قازاقستان حوككەيشىلەرى – ۋنيۆەرسيادانىڭ كۇمىس جۇلدەگەرى

حوككەيدەن قازاقستاننىڭ ەرلەر اراسىنداعى  قۇراماسى سەنبى كۇنى يسپانيانىڭ گرانادا قالاسىندا ۋنيۆەرسيادا شەڭبەرىندە وتكەن تۋرنيردە كۇمىس جۇلدەگە قول جەتكىزدى. ءبىزدىڭ جاستار جارىس جابىلاتىن كۇنگى اقتىق ايقاستا رەسەي جاساعىمەن كەزدەستى. ماتچ كۇتكەندەگىدەي, ءتا­جىريبەسى باسىم, ءداستۇرى تەرەڭ رەسەيلىكتەردىڭ باسىمدىلىعىمەن ءوتتى. ولار كەزدەسۋدىڭ 3-مينۋتىندا ەسەپ اشتى. ونى قاق­پاعا تيمۋر شىنگارەەۆ ءتۇسىردى. ال 14-مينۋتتا ەگور كري­ۆەنكو الىس بۇرىشتى ءدال كوزدەپ, ەسەپتى ۇلعايتتى. بۇدان كەيىن 30-مينۋتتا الەكساندر تورچە­نيۋك تابلو­داعى ەسەپتى 3:0-گە ۇلاس­تىر­دى. ءبىزدىڭ جىگىتتەر ءۇشىنشى كە­زەڭدە باتىل ويناي باستادى. سو­نىڭ ناتيجەسىندە ولار 44-مينۋت­تا ءبىر شايبانىڭ قارىمتاسىن قايتارا ءبىلدى. مۇندا رەنات سافين مەرگەندىگىمەن كوزگە ءتۇستى. ايتا كەتەيىك, قازاقستاننىڭ ستۋدەنتتەر قۇراماسى مۇنىڭ الدىندا, 2013 جىلى وتكەن قىسقى ۋنيۆەرسيادانىڭ دا كۇمىس جۇلدەگەرى اتانىپ ەدى. سول جولى ءبىزدىڭ كوماندا يتاليانىڭ ترەنتينو قالاسىندا وينالعان فينالدىق كەزدەسۋدە كانادا ستۋدەنتتەرىنەن 2:6 ەسەبىمەن ۇتىلعان بولاتىن. ال گرانادادا ۋنيۆەر­سيا­دانىڭ ءۇشىنشى ورنى ءۇشىن كانادا جانە چەحيا كەزدەستى. بۇل تۇندە كەشىرەك وينالدى. ماتچ «ۇيەڭكى جاپىراعى» ەلى حوككەيشىلەرىنىڭ ايقىن باسىمدىلىعىمەن ءبىتتى. ويىننىڭ باسىندا ءبىراز قارسى­لاسقان چەحتار سودان كەيىن ويىن تىزگىنىن قارسى­لاس­تا­رىنا ءبىرجولا بەرىپ قويدى. ءنا­تيجەسىندە 2:6 ەسەبىمەن ۇتىلدى. ال جارتىلاي فينالدا قازاقستان كومانداسى وسى چەحتاردى 2:1 ەتىپ جولدان شىعارىپ تاستاسا, رەسەيلىكتەر كانادالىقتاردى بۋلليتتەن 3:2 ەتىپ ۇتىپ (نەگىزگى ۋاقىت – 2:2), اقتىق سىنعا جولداما العان ەدى. ەسكە سالا كەتەيىك, ۋنيۆەر­سيادادا قازاقستان ستۋدەنتتەرى 11 جۇلدە جەڭىپ الدى. ولاردىڭ قورجىندارىنا 5 التىن, 6 كۇمىس مەدال ءتۇستى. سپورتشىلار ارا­سىن­دا اناستاسيا سلونوۆا ۋني­ۆەر­سيادانىڭ ەكى دۇركىن چەمپيو­نى اتاندى. ال تۋرنيردە رەسەي قۇرا­ماسى 20 التىن, 18 كۇمىس جانە 18 قولا مەدالمەن كومان­دا­لىق ءبى­رىنشى ورىندى جەڭىپ الدى. ەكىن­شى ورىنداعى كورەيا قۇرا­ماسىندا 5 التىن, 9 كۇمىس جانە 2 قولا مەدال بار. رۋسلان يگىلىك.