قازىرگى تاڭدا «Exim Artis» كومپانيالار توبىنا قاراستى شاحتادا 650-گە جۋىق ادام جۇمىس ىستەيدى. بيىلعى جارتىجىلدىقتا كاسىپورىن 220 مىڭ توننادان استام كومىر ءوندىرىپ, جىلدىق جوسپاردىڭ باسىم بولىگىن ورىنداعان.
كەزدەسۋ بارىسىندا دەپۋتاتتار كەنشىلەرگە مەملەكەت باسشىسىنىڭ رەفورمالارى مەن پارتيانىڭ سايلاۋالدى باعدارلاماسى جايلى باياندادى. ەرەكشە نازار اۋدارىلعان ماسەلە – زياندى ءارى قاۋىپتى ەڭبەك جاعدايىندا جۇمىس ىستەيتىن ازاماتتاردىڭ زەينەتكە ەرتە شىعۋ قۇقىعى. باۋىرجان سماعۇلوۆتىڭ ايتۋىنشا, 2023 جىلدىڭ باسىنان بەرى 15,5 مىڭنان استام ادام ارنايى الەۋمەتتىك تولەم مۇمكىندىگىن پايدالانعان. ونىڭ 2,5 مىڭى – قاراعاندى وبلىسىنىڭ تۇرعىندارى.
كەنشىلەرمەن اڭگىمەدە وندىرىستەگى قاۋىپسىزدىك پەن كاسىبي اۋرۋلاردىڭ الدىن الۋ جايى دا قوزعالدى. دەپۋتات قۇدايبەرگەن بەكسۇلتانوۆ بىلتىر وبلىستا قوعامدىق دەنساۋلىق ساقتاۋ جانە كاسىبي دەنساۋلىق ينستيتۋتىنىڭ قايتا قۇرىلعانىن اتاپ ءوتتى. بۇل مەكەمە جارتى ميلليوننان استام زياندى وندىرىستە ەڭبەك ەتەتىن ازاماتتاردىڭ دەنساۋلىعىن قورعاۋعا باعىتتالعان عىلىمي جانە پراكتيكالىق جۇمىستارمەن اينالىسادى.
ايماقتاعى وندىرىستىك جاراقات دەڭگەيى دە الاڭداتارلىق. بيىلدىڭ وزىندە 159 ادام زارداپ شەككەن. وسىعان بايلانىستى ارمان قالىقوۆ ەڭبەك قاۋىپسىزدىگىن كۇشەيتۋ قاجەتتىگىن اتاپ ءوتتى.
«شاحتاعا ءتۇسۋ – كۇن سايىنعى ەرلىك. سوندىقتان وسىنداي كۇردەلى جاعدايدا جۇمىس ىستەيتىن ازاماتتاردىڭ قاۋىپسىزدىگى ءاردايىم مەملەكەت باسشىسىنىڭ باقىلاۋىندا. قابىلدانعان زاڭدار جۇمىسشىنىڭ كىناسىنە قاراماستان, اپات كەزىندە تولىق ساقتاندىرۋ تولەمىن الۋعا مۇمكىندىك بەرەدى. ال ەڭبەك ينسپەكتورلارى قاۋىپسىزدىك تالاپتارى بۇزىلعان جاعدايدا ءوندىرىستى توقتاتۋعا قۇقىلى», دەدى دەپۋتات.
كەزدەسۋ بارىسىندا كەنشىلەر جاس ماماندار تاپشىلىعى, الەۋمەتتىك قولداۋ تەتىكتەرى مەن جەڭىلدەتىلگەن يپوتەكالىق باعدارلامالاردى كەڭەيتۋ قاجەتتىگىن دە العا تارتتى. دەپۋتاتتار بۇل ۇسىنىستاردى نازارعا الىپ, جۇيەلى شەشىم قابىلداۋ ءۇشىن ۇكىمەتپەن بىرلەسكەن جۇمىستى جالعاستىرۋعا نيەتتى ەكەندەرىن ءبىلدىردى.
