حالال سەرتيفيكاتى بەرىلدى

تاياۋدا قازاقستان مۇسىلماندارى ءدىني باسقارماسىنىڭ توراعاسى, باس ءمۇفتي ەرجان قاجى مالعاجى ۇلى حالال ونىمدەرىن وندىرەتىن «حالال سۇلتان» جشس, «اق نيەت» جشس كاسىپورىندارىنىڭ باسشىلارىنا ءدىني باسقارمانىڭ سەرتيفيكاتىن بەردى. كەزدەسۋ بارىسىندا باس ءمۇفتي قمدب-نىڭ «حالال ونىمدەرىن ستاندارتتاۋ» ءبولىمىنىڭ رۇقساتىن العان ءونىمنىڭ تاۋارلىق تاڭباسى قازاقشا «ادال» دەگەن سوزبەن ەرەكشەلەنەتىنىن جەتكىزىپ, «ادال اس تۇتىنعان حالىقتىڭ ۇرپاعى دەنى ساۋ, ءبىلىمدى, تەكتى بولادى. ادال اس ەلدىك ماسەلە. سوندىقتان, حالال ءوندىرىسىن دۇرىس جولعا قويۋ وزەكتى ماسەلەلەردىڭ ءبىرى. وسى ماسەلەلەردى ءبىر جولعا قويۋ ءۇشىن ءتيىستى مەكەمەلەرمەن جۇمىس جاساۋدامىز», دەدى. سونىمەن قاتار, ءدىني باس­قارمانىڭ سەرتيفيكاتىن الۋعا نيەت بىلدىرگەن كاسىپورىندارمەن جۇمىس جالعاسۋدا, كونسۋلتاتسيالار وتكىزىلۋدە. الداعى ۋاقىتتا شاريعات تالاپتارى تولىق ورىندالعان جانە ورىندالۋى قامتاماسىز ەتىلگەن ءوندىرىس ورىندارىنا حالال سەرتيفيكاتى بەرىلەتىن بولادى. حالال ونىمدەردى ستاندارتتاۋ ءبولىمىنىڭ مەڭگەرۋشىسى بەيبىت مىر­زاگەلديەۆ حالال سەرتيفيكاتى بە­رىلگەن كاسىپورىننىڭ جۇمىسىن قا­داعالايتىن ءار وڭىردەن كەلگەن وكىلدەرمەن كەزدەسىپ, ەلىمىزدەگى حالال ونىمگە قاتىستى وزەكتى ماسەلەلەر جايلى پىكىر الماستى, دەپ حابارلادى قمدب-نىڭ ءباسپاسوز قىزمەتى.