جانىبەك اۋدانى ورال قالاسىنان 500 شاقىرىم شالعاي جاتىر. بيىل 3 ماۋسىمدا قامىستى اۋىلىنداعى اۋىزسۋ مۇناراسى قۇلاپ قالعان ەدى. وكرۋگتە اياق استىنان اۋىزسۋ بەرۋ توقتاپ, توتەنشە جاعداي جاريالاندى. اۋدان باسشىلىعى تەز ۋاقىتتا ماسەلەنى قولعا الىپ, جاڭا سۋ مۇناراسىن ورناتىپ, 29 ماۋسىمدا تۇرعىندارعا اۋىزسۋ بەرىلدى.
قامىستى اۋىلدىق وكرۋگىنىڭ اكىمى ورالبەك كەنحانوۆتىڭ ايتۋىنشا, ۋاقىتشا قيىندىق تۋعان كەزدە اۋىل تۇرعىندارى سابىرلىق ساقتاپ, تۇسىنىستىك تانىتتى. اۋدان اكىمى تيمۋر شينيازوۆ, اۋداندىق تۇرعىن ءۇي, كوممۋنالدىق شارۋاشىلىق, جولاۋشىلار كولىگى جانە اۆتوموبيل جولدارى ءبولىمىنىڭ باسشىسى رۋستام امانعاليەۆ اۋىل تۇرعىندارىمەن كەزدەسىپ, جاعدايدى باقىلاۋعا الدى.
– جانىبەك اۋدانىندا 9 اۋىلدىق وكرۋگ, 18 ەلدى مەكەن بار. وندا تۇرىپ جاتقان 13 960 ادامدى ساپالى اۋىزسۋمەن قامتۋ – باستى ماقساتىمىزدىڭ ءبىرى. بۇگىندە حالىقتىڭ 98,5%-ى تازا سۋ تۇتىنىپ وتىر, – دەيدى جانىبەك اۋدانى اكىمىنىڭ ورىنباسارى ميربولات بيسەنوۆ.
اۋداندا جانىبەك, ۇزىنكول, ەڭبەكشى اۋىلدارى اۋىزسۋدى وردا توپتىق سۋ قۇبىرىنان السا, تالوۆ ەلدى مەكەنىنە قۇبىر جەر ءۇستى سۋ قويماسىنان تارتىلعان. تاۋ, بورسى, مايتۇبەك, قامىستى, تەگىسشىل, جاقسىباي, اقوبا, جاسقايرات اۋىلدارى تازا سۋدى جەر استىنان سكۆاجينا ارقىلى الىپ وتىر. ونەگە, جۇماەۆ, كولتابان, قۇرساي اۋىلدارىنا تىرشىلىك ءنارى بلوك ءمودۋلدى كەشەن ارقىلى جەتەدى. جىگەر مەن اقادىر اۋىلى تۇرعىندارى اۋىزسۋدى قۇدىقتان الادى.
– بيىل تاۋ, بورسى, جاسقايرات اۋىلدارىنداعى اۋىزسۋ قۇبىرىن جاڭعىرتتىق. بۇعان مەملەكەتتىك بيۋدجەتتەن 929 ملن تەڭگە ءبولىندى. قازىر جاقسىباي مەن اقوبا اۋىلدارىنداعى اۋىزسۋ قۇبىرىن جاڭعىرتۋ جۇمىسى باستالدى. ونەگە, جۇماەۆ, كولتابان, قۇرساي ەلدى مەكەندەردەگى بلوك ءمودۋلدى كەشەندەرىن دە بيىل جوندەۋدى جوسپارلاپ قويدىق, – دەيدى م.بيسەنوۆ.
اۋداندا تۇرعىنداردىڭ جەكە باۋ-باقشاسىن سۋارۋعا قاجەتتى سۋدىڭ جايى دا ويلاستىرىلعان. ايتالىق, جاسقايرات اۋىلىندا شارۋاشىلىققا پايدالاناتىن سۋ قۇبىرىنىڭ قۇرىلىسى جۇرگىزىلمەك. جوبا قۇجاتتارى دايىن. بۇل اۋىزسۋ قورىن ۇنەمدەۋگە وتە قاجەت.
وڭىردەگى ەڭ ۇلكەن اقجايىق اۋدانى تۇرعىندارىنىڭ 98 پايىزى دا تازا اۋىزسۋ تۇتىنادى. مۇنداعى 45 ەلدى مەكەننىڭ 38-ىنە سۋ قۇبىر ارقىلى جەتكىزىلسە, 7 ەلدى مەكەندە كەشەندى بلوك مودۋل ورناتىلعان.
