وڭىردە وسى باعىتتا 2024–2029 جىلدارعا ارنالعان وڭىرلىك كەشەندى جوسپار بەكىتىلگەن. جوسپارداعى جۇمىستار اياسىندا بيۋدجەت قاراجاتىنان بولەك, كاسىپكەرلەر دەمەۋشىلىگىمەن ويىن, سپورت الاڭدارى, دەمالىس ورىندارى قايتا جاڭعىرتىلىپ, تۇرعىن ۇيلەر مەن الەۋمەتتىك نىساندار زاماناۋي ۇلگىدە جوندەۋدەن وتكىزىلىپ كەلەدى. دەمەۋشى جۇمساعان 1 ملرد تەڭگەگە قالاداعى ورتالىق الاڭ ادام تانىماستاي وزگەرىپ شىعا كەلدى. قازىر كەش باتا قالالىقتار سول الاڭعا قاراي اعىلادى. بيىل قالالىق مادەني-دەمالىس پاركى مەن پرەزيدەنت ساياباعى قولعا الىندى. اۋدان ورتالىقتارىندا دا كاسىپكەرلەر كومەگىمەن جاڭا اللەيالار سالىنىپ, كوشەلەر كەڭەيىپ, جۇرت دەمالاتىن الاڭدار كوبەيىپ كەلەدى.
جۋىردا عانا «تازا قازاقستان» ەكولوگيالىق اكتسياسىنىڭ ىسكە اسىرىلۋ بارىسى تالقىلانعان ماجىلىستە ايماقتا جاسالعان سانيتارلىق تازالىق جۇمىستارى ءبولىنىسىنىڭ قورىتىندىسى ايتىلدى. وسى ارقىلى الەۋمەتتىك, كاسىپكەرلىك نىسانداردىڭ قاسبەتىن قالىپقا كەلتىرۋ, كوشە, جول بويى تازالىعىن قامتاماسىز ەتۋ, جول بەلگىلەرىن تۇزەتۋ جۇمىستارى جۇيەلەنىپ كەلەدى. مەكەمەلەردىڭ تازالىعى, اباتتاندىرىلۋى, تالاپقا ساي بولۋى ءار اۋماققا بەكىتىلگەن سالا باسشىلارىنىڭ جاۋاپكەرشىلىگىندە. اسىرەسە حالىق كوپ شوعىرلاناتىن تەمىرجول مەن اۆتوۆوكزالدار اينالاسى تۇراقتى قاداعالانادى. تازالىق قالاعا كىرەر قاقپا سانالاتىن وسى ورىنداردان باستالۋى كەرەك.
جىل سايىنعى «ۇلگىلى ەلدى مەكەن» بايقاۋى شەڭبەرىندە كەيىنگى ەكى جىلدا ۇزدىك اتانعان ەلدى مەكەندەرگە 48 ارنايى تەحنيكا تابىستالىپتى. بۇدان بولەك, كوممۋنالدىق, اباتتاندىرۋ مەكەمەلەرىنە 142 ارنايى تەحنيكا ساتىپ الىنىپ, ەل يگىلىگىنە قىزمەت ەتىپ جاتىر. تۇرعىنداردى ەكولوگيالىق كولىك قىزمەتىمەن قامتاماسىز ەتۋ ماقساتىندا 100 جاڭا ەلەكترموبيل الىنىپ, ولارعا ەلەكتر قۋاتىن بەرەتىن 16 بەكەت سالىندى.
ورتاق ىستەن قالىس قالىپ جاتقاندار جوقتىڭ قاسى. ءار سەنبىدە تازالىققا جۇمىلعان جۇرت كوشە تازالاپ, باسقالارعا ۇلگى بولىپ ءجۇر. قالا مەن كەنتتەردە قاراپايىم تۇرعىندار اراسىنان ورتاق ىسكە ۇلەس قوسقانداردىڭ كوبەيگەنى مەملەكەت باسشىسى باستاماشى بولعان «تازا قازاقستان» اكتسياسىنىڭ ەل اراسىندا قولداۋ تاپقانىن كورسەتەدى.
قوعامدىق ءتارتىپتى باقىلاۋدا دا اينالاسىن لاستاۋشىلارمەن كۇرەس كۇشەيە ءتۇستى. جەرگىلىكتى اكىمدىك باستاماسىمەن وبلىستىق پوليتسيا, توتەنشە جاعدايلار دەپارتامەنتتەرى درون كومەگىمەن وقىس وقيعالاردى, توتەنشە جاعدايلاردى مونيتورينگىلەۋ ارقىلى تالداۋ جۇمىستارىن جاڭا دەڭگەيدە جۇرگىزۋدى قولعا الدى. وسى باعىتتاعى ۇشجاقتى مەموراندۋم ءوڭىردىڭ تابيعي, مادەني بايلىعىن ساقتاۋدا حالىقتىڭ مادەني دەڭگەيىن ارتتىرۋعا مۇمكىندىك بەرەدى. ودان بولەك اكىمدىكتەر جانىنداعى ءموبيلدى توپ وكىلدەرى دە قالا مەن كەنتتەر تازالىعىنا بايلانىستى رەيدتەر ۇيىمداستىرىپ كەلەدى.
مەملەكەت باسشىسىنىڭ ەلدى مەكەندەردە 15 ميلليون اعاش وتىرعىزۋ تاپسىرماسىنا سايكەس قىزىلوردا وبلىسىنىڭ ەلدى مەكەندەرىن كوگالداندىرۋدىڭ جانە جاسىل ايماقتار قۇرۋدىڭ 2021–2025 جىلدارعا ارنالعان وڭىرارالىق جوسپارى بويىنشا 2021–2024 جىلدارى 718,1 مىڭ جەرسىندىرىلگەن كوشەت وتىرعىزىلدى. بيىل كوكتەمدە ولاردىڭ قاتارىنا 240 مىڭ كوشەت قوسىلدى.
وڭىردەگى تازالىق شارالارىنا 138 مىڭنان اسا تۇرعىن قاتىسىپ, ەلدى مەكەندەردەگى 428 سكۆەر مەن ساياباق, 186 تاريحي-مادەني ەسكەرتكىش, 863 الەۋمەتتىك نىسان, كوشەلەر بويى تازارتىلدى. وزەندەر, كولدەر, جاساندى سۋ ايدىندارى, سۋبۇرقاقتار مەن ارىقتاردى تازالاعانداردىڭ دا ەڭبەگى ءبىر توبە.
قىزىلوردا
