«تۋماق, ولمەك – تاعدىردىڭ شىن قازاسى, ورتاسى – ءومiر, جوقتىق قوي ەكi باسى» دەگەن ەكەن كورنەكتى اقىن, اعارتۋشى شاكارىم قۇدايبەردى ۇلى. كامشاتتىڭ ەۋرازيا ۇلتتىق ۋنيۆەرسيتەتىنىڭ «قازاق ءتىلى مەن ادەبيەتى» ماماندىعىنىڭ باكالاۆرياتى مەن ماگيستراتۋراسىن بىتىرگەننەن كەيىنگى 13 جىل ماعىنالى عۇمىرى انا ءتىلىمىزدى شەتەلدە وقىتىپ ناسيحاتتاۋعا, ەلىمىزدە ءتۇرلى سالاعا ماماندانىپ جاتقان ستۋدەنتتەرگە مەڭگەرتۋگە جۇمسالسا, 2 جىلى اۋىر دەرتپەن كۇرەسۋگە سارپ ەتىلىپتى...
ۇلتىمىزدا «قارلىعاشتىڭ قاناتىمەن سۋ سەپكەندەي» دەگەن تاماشا بەينەلى تەڭەۋ بار. قازاقستان تاۋەلسىزدىك العان سوڭ, ءبىراز سەرىكتەس ەلدەر قازاق تىلىنە قىزىعۋشىلىق ءبىلدىردى. سونىڭ ءبىرى – ءۇندىستان, ەندى ءبىرى – ەۋرازيا وداعىنا ۇيىتقى رەسەي. كامشات تىلەكقىزى وقىتۋشىلار بايقاۋىنان وزا شاۋىپ, 2011–2012 جىلدارى دەليدەگى ءجاميا ميلليا يسلاميا ۋنيۆەرسيتەتى پارسى دەپارتامەنتى قۇرامىنداعى قازاق ءتىلى ورتالىعىندا وقىتۋشى بولدى. ال 2014–2020 جىلدارى تابانداي 6 جىل ماسكەۋ مەملەكەتتىك لينگۆيستيكالىق ۋنيۆەرسيتەتى (مگلۋ) «قازاق ءتىلى مەن مادەنيەتى» ورتالىعىنىڭ ديرەكتورى قىزمەتىن اتقاردى. مادەنيەتتى سلاۆيان ستۋدەنتتەرىنىڭ قازاقشا ءتىلىن سىندىردى. قازاق ەلىنىڭ شىنايى دوستارى, جانكۇيەرلەرى ەتىپ شىعاردى.
ارينە, ول 2010 جىلدان ءومىرىنىڭ سوڭىنا دەيىن ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى پراكتيكالىق قازاق ءتىلى كافەدراسىندا تىركەلىپ, حالىقارالىق وقىتۋشىلىق ىسساپارعا وسى وقۋ ورنىنىڭ اتىنان باردى. كامشاتتى بىلىكتىلىگى, مادەنيەتى, يناباتتىلىعى ءۇشىن فيلولوگيا فاكۋلتەتىنىڭ ۇلكەن-كىشىسى بىردەي قادىرلەيتىن. ول ارقاشان ىزدەنىستە جۇرەتىن. ماسكەۋدەگى قىزمەتىندە ءىلياس ەسەنبەرليننىڭ «كوشپەندىلەر» تريلوگياسى بويىنشا قازاق تىلىنەن پراكتيكالىق ساباقتار وتكىزگەنىن جاقسى بىلەمىز. ءۇندىستاندا ۇيىمداستىرعان «بابىرناما»: قازاق مادەنيەتىنە قاتىستى ۇعىم-تۇسىنىكتەر» اتتى عىلىمي سەمينارى شەتەلدىك ارىپتەستەردىڭ كوڭىلىنەن شىعىپتى.
ءومىر ءار ادامعا امانتتاپ بەرىلەدى. كامشات 39 جىلعى ءومىرىن يگى ءىس پەن ءبىلىم شامشىراعىنا ارنادى. سەيىلحانداي پوليتسيا ساردارىمەن جان جاراستىرىپ, ءشامىل جانە يبراھيم ەسىمدى شەكەسى تورسىقتاي قوس پەرزەنت ءسۇيدى. ءشامىل – ازاتتىق رۋحى, يبراھيم – دانا ابايدىڭ تۇپنۇسقا ەسىمى... بۇعان دا «شۇكىر!» دەيىك.
حالقىمىز «ورنىندا بار وڭالار» دەيدى. اسىل اناسىنىڭ ءالديىن ەستىپ قۇلدىراڭداعان, بۇگىن قامىقسا دا, ەرتەڭ نامىسپەن جەتىلەتىن وسى بالدىرعاندار كامشات تىلەكقىزىنىڭ جاساماعان جاسىن جاساسىن, اڭساعان ارمانىن جۇزەگە اسىرسىن دەپ تىلەيمىز.
سابىر ءشارىپ,
PhD
