ەكولوگيا جانە تابيعي رەسۋرستار ءمينيسترى ەرلان نىسانباەۆ, سىرتقى ىستەر ءمينيسترىنىڭ ءبىرىنشى ورىنباسارى اقان راحمەتۋللين, ونەركاسىپ جانە قۇرىلىس مينيسترلىگى وكىلدەرى, پارلامەنت سەناتى مەن ءماجىلىسىنىڭ دەپۋتاتتارى, قازاقستانداعى بىرىككەن ۇلتتار ۇيىمىنىڭ تۇراقتى ۇيلەستىرۋشىسى سارانگو رادناراگچا, بىرىككەن ۇلتتار ۇيىمىنىڭ UN-Habitat ۇيىمى, بىرىككەن ۇلتتار ۇيىمىنىڭ قازاقستانداعى وكىلدەرى, ەلىمىزدىڭ بارلىق وڭىرىنەن كەلگەن وبلىس اكىمىنىڭ ورىنباسارلارى, باسقارما باسشىلارى قاتىسقان فورۋمدا وبلىس اكىمى نۇرلىبەك نالىباەۆ ايماقتا اتقارىلعان اۋقىمدى جۇمىستاردى اتاپ ءوتتى.
بۇگىندە قالالاردى تۇراقتى دامىتۋدا ەكولوگيالىق تەپە-تەڭدىكتى ساقتاپ, تۇرعىنداردىڭ ءومىر ءسۇرۋ ساپاسىن ارتتىرۋ باستى مىندەتتەردىڭ بىرىنە اينالعانى داۋسىز. از جىلدا تۇرعىندار سانى وسكەن قىزىلوردا قارقىندى ۋربانيزاتسيا جولىنا تۇسكەن, ءوز دەڭگەيىندە قالالىق ينفراقۇرىلىم مەن ءومىر ءسۇرۋ ساپاسىن ارتتىرۋ, ەكونوميكانى ءارتاراپتاندىرۋ باعىتىندا ناقتى قادام جاساعان قالا. ءوڭىر تۇرعىندارىنىڭ شامامەن 50%-عا جۋىعى وبلىس ورتالىعىندا تۇرادى.
«قازىر وبلىس بيۋدجەتى 750 ملرد تەڭگەدەن استى. بۇل قاراجات ايماقتاعى ەڭ وزەكتى دەگەن ماسەلەلەردى شەشۋگە, تۇرعىنداردىڭ ءومىر ءسۇرۋ ساپاسىن جاقسارتۋعا, اۋقىمدى ينفراقۇرىلىمدىق جوبالاردى ىسكە اسىرۋعا باعىتتالادى. بۇگىنگى فورۋم – قالالاردى تۇرعىندارعا قولايلى, كليماتقا ءتوزىمدى, ينكليۋزيۆتى ورتالىقتارعا اينالدىرۋ جولىنداعى بىرلەسكەن باستامالارىمىزدى نىعايتاتىن الاڭ. ءبىز ءۇشىن فورۋم – تەك تالقىلاۋ ەمەس, ناقتى ارىپتەستىككە باستايتىن جول. وسى جۇمىستاردى ودان ءارى جەتىلدىرۋگە سەرپىن بەرىپ, قالالاردىڭ بولاشاعىن قالىپتاستىرۋ جولىنداعى ورتاق ماقساتتارعا جەتۋدە ماڭىزدى قادامدار جاساۋعا ىقپال ەتەدى دەپ سەنەمىز», دەدى وبلىس اكىمى.
فورۋمدا ەكولوگيا جانە تابيعي رەسۋرستار ءمينيسترى ەرلان نىسانباەۆ, سىرتقى ىستەر ءمينيسترىنىڭ ءبىرىنشى ورىنباسارى اقان راحمەتۋللين, قازاقستانداعى بىرىككەن ۇلتتار ۇيىمىنىڭ تۇراقتى ۇيلەستىرۋشىسى سارانگو رادناراگچا, UN-Habitat ۇيىمى اتقارۋشى ديرەكتورىنىڭ ورىنباسارى رافاەل تۋتس, بۇۇ دب قازاقستانداعى تۇراقتى وكىلىنىڭ ورىنباسارى سۋحروب حودجيميتوۆ ءسوز سويلەدى.
UN-Habitat اتقارۋشى ديرەكتورى اناكلاۋديا روسسباحتىڭ بەينەحابارلاماسى كورسەتىلدى.
