71 كگ سالماق دارەجەسىندە ونەر كورسەتىپ جۇرگەن 17 جاستاعى جەتىسۋ وبلىسى سارقان اۋدانىنىڭ تۋماسى اتالعان جارىستىڭ ءۇش جاتتىعۋى بويىنشا دا الدىنا جان سالماي, باس جۇلدەنى ولجالادى. سونىمەن قاتار ءاليحان ازيانىڭ ءۇش جانە الەمنىڭ ءۇش رەكوردىن جاڭارتتى. قوسسايىستىڭ قورىتىندىسى بويىنشا قازاقتىڭ اسا دارىندى جاس ورەنى 310 (141+169) كگ-لىق زىلتەمىردى ەڭسەردى. ال جاستار اراسىنداعى باسەكەدە اسكەرباي قولا مەدالدى موينىنا ءىلدى.
بۇل كۇندەرى بىلىكتى باپكەر سەرگەي سەدوۆتىڭ قول استىندا جاتتىعىپ جۇرگەن ءاليحان اسكەربايدىڭ بولاشاعىنا ماماندار زور ءۇمىت ارتىپ وتىر. قانداسىمىز بىلتىرعى ازيا چەمپيوناتىندا دا التىن تۇعىرعا كوتەرىلگەن ەدى. ول كەزدە ءاليحان 64 كگ سالماقتا سايىسقا ءتۇستى.
