەجەلەنىپ, جىل باسىنان بەرى 3374 ورىن اشىلدى. سونداي-اق ۋاقىتشا سۋبسيديالاناتىن جۇمىس ورىندارىنا 32 465 ادامدى جولداۋ جوسپارلانعان. قازىردە 21 مىڭعا جۋىق ازامات جۇمىسقا ورنالاسىپ, ءتيىستى كەزەڭنىڭ جوسپارى 88,4% ورىندالدى. جاڭا بيزنەس-يدەيالاردى جۇزەگە اسىرۋعا 1 793 مەملەكەتتىك قايتارىمسىز گرانت بەرۋ كوزدەلسە, ءبىرىنشى لەكپەن 862 ازامات كوميسسيانىڭ وڭ قورىتىندىسىن الىپ ۇلگەردى. جىل باسىنان بەرى وتكىزىلگەن 45 بوس جۇمىس ورنى جارمەڭكەسى اياسىندا 1 829 ادام جۇمىسقا ورنالاستى.
تۇركىستان وبلىسىنىڭ ءبىلىم باسقارماسى باسشىسىنىڭ مىندەتىن اتقارۋشى ايگۇل قاسىمبەكوۆانىڭ ايتۋىنشا, وبلىستىڭ كاسىپتىك-تەحنيكالىق ءبىلىم بەرۋ ۇيىمدارىندا (كوللەدجدەردە) 45 530 ستۋدەنت ەڭبەك نارىعىنا قاجەتتى ماماندىق بويىنشا ءبىلىم الىپ جاتىر. 2025–2026 وقۋ جىلىنا كوللەدج ستۋدەنتتەرىنە 15 500 گرانت, ونىڭ ىشىندە جۇمىسشى ماماندىقتارعا 9600 گرانت ءبولىندى. 2024–2025 وقۋ جىلىندا 35 كوللەدجدە 171 كاسىپورىنمەن قامقورلىققا الۋ جونىندە كەلىسىمشارت ءتۇزىلدى. جىل سوڭىنا دەيىن قامقورلىققا الۋعا قاتىساتىن كاسىپورىن سانىن
200-گە دەيىن ۇلعايتۋ جوسپارلانىپ وتىر. سونداي-اق بيىل از قامتىلعان ازاماتتاردىڭ سانىن 20%-عا تومەندەتۋ مەجەلەنگەن. ااك الۋشىلاردىڭ سانى 45 713 ادامعا نەمەسە 48,2%-عا ازايعان.
ايتا كەتەيىك, وبلىسقا جىل باسىنان بەرى 196,5 ملرد تەڭگە ينۆەستيتسيا تارتىلدى. بۇل وتكەن جىلدىڭ ءتيىستى كەزەڭىمەن سالىستىرعاندا 1,5 ەسە جوعارى. وبلىس ەكونوميكاسىنىڭ دامۋىنا تىڭ سەرپىن بەرەتىن, 2025–2028 جىلدارى جۇزەگە اسىرىلاتىن 110 ينۆەستيتسيالىق جوبا پۋلى قالىپتاستىرىلدى. بيىل 322 ملرد تەڭگەگە 57 ينۆەستيتسيالىق جوبانى ىسكە قوسىپ, 6908 جۇمىس ورنىن قۇرۋ جوسپارلانعان.
تۇركىستان وبلىسى
