اۋقىمدى ءىس-شارانى وبلىس اكىمىنىڭ ورىنباسارى دارىن شامۇراتوۆ اشىپ, بۇل باستامانىڭ تابيعاتتى قورعاۋداعى, قورشاعان ورتانى تازا ۇستاۋداعى جانە ۇرپاققا جاسىل مۇرا قالدىرۋداعى ماڭىزدىلىعىن اتاپ ءوتتى, دەپ حابارلايدى وڭىرلىك كوممۋنيكاتسيا قىزمەتى.
سەنبىلىك اياسىندا جايىق وزەنىنىڭ وڭ جانە سول جاعالاۋىنداعى 14 ۋچاسكە, سونداي-اق قالانىڭ ءتۇرلى اۋماقتارى قوقىستان تازارتىلدى. ءىس-شاراعا مەملەكەتتىك مەكەمەلەردىڭ قىزمەتكەرلەرى, ەرىكتىلەر, جاستار ۇيىمدارى, ۇكىمەتتىك ەمەس ۇيىمدار مەن كاسىپورىن وكىلدەرى جۇمىلدىرىلدى.
جالپى تازالىق جۇمىستارىنا 85 ارنايى تەحنيكا – ونىڭ ىشىندە 10 جۇك تيەگىش, 45 كاماز جانە 30 اۆتوبۋس تارتىلدى. قاتىسۋشىلار تاڭعى 8:00-دە سۇلتان بەيبارىس الاڭىندا جينالىپ, ارنايى اۆتوبۋستارمەن تازالاۋ ۋچاسكەلەرىنە جەتكىزىلدى. ناتيجەسىندە 50 توننادان استام تۇرمىستىق قالدىقتار مەن 3000 تەكشە مەتردەن استام قۇرىلىس قالدىقتارى قالا سىرتىنداعى پوليگوندارعا شىعارىلدى.
سونىمەن قاتار, قالا كەلبەتىنە ساي كەلمەيتىن ەسكى عيماراتتار مەن بوس تۇرعان ۇيلەر ءسۇرىلىپ, ماڭايى رەتكە كەلتىرىلدى.
ايتا كەتەيىك, جىل باسىنان بەرى وبلىس كولەمىندە 95 سەنبىلىك ۇيىمداستىرىلىپ, وعان 57 مىڭنان استام ادام قاتىسقان. ناتيجەسىندە 2274 تونناعا جۋىق قوقىس شىعارىلىپ, 37 877 ءتۇپ اعاش كوشەتتەرى وتىرعىزىلعان. ال ەكولوگيالىق باقىلاۋعا ارنالعان @TazaQazBot تەلەگرام چات-بوتىنا 184 ءوتىنىش ءتۇسىپ, ولاردىڭ باسىم بولىگى ورىندالعان.
