ستراتەگيالىق نىسان پارتيانىڭ 2023-2027 جىلدارعا ارنالعان سايلاۋالدى باعدارلاماسى اياسىندا جۇزەگە اسىرىلۋدا. جوبا ناۋرىزباي اۋدانى مەن الماتى وبلىسىنا قاراستى قاراساي اۋدانىنىڭ بىرقاتار ەلدى مەكەنىن ساپالى اۋىزسۋمەن قامتاماسىز ەتۋگە باعىتتالعان. قۇرىلىسى بيىل قاراشا ايىندا اياقتالادى دەپ جوسپارلانعان.
– وزدەرىڭىز بىلەسىزدەر, ناۋرىزباي اۋدانى – الماتىعا جاڭادان قوسىلعان, قازىر بەلسەندى دامىپ جاتقان ءوڭىر. وعان ىرگەلەس جاتقان قاراساي اۋدانىنىڭ تۇرعىندارى دا وسى اۋماققا قاراي بەت بۇرىپ جاتىر. بۇل نىسان — جالپى سانى 100 مىڭنان استام ادامنىڭ اۋىزسۋ ماسەلەسىن شەشەتىن ماڭىزدى كاسىپورىن. ينجەنەرلەردىڭ ايتۋىنشا, قۇرىلىستىڭ 85 پايىزى اياقتالعان. نەگىزگى عيماراتتار تۇرعىزىلدى. ەگەر جوسپارلانعان مەرزىمدە اياقتالسا, جەلتوقسان ايىندا تۇرعىندار تازا سۋ تۇتىنۋعا مۇمكىندىك الادى, – دەدى ا.سارىم.
دەپۋتات سەرگەي پونومارەۆ تابيعي رەسۋرستاردى ساقتاۋ مەن ءتيىمدى پايدالانۋعا ۇلكەن ءمان بەرۋ قاجەتتىگىن اتاپ ءوتتى. سۋ تارتۋ ستانتسياسى تابيعاتى كوركەم اقساي شاتقالىندا ورنالاسقان. اقساي وزەنى – الماتىنىڭ ەڭ تازا سۋ كوزدەرىنىڭ ءبىرى. سونىمەن قاتار دەپۋتات جوبانىڭ ساپاسىنا, بيۋدجەت قارجىسىنىڭ ءتيىمدى يگەرىلۋىنە جانە مەردىگەر جۇمىسىنا جەكە باقىلاۋ جۇرگىزىلەتىنىن ايتتى.
– مۇندا ونەركاسىپ ورىندارى جوق, سۋدىڭ ساپاسى وتە جوعارى. بۇل جوبا – ەكولوگيالىق جاۋاپكەرشىلىكتىڭ دە جارقىن مىسالى. ءبىز ءالى دە تابيعاتتىڭ بەرگەنىن ەركىن پايدالانىپ ءجۇرمىز. سوندىقتان وسى بايلىقتى قادىرلەپ, ۇنەمدەۋىمىز كەرەك. قازىر وزەن لايلانىپ تۇر. تومەنگى ايماقتارداعى تۇرعىندار سۋمەن قامتىلماي وتىر. سەبەبى قولدانىستاعى جۇيەلەر جۇكتەمەگە توتەپ بەرە المايدى. بىراق جاڭا سۋ تارتۋ ستانتسياسى ىسكە قوسىلعان سوڭ بۇل تۇيتكىل تۇبەگەيلى شەشىلەدى. قاراشادان باستاپ تازا سۋ كەلەدى, – دەدى س.پونومارەۆ.
دەپۋتاتتار قۇرىلىس بارىسىن تەكسەرىپ, مەردىگەر ۇيىمداردىڭ ەسەپتەرىن تىڭدادى, قاراجاتتىڭ يگەرىلۋى مەن ەكولوگيالىق قاۋىپسىزدىك ماسەلەلەرىن تالقىلادى. ايتا كەتۋ كەرەك, نىسان ىلە-الاتاۋ مەملەكەتتىك ۇلتتىق پاركىنىڭ قۇرامىنا كىرەتىن اقساي ورمان شارۋاشىلىعىنىڭ اۋماعىندا ورنالاسقان. سۋ ستانتسياسى ىسكە قوسىلعاننان كەيىن 70–80 تۇراقتى جۇمىس ورنى اشىلادى. ونىڭ ىشىندە سۋدىڭ ساپاسىن باقىلايتىن زەرتحانا دا بولادى. بۇل ءوز كەزەگىندە اۋداننىڭ الەۋمەتتىك-ەكونوميكالىق دامۋىنا ىقپال ەتەدى.