– بىلتىر اۋداننىڭ قابىل, ءتىنالى اۋىلدارىنا سۋ قۇبىرىن تارتتىق. ۇشتوبە, توعان اۋىلدارىندا كەشەندى بلوك-مودۋل ورناتىلىپ, تۇرعىندار تازا اۋىزسۋ جۇيەسىنە قول جەتكىزدى. قابىرشاقتى اۋىلىنا دا جەراستى سۋ كوزىنەن قۇبىر تارتىلىپ, نىسان تولىق ىسكە قوسىلدى, – دەيدى اقجايىق اۋدانىنىڭ اكىمى مۇرات سەردالين.
قازىر اۋدان ورتالىعى چاپاەۆ اۋىلىندا سۋ قۇبىرىن قايتا جاڭارتۋ جۇمىسى ءجۇرىپ جاتىر. قۇرىلىستىڭ ساپاسىن جەرگىلىكتى بيلىك قاتاڭ قاداعالاپ وتىر. ءبىراز ۋاقىت بۇرىن مەردىگەر جۇمىسىنان كىنارات بايقالىپ, جەرگىلىكتى كومپانيا قوسىمشا جۇمىسقا تارتىلعان ەدى. ازىرگە جوبانىڭ 80%-ى اتقارىلعان.
اۋدان باسشىسىنىڭ ايتۋىنشا, ىسكە قوسىلعانىنا 15 جىلدان اسقان قاراۋىلتوبە, تايپاق, ۇشتوبە, جامبىل, شابدارجاپ, العاباس, المالى اۋىل وكرۋگتەرىندەگى سۋ قۇبىرلارىن جاڭارتۋ جوسپارلانىپ وتىر. بۇگىندە قاراۋىلتوبە اۋىلىنىڭ سۋ قۇبىرىن قايتا قۇرۋ قۇجاتى جاسالعان, قازىر ساراپتامادان ءوتىپ جاتىر.
تازا اۋىزسۋ – حالىق دەنساۋلىعى مەن ءومىر ساپاسىنىڭ كەپىلى. وسىنى جاقسى تۇسىنەتىن ءوڭىر باسشىلىعى كەيىنگى جىلدارى اۋىلدىق جەرلەردى ساپالى اۋىزسۋمەن قامتاماسىز ەتۋگە ەرەكشە نازار اۋدارىپ كەلەدى. كەيىنگى ەكى جىلدا باتىس قازاقستان وبلىسىندا 65 اۋىلعا تازا اۋىزسۋ جەتكىزىلىپ, جالپى سوماسى 12,0 ملرد تەڭگەگە 60 جوبا جۇزەگە اسقان. بۇل جۇمىستاردىڭ ناتيجەسىندە 9 مىڭ تۇرعىن تازا اۋىزسۋعا قول جەتكىزگەن. بۇگىندە وبلىستا تۇراتىن اۋىل حالقىنىڭ 97%-ى ساپالى اۋىزسۋمەن قامتىلعان, وبلىستاعى 307 اۋىل تازا سۋ تۇتىنىپ وتىر.
– 2020–2022 جىلدارى وبلىستا 55 الەۋمەتتىك نىساننىڭ قۇرىلىسى باستالىپ, بىراق ءتۇرلى سەبەپپەن جۇمىسى توقتاپ قالعان ەكەن. بۇعان قارجىلاندىرۋدىڭ ۋاقىتشا كىدىرۋى, قۇرىلىس ماتەريالدارىنىڭ جەتىسپەۋشىلىگى, مەردىگەرلەردىڭ جاۋاپسىزدىعى سەكىلدى تۇيتكىلدەر سەبەپ بولعان. ولاردىڭ بارلىعىن قاتاڭ باقىلاۋعا الدىق. جۇيەلى جۇمىستىڭ ناتيجەسىندە, بۇگىندە جوعارىدا اتالعان 55 نىسان, ونىڭ ىشىندە 16 سۋ قۇبىرى حالىقتىڭ يگىلىگىنە بەرىلدى, – دەيدى باتىس قازاقستان وبلىسىنىڭ اكىمى ناريمان تورەعاليەۆ.
قىسقاسى, اقجايىق ءوڭىرىنىڭ اۋىل تۇرعىندارى مەملەكەتتىڭ تۇراقتى قولداۋى, جۇيەلى جۇرگىزىلگەن جۇمىستاردىڭ ارقاسىندا اۋىزسۋدان تارىقپاي وتىر.
باتىس قازاقستان وبلىسى
